ອິນໂດເນເຊຍຍົກລະດັບມາດຕະການທາງທະເລ ຈາກທ່າທີ່ອັນໜ້າສົງໄສຂອງເຮືອຈີນ

ລາຍງານ 16 ກັນຍາ 2020, ສຳນັກງານຄວາມປອດໄພທາງທະເລຂອງອິນໂດເນເຊຍ ອອກຖະແຫຼງການເມື່ອວັນອັງຄານ (15 ກັນຍາ) ທີ່ຜ່ານມາ ເລື່ອງການເສີມກຳລັງເພື່ອຍົກລະດັບປະສິດທິພາບຂອງພາລະກິດລາດຕະເວນ ບໍລິເວນໝູ່ເກາະນາຕູນາ ທາງຕອນໃຕ້ຂອງທະເລຈີນໃຕ້ ໂດຍຈະໄດ້ຮັບການສະໜັບສະໜູນຈາກກອງທັບເຮືອ.

ການເຄື່ອນໄຫວດັ່ງກ່າວເກີດຂຶ້ນ ພາຍຫຼັງທີ່ເຮືອລາດຕະເວນລຳໜຶ່ງຂອງໜ່ວຍຍາມຝັ່ງອິນໂດເນເຊຍ ປະເຊີນໜ້າກັບເຮືອລາດຕະເວນຂອງຈີນດົນກວ່າ 3 ວັນ ຕັ້ງແຕ່ຄືນວັນສຸກ (11 ກັນຍາ) ທີ່ຜ່ານມາ ໂດຍລັດຖະບານອິນໂດເນເຊຍລະບຸວ່າ ເຮືອຂອງຈີນລ່ອງເຂົ້າມາພາຍໃນລັດສະໜີ 200 ໄມທະເລຈາກເສັ້ນທາງຊາຍຝັ່ງທິດເໜືອຂອງໝູ່ເກາະນາຕູນາ ເຊິ່ງອິນໂດເນເຊຍຖືວ່າເປັນເຂດເສດຖະກິດສະເພາະ.

ເຊິ່ງໜ່ວຍຍາມຝັ່ງຂອງອິນໂດເນເຊຍຢືນຢັນວ່າ ການທີ່ເຮືອຂອງປະເທດໃດໜຶ່ງຈະເດີນທາງຜ່ານບໍລິເວນທີ່ຖືເປັນເຂດເສດຖະກິດສະເພາະຂອງອີກປະເທດ ສາມາດເຮັດໄດ້ ຕາບໃດທີ່ບໍ່ສະແດງພຶຶດຕິກຳທີ່ໜ້າສົງໄສ ແຕ່ຄັ້ງນີ້ເຮືອຂອງຈີນໃຊ້ເວລາຢູ່ນີ້ດົນກວ່າປົກກະຕິ ກ່ອນຈະເປັນຝ່າຍຖອຍອອກໄປເມື່ອວັນຈັນ ທີ່ຜ່ານມາ ຕາມເວລາທ້ອງຖິ່ນ ພາຍຫຼັງທີ່ເຈົ້າໜ້າທີ່ເທິງເຮືອຂອງທັງສອງປະເທດເຈລະຈາກັນ.

ຂະນະທີ່ທ່ານ ຫວັງ ເຫວິນປິນ ໂຄສົກກະຊວງການຕ່າງປະເທດກ່າວເຖິງບັນຫານີ້ວ່າ ເປັນພາລະກິດລາດຕະເວນຕາມປົກກະຕິພາຍໃນອານາເຂດທາງທະເລຂອງ ສປ.ຈີນ, ເຊິ່ງຈີນບໍ່ເຄີຍອ້າງກຳມະສິດເໜືອໝູ່ເກາະນາຕູນາ ແຕ່ການສົ່ງເຮືອລາດຕະເວນເຂົ້າມາບໍລິເວນນີ້ເປັນປະຈຳ ເຮັດໃຫ້ອິນໂດເນເຊຍເກີດຄວາມກັງວົນ.

HTML tutorial