ອົງການການຄ້າໂລກຕັດສິນວ່າ ກຳແພງພາສີທີ່ ສ.ອາເມຣິກາຕັ້ງຂຶ້ນສຳລັບ ສປ.ຈີນ ແມ່ນຜິດກົດໝາຍ

ລາຍງານ 16 ກັນຍາ 2020, ຄະນະກຳມະການແກ້ໄຂຂໍ້ຂັດແຍ່ງຂອງອົງການການຄ້າໂລກ (WTO) ມີມະຕິເມື່ອວັນອັງຄານ (15 ກັນຍາ) ທີ່ຜ່ານມາ ວ່າກຳແພງພາສີມູນຄ່າ 234,000 ລ້ານໂດລາສະຫະລັດ ທີ່ລັດຖະບານ ສ.ອາເມຣິກາ ພາຍໃຕ້ການນຳຂອງທ່ານປະທານປະເທດ ໂດໂນ ທຣຳ ບັງຄັບໃຊ້ຕໍ່ລັດຖະບານຈີນ ພາຍໃຕ້ການນຳຂອງທ່ານປະທານປະເທດ ສີ ຈິ້ນຜິງ ເມື່ອປີ 2018 ນັ້ນ ລະເມີດກົດໝາຍການຄ້າລະຫວ່າງປະເທດຫຼາຍປະການ.

ເຊິ່ງຄຳຕັດສິນຂອງຄະນະກຳມະການທັງ 3 ຄົນ ມີມະຕິເປັນເອກະພາບ ລວມເຖິງການທີ ສ.ອາເມຣິກາບັງຄັບໃຊ້ກຳແພງພາສີດັ່ງກ່າວຢ່າງສະເພາະເຈາະຈົງຕໍ່ຈີນ, ອັດຕາພາສີສິນຄ້າຫຼາຍປະເພດສູງເກີນກວ່າທີ່ກົດໝາຍຂອງ ສ.ອາເມຣິກາກຳນົດ ແລະ ລັດຖະບານ ສ.ອາເມຣິກາຍັງບໍ່ສາມາດໃຫ້ເຫດຜົນທີ່ມີນ້ຳໜັກພຽງພໍ ວ່າເພາະເຫດໃດຈຶ່ງຈຳເປັນຕ້ອງຂຶ້ນພາສີຕໍ່ສິນຄ້າຂອງຈີນໃນອັດຕາສູງຂະໜາດນັ້ນ.

ຂະນະດຽວກັນ, ສ.ອາເມຣິກາ ຍັງບໍ່ສາມາດຊີ້ແຈງໄດ້ຢ່າງຊັດເຈນ ກ່ຽວກັບກຳແພງພາສີຂອງຕົນເອງ ທີ່ວ່າສາມາດໄດ້ຮັບການຍົກເວັ້ນຈາກກົດໝາຍ, ນອກເໜືອຈາກການຮ້ອງຮຽນໃນບັນຫາທີ່ວ່າ ລັດຖະບານຈີນບັງຄັບໃຫ້ບໍລິສັດຂອງ ສ.ອາເມຣິກາ ຕ້ອງຖ່າຍທອດເຕັກໂນໂລຊີສຳຄັນຫຼາຍຢ່າງ ເພື່ອແລກກັບການໄດ້ຕັ້ງສຳນັກງານ ຫຼື ສົ່ງອອກສິນຄ້າ ແລະ ບໍລິການມາຍັງຈີນໃນອັດຕາພິເສດ.

ໃນດ້ານກະຊວງການຄ້າຂອງຈີນ ເຊິ່ງເປັນຜູ້ຍື່ນຄຳຮ້ອງເມື່ອເດືອນເມສາ 2018 ສະແດງຄວາມພໍໃຈຕໍ່ຄຳຕັດສິນວ່າ ກົງປະເດັັນ ແລະ ຍຸຕິທຳ ພ້ອມທັງຮຽກຮ້ອງໃຫ້ ສ.ອາເມຣິກາຍອມຮັບ,​ ຂະນະທີ່ສະພາການຄ້າ ສ.ອາເມຣິກາ ເຫັນດີກັບມະຕິຂອງ WTO ເຊັ່ນກັນ.

ເຖິງຢ່າງໃດກໍ່ຕາມ ສຳນັກງານຜູ້ແທນການຄ້າຂອງ ສ.ອາເມຣິກາ ວິຈານມະຕິດັ່ງກ່າວ ບໍ່ເໝາະສົມຢ່າງຍິ່ງ ແລະ ປະກາດຍື່ນອຸທອນ, ເຊິ່ງ ສ.ອາເມຣິກາ ບໍ່ເຄີຍຮ້ອງຮຽນຕໍ່ WTO ກ່ຽວກັບກຳແພງພາສີທີ່ຈີນໃຊ້ຕອບໂຕ້.

HTML tutorial