ຂ່າວກອງລັດເຊຍລະບຸວ່າ ສ.ອາເມຣິກາຢູ່ເບື້ອງຫຼັງການປະທ້ວງຂັບໄລ່ລັດຖະບານເບລາຣຸດຊີ

ລາຍງານ 17 ກັນຍາ 2020, ສຳນັກຂ່າວກອງຕ່າງປະເທດລັດເຊຍ (SVR) ເຜີຍແຜ່ຖະແຫຼງການຂອງທ່ານ ເຊີເກ ນາຣິສກິນ ຜູ້ອຳນວຍການ ເມື່ອວັນພຸດ (16 ກັນຍາ) ທີ່ຜ່ານມາ ລະບຸແບບກົງໄປກົງມາວ່າ ສ.ອາເມຣິກາວາງແຜນໃຫ້ເກີດການປະທ້ວງຂັບໄລ່ລັດຖະບານເບລາຣຸດຊີຕັ້ງແຕ່ປີທີ່ຜ່ານມາ ກ່ອນເຖິງວັນເລືອກຕັ້ງປະທານປະເທດເມື່ອວັນທີ 9 ສິງຫາ ທີ່ຜ່ານມາ ໂດຍລັດຖະບານ ສ.ອາເມຣິກາໃຊ້ງົບປະມານໄປແລ້ວ 20 ລ້ານໂດລາສະຫະລັດເພື່ອກໍ່ການດັ່ງກ່າວ.

ເຊິ່ງເງິນຈຳນວນດັ່ງກ່າວເປັນການລົງທຶນຜ່ານເຄືອຂ່າຍທີ່ຮຽກວ່າ ອົງກອນສະໜັບສະໜູນປະຊາທິປະໄຕ ແລ້ວມີການຖ່າຍໂອນຕໍ່ຢ່າງເປັນລຳດັບຂັ້ນ ຈົນເຖິງການເຝິກຝົນໃຫ້ກັບກຸ່ມນັກເຄື່ອນໄຫວທາງການເມືອງໃນຫຼາຍປະເທດ ທີ່ຢູ່ຕິດກັບເບລາຣຸດຊີ ໂດຍໃຊ້ຍຸດທະສາດແບບດຽວກັບການ “ປະຕິວັດສີ” ເພື່ອໃຫ້ເກີດການປ່ຽນແປງໂຄງສ້າງຂອງລະບົບການປົກຄອງຕັ້ງແຕ່ຂັ້ນຮາກຖານ.

ຂະນະດຽວກັນ, ທ່ານ ເຊີເກ ນາຣິສກິນກ່າວເຖິງທ່ານ ນາງ ສະເວດລານາ ທິຄານັອບສະກາຢາ (Svetlana Tikhanovskaya) ອະດີດຄູສອນພາສາອັງກິດ ອາຍຸ 38 ປີ ເຊິ່ງກາຍເປັນແກນນຳຂອງຝ່າຍຕໍ່ຕ້ານລັດຖະບານເບລາຣຸດຊີ ຈາກການທີ່ທ່ານນາງລົງສະໝັກເລືອກຕັ້ງແທນສາມີຄື ທ່ານ ເຊີເກ ທິຄານັອບສະກາຢາ ທີ່ມີອາຊີບເປັນນັກຂຽນອິດສະຫຼະອອນລາຍ ເຊິ່ງຕອນນີ້ກຳລັງຮັບໂທດຕິດຄຸກ ວ່າຜູ້ກ່ຽວ ແລະ ເຄື່ອຂ່າຍນັກເຄື່ອນໄຫວອີກຫຼາຍຄົນຢູ່ພາຍໃຕ້ອິດທິພົນຂອງ ສ.ອາເມຣິກາ, ລາຍງານຂອງ SVR ຍັງລະບຸວ່າ ລັດຖະບານ ສ.ອາເມຣິກາເປັນທໍ່ນ້ຳລ້ຽງໃຫ້ກັບນັກຂຽນອອນລາຍອີກຫຼາຍຄົນ ແຕ່ບໍ່ໄດ້ເຈາະຈົງຊື່ຂອງບຸກຄົນໃດ.

ໃນດ້ານຂອງກະຊວງການຕ່າງປະເທດລິດຕົວນີສະແດງຄວາມບໍ່ພໍໃຈຕໍ່ບັນຫາດັ່ງກ່າວ ໂດຍກ່າວວ່າເປັນເລື່ອງທີ່ລັດເຊຍແຕ່ງຂຶ້ນ ແລະ ເວົ້າກັບໄປກັບມາຕະຫຼອດໄລຍະ 6 ປີທີ່ຜ່ານມາ ຫຼື ນັບຕັ້ງແຕ່ວິກິດການເມືອງໃນອູແກຣນ, ເຊິ່ງລິດຕົວນີທີ່ໃຫ້ສະຖານະຜູ້ລີ້ໄພທາງການເມືອງກັບທ່ານ ນາງ ສະເວດລານາ ທິຄານັອບສະກາຢາ ຍັງໄດ້ປະກາດຜ່ອນຜັນມາດຕະການເຂັ້ມງວດດ້ານວີຊາໃຫ້ກັບປະຊາຊົນເບລາຣຸດຊີອີກດ້ວຍ, ຂະນະທີ່ທຳນຽບຂາວ ແລະ ກະຊວງການຕ່າງປະເທດ ສ.ອາເມຣິກາຍັງບໍ່ມີປະຕິກິລິຍາຕອບໂຕ້ຢ່າງເປັນທາງການ ຕໍ່ຂໍ້ກ່າວຫາຂອງໜ່ວຍຂ່າວກອງລັດເຊຍ.

HTML tutorial