ຫວຽດນາມອົບພະຍົບປະຊາຊົນກວ່າ 1 ລ້ານຄົນ ຫຼົບໄພພາຍຸໂນອຶນທີ່ກຳລັງຈະຂຶ້ນຝັ່ງ

ລາຍງານ 17 ກັນຍາ 2020, ກົມອຸຕຸນິຍົມຫວຽດນາມຄາດຄະເນວ່າ ພາຍຸໝຸນເຂດຮ້ອນໂນອຶຶນ ຈະພັດຂຶ້ນຝັ່ງແຂວງກວາງບິນ, ກວາງຈີ ແລະ ເທືອທຽນ-ເຫວ້ ໃນວັນສຸກ 18 ກັນຍານີ້ ດ້ວຍຄວາມໄວລົມ 75-90 ກິໂລແມັດຕໍ່ຊົ່ວໂມງ.

ຖະແຫຼງການຂອງຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດຫວຽດນາມກ່າວວ່າ ທາງການໄດ້ສັ່ງອົບພະຍົບປະຊາຊົນ 1.17 ລ້ານຄົນໃນ 3 ແຂວງທີ່ຢູ່ໃນທິດທາງເຄື່ອນທີ່ຜ່ານຂອງພາຍຸ ອອກນອກພື້ນທີ່ເປັນການຊົ່ວຄາວ ໃນວັນສຸກ, ນອກຈາກນັ້ນຍັງສັ່ງປິດໂຮງຮຽນໃນຫຼາຍແຂວງທາງພາກກາງ ລວມທັງຊາຍຫາດທ່ອງທ່ຽວຍອດນິຍົມຂອງເມືອງດານັງ ລະ ເມືອງເວ້.

ສື່ທາງການຫວຽດນາມລາຍງານວ່າ ລັດຖະບານຫວຽດນາມລະດົມກຳລັງທະຫານຈາກຄ່າຍປະຈຳພາກ ແລະ ທະຫານຊາຍແດນກວ່າ 250,000 ຄົນ ເຂົ້າຊ່ວຍເຫຼືອປະຊາຊົນໃນພື້ນທີ່ສ່ຽງໄພ ແລະ ຈະປັກຫຼັກລໍຖ້າປະຕິບັດການຄົ້ນຫາ ແລະ ກູ້ໄພຫາກເກີດໄພພິບັດ.

ກົມອຸຕຸນິຍົມວິທະຍາຫວຽດນາມລາຍງານວ່າ ເຂດພາກກາງຂອງປະເທດອາດເກີດຝົນຕົກໜັກ ດ້ວຍປະລິມານນ້ຳຝົນເຖິງ 400 ມິນລິແມັດ ນັບຕັ້ງແຕ່ກາງເດິກຄືນວັດພະຫັດນີ້ ຈົນເຖິງວັນສຸກ ພ້ອມກັບເຕືອນພາວະນ້ຳຖ້ວມກະທັນຫັນໃນເຂດຊຸມຊົນເມືອງ ແລະ ດິນເຈື່ອນໃນເຂດພູສູງ.

ໃນດ້ານຂອງກົມອຸຕິນິຍົມ ແລະ ອຸທົກກະສາດຂອງ ສປປ.ລາວ ຄາດວ່າ ຫຼັງຈາກພາຍຸຫົວດັ່ງກ່າວພັດເຂົ້າພາກກາງຂອງຫວຽດນາມແລ້ວ ຈະສືບຕໍ່ເຄື່ອນທີ່ຜ່ານບັນດາແຂວງພາກໃຕ້ ຂຶ້ນໄປພາກກາງ ແລະ ພາກເໜືອ ຂອງ ສປປ.ລາວ ໃນວັນທີ 18 ຫາຕອນເຊົ້າວັນທີ 19 ກັນຍານີ້, ຈາກນັ້ນຈະອ່ອນກຳລັງລົງເປັນພາຍຸດີເປຼຊັນ, ເຊິ່ງຈະເຮັດໃຫ້ມີຝົນຕົກໜັກພ້ອມຈະມີລົມພັດແຮງຢູ່ບັນດາແຂວງພາກເໜືອ ລົງຫາ ພາກກາງ ແລະ ພາກໃຕ້ ໃນໄລຍະວັນທີ 18-20 ກັນຍານີ້.

ດັ່ງນັ້ນ, ຈຶ່ງຂໍແຈ້ງເຕືອນເຖິງປະຊາຊົນທີ່ອາໄສຢູ່ບັນດາແຂວງພາກເໜືອ, ພາກກາງ ແລະ ພາກໃຕ້ເຊັ່ນ: ແຂວງຫົວພັນ, ຊຽງຂວາງ, ບໍ່ແກ້ວ, ຫຼວງພະບາງ, ໄຊຍະບູລີ, ວຽງຈັນ, ນະຄອນຫຼວງວຽງຈັນ, ໄຊສົມບູນ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ອັດຕະປື ຈົ່ງມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ ທີ່ຈະເຮັດໃຫ້ມີຕົ້ນໄມ້ຫັກ ແລະ ເສົາໄຟຟ້າລົ້ມ, ເຮືອນເປ່ເພ, ນ້ຳຖ້ວມຊຸ, ດິນເຈື່ອນ ແລະ ນ້ຳຖ້ວມອັ່ງ; ພ້ອມນີ້ກໍ່ໃຫ້ຕິດຕາມການແຈ້ງເຕືອນໄພຈາກກົມອຸຕຸນິຍົມ ແລະ ອຸທົກກະສາດ.

HTML tutorial