ຈີນ-ໄຕ້ຫວັນ ປະຈັນໜ້າກັນທາງອາກາດ ທີ່ຊ່ອງແຄບໄຕ້ຫວັນ

ລາຍງານ 19 ກັນຍາ 2020, ກະຊວງປ້ອງກັນປະເທດໄຕ້ຫວັນອອກຖະແຫຼງການວ່າ ຕະຫຼອດວັນສຸກ (18 ກັນຍາ) ທີ່ຜ່ານມາ ຍົນຂັບໄລ່ກອງທັບໄຕ້ຫວັນໄດ້ປະຕິບັດການສະກັດຍົນຮົບຂອງກອງທັບປົດປ່ອຍປະຊາຊົນຈີນ 18 ລຳ ເຊິ່ງມີທັງຍົນຖິ້ມລະເບີດທາງຍຸດທະສາດ ແລະ ຍົນຂັບໄລ່ຫຼາກຫຼາຍຮຸ້ນ ທີ່ລະເມີດເຂດພິສູດຝ່າຍປ້ອງກັນໄພທາງອາກາດຂອງໄຕ້ຫວັນ (ADIZ) ບໍລິເວນໝູ່ເກາະຕົງຊາ ແລະ ຍັງຂ້າມເສັ້ນແບ່ງເຂດບໍລິເວນຊ່ອງແຄບໄຕ້ຫວັນອີກດ້ວຍ.

ໃນດ້ານຂອງທ່ານພົນເອກ ເຫຼິນ ກົ້ວສຽງ ໂຄສົກກະຊວງປ້ອງກັນປະເທດຈີນ ກ່າວກ່ອນໜ້ານັ້ນພຽງບໍ່ພໍເທົ່າໃດຊົ່ວໂມງ ຢືນຢັນວ່າກອງທັບປົດປ່ອຍປະຊາຊົນຈີນໄດ້ມີການຊ້ອມຮົບບໍລິເວນຊ່ອງແຄບໄຕ້ຫວັນ ໂດຍເປັນການຕອບສະໜອງຕໍ່ສະຖານະການອັນໜ້າເປັນຫ່ວງທີ່ກຳລັງເກີດດຂຶ້ນຢູ່ບໍລິເວນຊ່ອງແຄບໄຕ້ຫວັນ ເພື່ອປົກປ້ອງອະທິປະໄຕ ແລະ ຜືນແຜ່ນດິນອັນຄົບຖ້ວນ.

ຂະນະທີ່ທ່ານ ຫວັງ ເຫວິນປິນ ໂຄສົກກະຊວງການຕ່າງປະເທດຈີນ ກ່າວເຖິງການຊ້ອມຮົບດັ່ງກ່າວວ່າ ສະທ້ອນເຖິງຄວາມອາດສາມາດທາງທະຫານຂອງຈີນ ໃນການປ້ອງກັນຕົນເອງຈາການແຊກແຊງໂດຍກອງກຳລັງພາຍນອກ ແລະ ກອງກຳລັງແບ່ງແຍກດິນແດນໄຕ້ຫວັນ.

ໃນດ້ານຂອງທ່ານ ນາງ ໄຊ້ ວິງ-ເຫວິນ ຜູ້ນຳໄຕ້ຫວັນ ບໍ່ໄດ້ກ່າວເຖິງບັນຍາກາດຄວາມເຄັ່ງຕຶງດັ່ງກ່າວຢູ່ບໍລິເວນຊ່ອງແຄບໄຕ້ຫວັນ ລະຫວ່າງການຕ້ອນຮັບທ່ານ ຄີດ ຄຣາສ ເຈົ້າໜ້າທີ່ລະດັບສູງດ້ານເສດຖະກິດ ຂອງກະຊວງການຕ່າງປະເທດ ສ.ອາເມຣິກາ ທີ່ທຳນຽບໃນນະຄອນຫຼວງໄທເປ ແຕ່ໄດ້ກ່າວຢືນຢັນວ່າຈະເສີມສ້າງສາຍພົວພັນກັບລັດຖະບານ ສ.ອາເມຣິກາໃນທຸກດ້ານ.

ພາບ: ທ່ານ ນາງ ໄຊ້ ວິງ-ເຫວິນ ຜູ້ນຳໄຕ້ຫວັນ (ກາງ) ໃຫ້ການຕ້ອນຮັບທ່ານ ຄີດ ຄຣາສ ເຈົ້າໜ້າທີ່ລະດັບສູງດ້ານເສດຖະກິດ ຂອງກະຊວງການຕ່າງປະເທດ ສ.ອາເມຣິກາ (ຊ້າຍ).

HTML tutorial