ທາງການ ສ.ອາເມຣິກາ ເລັ່ງນຳຫາຜູ້ສົ່ງຈົດໝາຍບັນຈຸ “ສານພິດ” ເຖິງ ປ.ທຣຳ

ລາຍງານ 20 ກັນຍາ 2020, ສຳນັກງານສືບສວນສອບສວນກາງ (FBI) ອອກຖະແຫຼງການເມື່ອວັນເສົາ (19 ກັນຍາ) ທີ່ຜ່ານມາ ວ່າເຈົ້າໜ້າທີ່ກຳລັງແກະຮອຍຫາທີ່ມາຂອງຈົດໝາຍບັນຈຸສານໄຣຊິນ (Ricin) ທີ່ຈ່າໜ້າຊອງເຖິງທ່ານ ໂດໂນ ທຣຳ ປະທານປະເທດ ສ.ອາເມຣິກາ, ເຖິງຢ່າງໃດກໍ່ຕາມ ເຈົ້າໜ້າທີ່ຝ່າຍຄັດແຍກຈົດໝາຍ ແລະ ພັດສະດຸຂອງທຳນຽບຂາວກວດພົບກ່ອນ ແລະ ນຳຊອງຕ້ອງສົງໄສອອກມາໄດ້ທັນເວລາ ເມື່ອຕົ້ນອາທິດທີ່ຜ່ານມາ.

ເຊິ່ງຍັງບໍ່ມີການຢືນຢັນວ່າຈົດໝາຍສະບັບດັ່ງກ່າວ ສົ່ງຕາມລະບົບໄປສະນີຂອງ ສ.ອາເມຣິກາ ຫຼື ຜູ້ບໍ່ຫວັງດີລັກລອບນຳຈົດໝາຍເຂົ້າມາປົນເປກາງທາງ.

ໃນດ້ານຂອງ The New York Times ລາຍງານວ່າ ຈົດໝາຍຖືກສົ່ງມາຈາກການາດາ, ຂະນະທີ່ສຳນັກງານຕຳຫຼວດແຫ່ງຊາດການາດາ ຍັງບໍ່ຢືນຢັນ ຫຼື ປະຕິເສດ ແຕ່ໃຫ້ຂໍ້ມູນວ່າໄດ້ຮັບການປະສານງານຈາກ FBI ກ່ຽວກັບຈົດໝາຍບັນຈຸສານໄຣຊິນ ທີ່ມີການກວດພົບກ່ອນເຖິງມືຜູ້ນຳ ສ.ອາເມຣິກາ.

ໃນດ້ານຂອງທຳນຽບຂາວ ຍັງບໍ່ສະແດງຈຸດຢືນຢ່າງເປັນທາງການຕໍ່ເຫດການນີ້, ເຊິ່ງນີ້ບໍ່ແມ່ນຄັ້ງທຳອິດ ຫວນຄືນໄປເມື່ອເດືອນຕຸລາ 2018 ເຈົ້າໜ້າທີ່ຝ່າຍຄວາມໝັ້ນຄົງຂອງ ສ.ອາເມຣິກາໄດ້ຈັບກຸມອະດີດທະຫານເຮືອຄົນໜຶ່ຶງ ຖານສົ່ງຈົດໝາຍທີ່ມີສານພິດໄຣຊິນໄປຍັງທຳນຽບຂາວ ໂດຍຈ່າໜ້າເຖິງທ່ານ ໂດໂນ ທຣຳ ແລະ ເຈົ້າໜ້າທີ່ລະດັບສູງຂອງກະຊວງປ້ອງກັນປະເທດ ສ.ອາເມຣິກາໃນເວລານັ້ນ.

ສຳລັບສານໄຣຊິນ ຖືເປັນອາວຸດຊີວະພາບຊະນິດໜຶ່ງ ເປັນສານພິດປະເພດໂປຣຕີນທີ່ສະກັດໄດ້ຈາກແກ່ນໝາກຫຸ່ງສາ ມີລິດຮ້າຍແຮງກວ່າພິດຂອງງູເຫົ່າເຖິງ 2 ເທົ່າ ແລະ ອັນຕະລາຍກວ່າສານໄຊຢາໄນເຖິງ 6,000 ເທົ່າ ສາມາດເຂົ້າສູ່ຮ່າງກາຍໄດ້ຜ່ານທັງທາງການສຳຜັດ, ສູດດົມ ແລະ ການກິນ ເຊິ່ງອາດສົ່ງຜົນໃຫ້ເສຍຊີວິດໄດ້ພາຍໃນບໍ່ພໍເທົ່າໃດນາທີ.

HTML tutorial