ສ.ອາເມຣິກາບໍ່ສົນໃຈມະຕິ UN ເດີນໜ້າຂວ້ຳບາດອີຣານຝ່າຍດຽວ ພ້ອມນາບຂູ່ເອົາການຮ່ວມມື

ລາຍງານ 20 ກັນຍາ 2020, ລັດຖະບານ ສ.ອາເມຣິກາເຜີຍແຜ່ຖະແຫຼງການຂອງທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ວ່າກົນໄກການຂວ້ຳບາດອີຣານຕາມແນວທາງຂອງສະພາຄວາມໝັ້ນຄົງແຫ່ງສະຫະປະຊາຊາດ (UNSC) ທີ່ຮຽກວ່າ “Snapback” ກັບມາມີຜົນບັງຄັບໃຊ້ຢ່າງເປັນທາງການແລ້ວ ຕັ້ງແຕ່ເວລາ 20:00 ໂມງ ຕາມເວລາທ້ອງຖິ່ນ ໃນນະຄອນຫຼວງວໍຊິງຕັນ ເມື່ອວັນເສົາ ທີ່ຜ່ານມາ (07:00 ໂມງ ວັນອາທິດ ຕາມເວລາໃນປະເທດລາວ).

ຂະນະດຽວກັນ, ທ່ານ ໄມ ພອມແພວ ໄດ້ເຕືອນວ່າ ສ.ອາເມຣິກາຈະດຳເນີນການກັບສະມາຊິກ UN ທຸກປະເທດທີ່ບໍ່ປະຕິບັດຕາມມາດຕະການດັ່ງກ່າວ.

ເຊິ່ງເມື່ອວັນທີ 20​ ສິງຫາ ທີ່ຜ່ານມາ, ລັດຖະມົນຕີກະຊວງການຕ່າງປະເທດ ສ.ອາເມຣິກາໄດ້ເດີນທາງໄປຍັງສຳນັກງານໃຫຍ່ UN ທີ່ນະຄອນນິວຢອກດ້ວຍຕົນເອງ ເພື່ອຍື່ນໜັງສືຕໍ່ທ່ານ ອັນໂດນິໂອ ກູເຕເຣສ ເລຂາທິການໃຫຍ່ UN ແລະ ສຳນັກງານຄະນະຜູ້ແທນຖາວອນອິນໂດເນເຊຍ ປະຈຳ UN ທີ່ເຮັດໜ້າທີ່ເປັນປະທານ UNSC ປະຈຳເດືອນສິງຫາ ຂໍໃຫ້ມີການຟື້ນຟູມາດຕະການ Snapback ພາຍໃນ 30 ວັນ ເຊິ່ງລວມເຖິງການຕໍ່ເວລາມາດຕະການປິດລ້ອມດ້ານອາວຸດຕໍ່ອີຣານ ທີ່ຈະໝົດອາຍຸ ໃນວັນທີ 18 ຕຸລານີ້.

ເຖິງຢ່າງໃດກໍ່ຕາມ, ສະມາຊິກ UNSC ຈຳນວນ 13 ປະເທດ ຈາກທັງໝົດ 15 ປະເທດຄັດຄ້ານຢ່າງໜັກ ໂດຍໃຫ້ເຫດຜົນວ່າ ສ.ອາເມຣິກາໃຊ້ກົນໄກຈາກຂໍ້ຕົກລົງນິວເຄຼຍ ສະບັບປີ 2015 ເຊິ່ງລັດຖະບານ ສ.ອາເມຣິກາໄດ້ຖອນຕົວອອກໄປແລ້ວໃນປີ 2018 ແຕ່ທ່ານ ໄມ ພອມແພວ ຢືນຢັນຄວາມຊອບທຳ ໃນຖານະໜຶ່ງໃນສະມາຊິກຖາວອນຂອງ UNSC.

ຂະນະທີ່ອັງກິດ, ຝຣັ່ງ ແລະ ເຢຍລະມັນ ຢືນຢັນວ່າມາດຕະການຜ່ອນຜັນອີຣານຈາກການຂວ້ຳບາດ ຈະເດີນໜ້າຕໍ່ໄປ ການເຄື່ອນໄຫວຂອງ ສ.ອາເມຣິກາ ບໍ່ມີຜົນທາງກົດໝາຍ, ສ່ວນລັດເຊຍກ່າວວ່າ ສະມາຊິກ UNSC ມີມະຕິຊັດເຈນແລ້ວຕໍ່ກັບບັນຫາດັ່ງກ່າວນີ້ ສ.ອາເມຣິກາ ຄົງຫູໜວກ.

HTML tutorial