ລັດເຊຍບໍ່ຍອມຮັບເງື່ອນໄຂຂອງ ສ.ອາເມຣິກາ ໃນການຕໍ່ສັນຍານິວເຄຼຍສອງຝ່າຍ

ລາຍງານ 21 ກັນຍາ 2020, ທ່ານ ເຊີເກ ຣິບຄັອບ ຮອງລັດຖະມົນຕີກະຊວງການຕ່າງປະເທດລັດເຊຍ ໃນຖານະຫົວໜ້າຄະນະຜູ້ແທນເຈລະຈາເລື່ອງນິວເຄຼຍກັບລັດຖະບານ ສ.ອາເມຣິກາ ກ່າວໃນວັນຈັນນີ້ ກ່ຽວກັບສົນທິສັນຍາສັນຕິພາບສອງຝ່າຍ ວ່າດ້ວຍການຫຼຸດຈຳນວນອາວຸດນິວເຄຼຍ ທີ່ຮຽກໂດຍຫຍໍ້ວ່າ “New START” ເຊິ່ງສົນທິສັນຍາດັ່ງກ່າວເລີ່ມມີຜົນມາຕັ້ງແຕ່ເມື່ອເດືອນກຸມພາ 2011 ແລະ ຈະໝົດອາຍຸໃນເດືອນກຸມພາ ປີໜ້າ ມີເນື້ອໃນສຳຄັນຄືການຈຳກັດການຄອບຄອງຫົວຮົບນິວເຄຼຍທາງຍຸດທະສາດຂອງທັງສອງປະເທດ ໃຫ້ມີບໍ່ເກີນ 1,550​ ລູກ ວ່າໂອກາດໃນການຕໍ່ສັນຍານັ້ນ ມີໜ້ອຍຫຼາຍ.

ເຊິ່ງທ່ານ ເຊີເກ ຣິບຄັອບ ອະທິບາຍວ່າ ຄວາມຕ້ອງການຂອງ ສ.ອາເມຣິກາໄດ້ບັ່ນທອນຈຸດຢືນຂອງລັດເຊຍ ໂດຍສະເພາະການທີ່ຈີນຈະເຂົ້າຮ່ວມການເຈລະຈາ ຫຼື ບໍ່ໃນອະນາຄົດຂຶ້ນຢູ່ກັບການຕັດສິນໃຂອງລັດຖະບານຈີນເອງເທົ່ານັ້ນ.

ຂະນະທີ່ທ່ານ ມາຊໍ ບິວລິງສະເລອາ ຫົວໜ້າຄະນະຜູ້ແທນເຈລະຈາຂອງ ສ.ອາເມຣິກາ ກ່າວວ່າລັດຖະບານລັດເຊຍຕ້ອງຍອມຮັບເງື່ອນໄຂທັງໝົດຂອງລັດຖະບານ ສ.ອາເມຣິກາ ກ່ອນເຖິງວັນເລືອກຕັ້ງປະທານປະເທດ ສ.ອາເມຣິກາ 3 ພະຈິກນີ້.

ປັດຈຸບັນລັດເຊຍ ແລະ ສ.ອາເມຣິກາຄອບຄອງຫົວຮົບນິວເຄຼຍຫຼາຍທີ່ສຸດເປັນອັນດັບ 1 ແລະ 2 ຂອງໂລກຕາມລຳດັບ ໂດຍປະລິມານຫົວຮົບນິວເຄຼຍທີ່ທັງສອງປະເທດມີຢູ່ນັ້ນ ລວມກັນກວມເອົາຫຼາຍກວ່າ 90% ຂອງຫົວຮົບນິວເຄຼຍທີ່ມີທັງໝົດໃນໂລກນີ້ ເຊິ່ງຫາກທັງສອງປະເທດບໍ່ສາມາດຕໍ່ສັນຍາ New START ທີ່ຖືເປັນຂໍ້ຕົກລົງກ່ຽວກັບນິວເຄຼຍສະບັບສຸດທ້າຍ ຫຼື ສ້າງຂໍ້ຕົກລົງສະບັບໃໝ່ທົດແທນບໍ່ໄດ້ ໄດ້ສ້າງຄວາມເປັນຫ່ວງໃຫ້ກັບຫຼາຍຝ່າຍວ່າ ຈະເຮັດໃຫ້ເກີດການແຂ່ງຂັນດ້ານອາວຸດລະຫວ່າງສອງມະຫາອຳນາດຍິ່ງທະວີຄວາມຮຸນແຮງຂຶ້ນ.

HTML tutorial