ກອງປະຊຸມໃຫຍ່ UN ຄັ້ງທີ 75 ເປີດສາກຂຶ້ນທ່າມກາງວິກິດການຂອງໂລກ

ລາຍງານ 22 ກັນຍາ 2020, ທ່ານ ອັນໂຕນິໂອ ກູເຕເຣສ ເລຂາທິການອົງການສະຫະປະຊາຊາດ (UN) ກ່າວຖະແຫຼງເປີດກອງປະຊຸມສະມັດຊາໃຫຍ່ສະຫະປະຊາຊາດ ເມື່ອວັນຈັນ (21 ກັນຍາ) ທີ່ຜ່ານມາ ເຊິ່ງປີນີ້ກົງກັບວາລະສຳຄັນຄື ຄົບຮອບ 75 ປີແຫ່ງການສ້າງຕັ້ງອົງການສະຫະປະຊາຊາດ ມີເນື້ອໃນສຳຄັນຄື ທ່າມກາງບັນຍາກາດຂອງການແບ່ງຝ່າຍທີ່ຊັດເຈນຍິ່ງຂຶ້ນ ຜູ້ນຳໂລກຍິ່ງຕ້ອງເພີ່ມຄວາມເປັນເອກະພາບ ເພື່ອຊຸກດັນກົນໄກພື້ນຖານໃຫ້ເດີນໜ້າຕໍ່ໄປດ້ວຍດີ.

ເຊິ່ງເລຂາທິການ UN ເນັ້ນໜັກຮຽກຮ້ອງການຮ່ວມມືຟື້ນຟູກົນໄກຫຼາຍຝ່າຍ ເຊິ່ງເປັນສິ່ງທີ່ບັນດາປະເທດຂະໜາດນ້ອຍຮ່ວມກັນຊຸກດັນມາໂດຍຕະຫຼອດ ແລະ ກ່າວເຖິງບົດບາດສຳຄັນຂອງ UN ທີ່ປະສົບຄວາມສຳເລັດຫຼາຍທີ່ສຸດຕະຫຼອດໄລຍະເວລາ 75 ປີທີ່ຜ່ານມາ ໂດຍສະເພາະການປ້ອງກັນການເກີດສົງຄາມລະຫວ່າງຊາດມະຫາອຳນາດ ແລະ ການຂໍໃຫ້ທຸກຝ່າຍຮ່ວມກັນຕໍ່ສູ້ກັບວິກິດຄວາມທຸກຍາກ ເພື່ອໃຫ້ບັນລຸເປົ້າໝາຍການພັດທະນາແບບຍືນຍົງ ຫຼື SDG ເຊິ່ງເປັນວິໄສທັດ 15 ປີ ຈົນເຖິງປີ 2030.

ເຖິງຈະເປັນວາລະສຳຄັນຂອງ UN ແຕ່ດ້ວຍວິກິດການແຜ່ລະບາດຂອງພະຍາດໂຄວິດ-19 ສົ່ງຜົນໃຫ້ການປະຊຸມຄັ້ງນີ້ຕ້ອງຈັດຜ່ານລະບົບວິດີໂອເປັນຫຼັກ ຜູ້ນຳໂລກສ່ວນໃຫຍ່ບັນທຶກການກ່າວຖະແຫຼງຂອງຕົນເອງໄວ້ລ່ວງໜ້າ ໂດຍຕາມລາຍຊື່ຂອງ UN ມີທັງໝົດ 182 ຄົນໃນປີນີ້ ແລະ ເປີດຕາມລຳດັບ ລວມເຖິງທ່ານ ໂດໂນ ທຣຳ ປະທານປະເທດ ສ.ອາເມຣິກາ ເຊິ່ງຢູ່ໃນລະດັບທີໜຶ່ງ ແຕ່ຜູ້ນຳ ສ.ອາເມຣິກາ ບໍ່ໄດ້ສົ່ງວິດີໂອມາ.

ໃນດ້ານຂອງທ່ານ ສີ ຈິ້ນຜິງ ປະທານປະເທດຈີນ ສົ່ງຄຳກ່າວຖະແຫຼງແບບເປັນວິດີໂອ ແລະ ເປັນລາຍລັກອັກສອນ ມີເນື້ອໃນສຳຄັນຕອນໜຶ່ງວ່າ ລັດຖະບານຈີນ ພ້ອມໃຫ້ການຮ່ວມມືກັບປະຊາຄົມໂລກຕໍ່ການປະຕິຮູບທຸກດ້ານ ບົນພື້ນຖານຂອງຄວາມເທົ່າທຽມ, ເຖິງຢ່າງໃດກໍ່ຕາມ ວຽກງານຕ່າງໆໃນໂລກບໍ່ໄດ້ຢູ່ພາຍໃຕ້ການຄວບຄຸມ ແລະ ສັ່ງການໂດຍປະເທດໃດປະເທດໜຶ່ງ ຫຼື ສະແຫວງຫາຜົນປະໂຫຍດສ່ວນຕົວໂດຍໃຊ້ວິທີທີ່ບໍ່ເປັນທຳ.

ພາບ: ທ່ານ ທອງລຸນ ສີສຸລິດ ນາຍົກລັດຖະມົນຕີ ຖະແຫຼງແບບວິດີໂອ ຕໍ່ UN, 21 ກັນຍາ 2020.

ໃນດ້ານຂອງ ສປປ.ລາວ ເຮົາ, ທ່ານ ທອງລຸນ ສີສຸລິດ ນາຍົກລັດຖະມົນຕີ ກໍ່ໄດ້ສົ່ງສານສະແດງຄວາມຊົມເຊີນ ເນື່ອງໃນໂອກາດຄົບຮອບ 75 ປີ UN, ພ້ອມທັງກ່າວວ່າ ສປປ.ລາວ ພ້ອມທີ່ຈະຮ່ວມກັບບັນດາປະເທດສະມາຊິກ ປະກອບສ່ວນຢ່າງຕັ້ງໜ້າ ເພື່ອເຮັດໃຫ້ UN ມີຄວາມເຂັ້ມແຂງ, ສາມາດປະຕິບັດໜ້າທີ່ຂອງຕົນໃຫ້ມີປະສິດທິພາບສູງ ແນ່ໃສ່ເຮັດໃຫ້ສັນຕິພາບມີຄວາມຍືນຍົງ, ເສດຖະກິດ-ສັງຄົມຂອງບັນດາປະຊາຊາດໄດ້ຮັບການພັດທະນາ ແລະ ສີວິໄລຮຸ່ງເຮືອງ.

UN ສ້າງຕັ້ງຂື້ນໃນວັນທີ 24 ຕຸລາ 1945 ຈຸດປະສົງແມ່ນເພື່ອປົກປັກຮັກສາສັນຕິພາບ ແລະ ຄວາມໝັ້ນຄົງຂອງໂລກ, ພັດທະນາສາຍພົວພັນມິດຕະພາບ ບົນພື້ນຖານຫຼັກການເຄົາລົບອະທິປະໄຕເຊິ່ງກັນ ແລະ ກັນ, ສິດສະເໝີພາບ ແລະ ການຮ່ວມມືສາກົນໃນການແກ້ໄຂບັນຫາຕ່າງໆຂອງສາກົນໃນດ້ານເສດຖະກິດ, ສັງຄົມ ແລະ ວັດທະນະທຳ.

ປັດຈຸບັນອົງການ UN ມີສະມາຊິກທັງໝົດຈຳນວນ 193 ປະເທດ ແລະ 2 ລັດສັງເກດການ (ລັດວາຕີກັງ ແລະ ລັດປາເລສຕີນ), ມີສຳນັກງານໃຫ່ຍຕັ້ງຢູ່ ນິວຢອກ ສ.ອາເມລິກາ ແລະ ມີພາສາທີ່ໃຊ້ເປັນທາງການ 6 ພາສາຄື: ອັງກິດ, ຝລັ່ງ, ຈີນ, ລັດເຊຍ, ອາຣັບ ແລະ ແອດສະປາຍໂຍນ. ສຳລັບ ສປປ.ລາວ ໄດ້ເຂົ້າເປັນສະມາຊິກອົງການດັ່ງກ່າວໃນວັນທີ 14 ທັນວາ 1955.

HTML tutorial