ປ.ປູຕິນ ກ່າວວ່າມາດຕະການຂວ້ຳບາດຝ່າຍດຽວຂອງບາງປະເທດ ເຮັດໃຫ້ໂລກຟື້ນຈາກໂຄວິດຊ້າ

ລາຍງານ 23 ກັນຍາ 2020, ກອງປະຊຸມສະມັດຊາໃຫຍ່ອົງການສະຫະປະຊາຊາດ (UNGA) ເຜີຍແຜ່ວິດີໂອບັນທຶກການກ່າວຖະແຫຼງຂອງທ່ານ ວະລາດິເມຍ ປູຕິນ ປະທານປະເທດລັດເຊຍ ເມື່ອວັນອັງຄານ (22 ກັນຍາ) ທີ່ຜ່ານມາ ເນື່ອງໃນໂອກາດກອງປະຊຸມສະມັດຊາໃຫຍ່ອົງການສະຫະປະຊາຊາດ ຄັ້ງທີ 75 ມີເນື້ອໃນຕອນໜຶ່ງກ່ຽວກັບວິກິດການແຜ່ລະບາດຂອງພະຍາດໂຄວິດ-19 ວ່າເປັນໄພຄຸກຄາມດ້ານສາທາລະນະສຸກທີ່ໄຮ້ພົມແດນ, ຄວາມເປັນເອກະພາບ ແລະ ການຍົກລະດັບການຮ່ວມມືລະຫວ່າງນານາປະເທດໃນເລື່ອງນີ້ຈຶ່ງເປັນສິ່ງທີ່ສຳຄັນ ໂດຍບໍ່ຄວນມີກຳແພງ.

ພາບ: ທ່ານ ວະລາດິເມຍ ປູຕິນ ປະທານປະເທດລັດເຊຍ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ສະຫະປະຊາຊາດ ຄັ້ງທີ 75, 22 ກັນຍາ 2020.

ເຊິ່ງຜູ້ນຳລັດເຊຍກ່າວວ່າ ລັດຖະບານລັດເຊຍໃຫ້ຄວາມນັບຖືຕໍ່ບົດບາດຂອງອົງການອະນາໄມໂລກ (WHO) ໃນການເປັນສູນກາງປະສານງານດ້ານສາທາລະນະສຸກລະຫວ່າງປະເທດ ແຕ່ທ່າມກາງສະພາບການຂອງໂລກທີ່ປ່ຽນແປງຕາມຍຸກສະໄໝ ການປະຕິຮູບອົງກອນຈຶ່ງມີຄວາມສຳຄັນເຊັ່ນກັນ.

ຂະນະດຽວກັນ, ລັດເຊຍມຸ່ງໝັ້ນມີສ່ວນຮ່ວມກັບທຸກພາກສ່ວນ ເພື່ອສົ່ງເສີມມາດຕະການຕອບສະໜອງທີ່ມີປະສິດທິພາບຕໍ່ພະຍາດໂຄວິດ-19 ໂດຍຍິນດີ ແລະ ເປີດກວ້າງການເປັນຮຸ້ນສ່ວນກັບທຸກປະເທດຕໍ່ໂຄງການ “Sputnik V” ທີ່ຖືເປັນວັກແຊັງອັນທຳອິດຂອງໂລກ ເຊິ່ງສາມາດຕ້ານທານເຊື້ອຈຸລະໂລກໂຄໂຣນາສາຍພັນໃໝ່, ວັກແຊັງນີ້ພັດທະນາໂດຍສູນວິໄຈກາມາເລຢາ ສູນລວມຜູ້ຊ່ຽວຊານດ້ານລະບາດວິທະຍາ ແລະ ຈຸລະຊີວະວິທະຍາຂອງລັດເຊຍ.

ນອກຈາກນີ້, ທ່ານ ປູຕິນ ຍັງກ່າວເຖິງກຳແພງການຄ້າ, ມາດຕະການຈຳກັດຕ່າງໆນາໆ ແລະ ມາດຕະການຂວ້ຳບາດຝ່າຍດຽວ ເຊິ່ງຍັງເກີດຂຶ້ນຢ່າງຕໍ່ເນື່ອງ ເຖິງແມ່ນວ່າທຸກຝ່າຍຮັບຮູ້ດີວ່າເປັນນະໂຍບາຍທີ່ຜິດກົດໝາຍ ວ່າຫາກບໍ່ມີອຸປະສັກດັ່ງກ່າວ ທົ່ວໂລກທີ່ກຳລັງປະເຊີນກັບຄວາມເດືອດຮ້ອນຢ່າງໜັກກັບວິກິດໂລກລະບາດ ຈະກັບມາຟື້ນຕົວ ແລະ ເດີນໜ້າຕໍ່ໄປໄດ້ໄວກວ່າທີ່ເປັນຢູ່.

HTML tutorial