ປ.ທຣຳ ກ່າວຕໍ່ UN ວ່າຈີນຕ້ອງຮັບຜິດຊອບຕໍ່ກັບການແຜ່ລະບາດໄປທົ່ວໂລກຂອງໂຄວິດ-19

ລາຍງານ 23 ກັນຍາ 2020, ກອງປະຊຸມສະມັດຊາໃຫຍ່ອົງການສະຫະປະຊາຊາດ ເຜີຍແຜ່ວິດີໂອບັນທຶການກ່າວຖະແຫຼງຂອງທ່ານ ໂດໂນ ທຣຳ ປະທານປະເທດ ສ.ອາເມຣິກາ ເມື່ອວັນອັງຄານ (22 ກັນຍາ) ທີ່ຜ່ານມາ ເນື່ອງໃນວາລະກອງປະຊຸມສະມັດຊາໃຫຍ່ ຄັ້ງທີ 75 ໂດຍຜູ້ນຳ ສ.ອາເມຣິກາ ໃຊ້ເວລາເກືອບທັງໝົດວິຈານການປະຕິບັດໜ້າທີ່ຂອງອົງການອະນາໄມໂລກ (WHO) ວ່າເປັນໜ່ວຍງານທີ່ຢູ່ພາຍໃຕ້ການຄວບຄຸມຂອງຈີນ, ລົ້ມແຫຼວໃນການເປັນຜູ້ນຳເພື່ອແກ້ໄຂວິກິດການແຜ່ລະບາດຂອງພະຍາດໂຄວິດ-19.

ພາບ: ທ່ານ ໂດໂນ ທຣຳ ປະທານປະເທດ ສ.ອາເມຣິກາ ຖະແຫຼງຕໍ່ກອງປະຊຸມສະມັດຊາໃຫຍ່ອົງການສະຫະປະຊາຊາດ, 22​ ກັນຍາ 2020.

ເຊິ່ງທ່ານ ໂດໂນ ທຣຳ ກ່າວວ່າເລື່ອງນີ້ ເລີ່ມຈາກຄວາມຜິດພາດໃນການໃຫ້ຂໍ້ມູນ ວ່າພະຍາດດັ່ງກ່າວບໍ່ຕິດຕໍ່ ແລະ ແຜ່ກະຈາຍລະຫວ່າງຄົນສູ່ຄົນ, ຕໍ່ດ້ວຍການບອກວ່າຜູ້ຕິດເຊື້ອແຕ່ບໍ່ມີອາການ ບໍ່ສາມາດແຜ່ເຊື່ອໃຫ້ບຸກຄົນຮອບຂ້າງໄດ້ ແຕ່ປາກົດວ່າເປັນຂໍ້ມູນທີ່ຜິດພາດຢ່າງຮ້າຍແຮງ, ຂະນະດຽວກັນ WHO ຍັງຊ່ວຍເຫຼືອລັດຖະບານຈີນປົກປິດຂໍ້ມູນກ່ຽວກັບເຊື້ອພະຍາດດັ່ງກ່າວ ແລະ ຮຽກຮ້ອງທ່ານ ອັນໂຕນິໂອ ກູເຕເຣສ ເລຂາທິການອົງການສະຫະປະຊາຊາດດຳເນີນການໃຫ້ຈີນຕ້ອງຮັບຜິດຊອບກັບສິ່ງທີ່ເກີດຂຶ້ນ.

ຂະນະດຽວກັນ, ຜູ້ນຳ ສ.ອາເມຣິກາຢືນຢັນການຖອນຕົວອອກຈາກການເປັນສະມາຊິກ WHO, ເຖິງແມ່ນວ່າທ່ານ ໂຈ ໄບເດນ ຄູ່ແຂ່ງໃນການເລືອກຕັ້ງຊິງຕຳແໜ່ງປະທານປະເທດ ສ.ອາເມຣິກາ ໃນເດືອນພະຈິກ ທີ່ຈະມາເຖິງນີ້ ປະກາດຈະນຳ ສ.ອາເມຣິກາ ສະໝັກກັບເຂົ້າເປັນສະມາຊິກ ຫາກຊະນະການເລືອກຕັ້ງ, ນອກຈາກນີ້ ທ່ານ ໂດໂນ ທຣຳ ກ່າວວ່າ ສ.ອາເມຣິກາຈະເປັນຜູ້ນຳໃນການແຈກຢາຍວັກແຊັງ ແລະ ເອົາຊະນະການແຜ່ລະບາດໃຫຍ່ຂອງພະຍາດໂຄວິດ-19 ທີ່ຜູ້ນຳ ສ.ອາເມຣິກາຍັງຄົງຮຽກວ່າ “ເຊື້ອຈຸລະໂລກຈີນ ຫຼື ໄວຣັສຈີນ”

ຕໍ່ມາທ່ານ ຈາງ ຈຸນ ເອກອັກຄະລັດຖະທູດຈີນ ປະຈຳ UN ກ່າວເຖິງການກ່າວຖະແຫຼງຂອງຜູ້ນຳ ສ.ອາເມຣິກາ ວ່າມີຄວາມຂັດແຍ່ງຕໍ່ກັບສະຖານະການທີ່ທົ່ວໂລກກຳລັງປະເຊີນ ເພາະລັດຖະບານ ສ.ອາເມຣິກາ ມີແຕ່ເດີນໜ້າແຜ່ກະຈາຍໄວຣັສທາງການເມືອງ ເຂົ້າສູ່ບັນຍາກາດຂອງ UN.

ເຊິ່ງກອງປະຊຸມສະມັດຊາໃຫຍ່ UN ຮັບຟັງການຖະແຫຼງຂອງທ່ານ ໂດໂນ ທຣຳ ໃນເວລາດຽວກັນກັບທີ່ສູນຂໍ້ມູນໂລກຕິດເຊື້ອຈາກໄວຣັສໂຄໂຣນາຂອງ ມະຫາວິທະຍາຈອນ ຮັອບກິນ ຢືນຢັນຜູ້ເສຍຊີວິດຈາກໂຄວິດ-19 ໃນ ສ.ອາເມຣິກາ ຜ່ານຫຼັກ 200,000 ຄົນ ຢ່າງເປັນທາງການ ຈາກຈຳນວນຜູ້ຕິດເຊື້ອສະສົມຫຼາຍກວ່າ 6.8 ລ້ານຄົນ ແລະ ປິ່ນປົວດີແລ້ວປະມານ 2.6 ລ້ານຄົນ.

HTML tutorial