ຜູ້ນຳຝຣັ່ງ ກ່າວວ່າໜ້າເສົ້າສະຫຼົດໃຈ ໂລກຕ້ອງການການຮ່ວມມືສູ້ໂຄວິດ 2 ຊາດໃຫຍ່ຜັດປໍລະປັກກັນ

ລາຍງານ 23​ ກັນຍາ 2020, ກອງປະຊຸມສະມັດຊາໃຫຍ່ອົງການສະຫະປະຊາຊາດ (UNGA) ເຜີຍແຜ່ວິດີໂອບັນທຶການກ່າວຖະແຫຼງຂອງທ່ານ ເອມມານູເອວ ມາຄຼອງ ປະທານປະເທດຝຣັ່ງ ເມື່ອວັນອັງຄານ (22 ກັນຍາ) ທີ່ຜ່ານມາ ເນື່ອງໃນວາລະກອງປະຊຸມສະມັດຊາໃຫຍ່ ຄັ້ງທີ 75 ມີເນື້ອໃນຕອນໜຶ່ງວ່າ ວິກິດການແຜ່ລະບາດຂອງພະຍາດໂຄວິດ-19 ທີ່ທົ່ວໂລກກຳລັງປະສົບຢູ່ນັ້ນ ຄືສັນຍານເຕືອນສຳລັບ UN ແລະ ທຸກປະເທດ ໃຫ້ເພີ່ມການຮ່ວມມືເຊິ່ງກັນ ແລະ ກັນ.

ພາບ: ທ່ານ ເອມມານູເອວ ມາຄຼອງ ປະທານປະເທດຝຣັ່ງ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ອົງການສະຫະປະຊາຊາດ, 22 ກັນຍາ 2020.

ຈຶ່ງເປັນເຫດຜົນວ່າ ເພາະເຫດໃດໂລກຈຶ່ງຈຳເປັນຕ້ອງມີອົງກອນລະຫວ່າງປະເທດ ທີ່ເປັນຜູ້ປະສານງານ ເພື່ອໃຫ້ການຮ່ວມມືລະຫວ່າງປະເທດດຳເນີນໄປຢ່າງມີປະສິດທິພາບ ແລະ ລ່ຽນໄຫຼ ເຊິ່ງໃນສ່ວນຂອງວິກິດການແຜ່ລະບາດຂອງພະຍາດຄັ້ງນີ້ ກ່ຽວຂ້ອງໂດຍກົງກັບອົງການອະນາໄມໂລກ (WHO) ເຖິງແມ່ນວ່າບາງປະເທດຍັງຄົງກ່າວຫາໜ່ວຍງານແຫ່ງນີ້ ໃນຫຼາຍປະເດັນກໍ່ຕາມ.

ຂະນະດຽວກັນ, ຜູ້ນຳຝຣັ່ງກ່າວວ່າ ໂຄງສ້າງຂອງ UN ໃນພາບລວມ ໂດຍສະເພາະສະພາຄວາມໝັ້ນຄົງແຫ່ງສະຫະປະຊາຊາດ (UNSC) ຢູ່ໃນພາວະສ່ຽງທີ່ຈະເສື່ອມອຳນາດລົງເລື້ອຍໆ ບໍ່ພຽງແຕ່ສະເພາະບໍ່ອາດຮັບມືກັບວິກິດການແຜ່ລະບາດຂອງໂຄວິດ-19 ໄດ້ຢ່າງມີປະສິດທິພາບເທົ່ານັ້ນ ແຕ່ສະມາຊິກຖາວອນ 2 ປະເທດຜັດວາງຕົວເປັນປໍລະປົກຕໍ່ກັນຢ່າງຊັດເຈນ.

ເຊິ່ງທ່ານ ເອມມານູເອວ ມາຄຼອງ ກ່າວວ່າຜູ້ນຳໂລກບໍ່ຄວນປ່ອຍໃຫ້ຕົນເອງຖືກຄວບງຳ ແລະ ຢູ່ພາຍໃຕ້ອິດທິພົນຈາກການຊ່ວງຊິງກັນລະຫວ່າງ ສ.ອາເມຣິກາ ກັບ ຈີນ ເຊິ່ງເປັນສະພາບການທີ່ໜ້າສະຫຼົດໃຈ ເພາະທຸກປະເທດຕ່າງມີຄວາມສາມາດໃນຕົວ, ນອກນັ້ນ ຜູ້ນຳຝຣັ່ງ ກ່າວເຖິງການພັດທະນາ ເພື່ອສ້າງໂລກາພິວັດໃໝ່ ແລະ ການວາງຮາກຖານລະບຽບໂລກເພື່ອຮອງຮັບການຮ່ວມມືຫຼາຍຝ່າຍ (ພະຫຸພາຄີ) ອີກດ້ວຍ.

HTML tutorial