ຜູ້ນຳເວເນຊູເອລາ ປະນາມພຶດຕິກຳທີ່ເປັນໄພຮຸກຮານຢ່າງໄຮ້ມະນຸດສະທຳຂອງ ສ.ອາເມຣິກາ ຕໍ່ UN

ລາຍງານ 24 ກັນຍາ 2020, ກອງປະຊຸມສະມັດຊາໃຫຍ່ອົງການສະຫະປະຊາຊາດ (UNGA) ເຜີຍແຜ່ວິດີໂອການກ່າວຖະແຫຼງຂອງທ່ານ ນິໂຄລັສ ມາດູໂຣ ປະທານປະເທດເວເນຊູເອລາ ເມື່ອວັນພຸດ (23 ກັນຍາ) ທີ່ຜ່ານມາ ໂດຍເປັນວິດີໂອທີ່ມີຄວາມຍາວເກືອບ 40 ນາທີ ເນື້ອໃນສ່ວນໃຫຍ່ເປັນການປະນາມພຶດຕິກຳຮຸກຮານທີ່ເປັນອາຊະຍາກອນ ແລະ ປາສະຈາກມະນຸດສະທຳຂອງ ສ.ອາເມຣິກາ ທີ່ສະແດງຕົວຢ່າງຈະແຈ້ງແບບບໍ່ປິດບັງ ວ່າຕ້ອງການເຮັດທຸກຢ່າງເພື່ອໃຫ້ຕົນຫຼຸດພົ້ນຈາກຕຳແໜ່ງ.

ພາບ: ທ່ານ ນິໂຄລັສ ມາດູໂຣ ປະທານປະເທດເວເນຊູເອລາ, ກ່າວຖະແຫຼງຕໍ່ກອງປະຊຸມສະມັດຊາໃຫຍ່ອົງການສະຫະປະຊາຊາດ, 23 ກັນຍາ 2020.

ເຊິ່ງທ່ານ ນິໂຄລັສ ມາດູໂຣ ກ່າວວ່າກອງກຳລັງຂະໜາດໃຫຍ່ທີ່ສຸດໃນປະຫວັດສາດຂອງເວເນຊູເອລາ ພ້ອມເດັດດ່ຽວຕໍ່ສູ້ກັບການຮຸກຮານຄັ້ງນີ້ ດ້ວຍຊີວິດ ແລະ ດ້ວຍຄວາມມຸ່ງໝັ້ນ ຕະຫຼອດຮອດປະຕິບັດຕາມກົດໝາຍລະຫວ່າງປະເທດ, ຂະນະດຽວກັນຜູ້ນຳເວເນຊູເອລາຮຽກຮ້ອງທຸກປະເທດທີ່ປົກປ້ອງສັນຕິພາບ ຮ່ວມກັນສະແດງຈຸດຢືນຕໍ່ຕ້ານລັດຖະບານ ສ.ອາເມຣິກາ.

ເຖິງແມ່ນວ່າ UN ໃຫ້ການຍອມຮັບທ່ານ ນິໂຄລັສ ມາດູໂຣ ໃນຖານະຜູ້ນຳທີ່ຖືກຕ້ອງຕາມກົດໝາຍຂອງເວເນຊູເອລາ ແຕ່ ສ.ອາເມຣິກາ ທີ່ຕັ້ງລາງວັນນຳຈັບທ່ານ ນິໂຄລັສ ມາດູໂຣ 15 ລ້ານໂດລາ ໃນຂໍ້ຫາຄ້າຢາເສບຕິດ ແລະ ພັນທະມິດຮວມປະນາມ 50 ປະເທດ ຮັບຮອງເອົາທ່ານ ຮວນ ກວຍໂດ ຜູ້ນຳຝ່າຍຄ້ານ ເຊິ່ງທ່ານ ຮວນ ກວຍໂດ ມີວິດີໂອການຖະແຫຼງຕໍ່ຜູ້ແທນຂອງກຸ່ມປະເທດເຫຼົ່ານັ້ນດ້ວຍ ຮຽກຮ້ອງໃຫ້ລັດຖະບານ ສ.ອາເມຣິກາ ແລະ ບັນດາປະເທດທີ່ສະໜັບສະໜູນມີມາດຕະການເພື່ອຂັບໄລ່ທ່ານ ນິໂຄລັສ ມາດູໂຣ ອອກຈາກຕຳແໜ່ງ ແຕ່ບໍ່ໄດ້ລົງເລິກໃນລາຍລະອຽດ.

HTML tutorial