ປ.ຄິມ ສົ່ງຈົດໝາຍຂໍໂທດຜູ້ນຳ ແລະ ປະຊາຊົນເກົາຫຼີໃຕ້ ທີ່ຍິງພົນລະເມືອງເກົາຫຼີໃຕ້ເສຍຊີວິດ

ລາຍງານ 25 ກັນຍາ 2020, ທ່ານ ຊູ ຮຸນ ທີ່ປຶກສາດ້ານຄວາມໝັ້ນຄົງແຫ່ງຊາດເກົາຫຼີໃຕ້ ຖະແຫຼງວ່າ ທ່ານ ມູນ ແຈ-ອິນ ປະທານປະເທດເກົາຫຼີໃຕ້ ໄດ້ຮັບຈົດໝາຍຈາກທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ.

ເຊິ່ງທີ່ປຶກສາຂອງຜູ້ນຳເກົາຫຼີໃຕ້ອ່ານເນື້ອໃນສຳຄັນຂອງຈົດໝາຍວ່າ: ສະຫາຍຄິມ ຈອງ-ອຶນ ປະທານຄະນະກຳມາທິການແຫ່ງລັດເກົາຫຼີເໜືອ ຂໍອະໄພຢ່າງສູງ ແລະ ເສຍໃຈຢ່າງຍິ່ງ ທີ່ສ້າງຄວາມຜິດຫວັງຄັ້ງໃຫຍ່ໃຫ້ກັບທ່ານ ມູນ ແຈ-ອິນ ປະທານປະເທດເກົາຫຼີໃຕ້ ແລະ ປະຊາຊົນເກົາຫຼີໃຕ້ ຈາກເຫດການທີ່ເກີດຂຶ້ນໂດຍບໍ່ໄດ້ຄາດຝັນ ແລະ ຖືເປັນເຄາະຮ້າຍ.

ເນື້ອໃນຂອງຈົດໝາຍລະບຸອີກວ່າ: ທະຫານຂອງເກົາຫຼີເໜືອໄດ້ຍິງປືນທັງໝົດ 10 ນັດ ໃສ່ຊາຍຊາວເກົາຫຼີໃຕ້ ທີ່ລັກລອບເຂົ້າມາໃນເຂດນ່ານນ້ຳອະທິປະໄຕເກົາຫຼີເໜືອ ແລະ ປະຕິເສດສະແດງຕົວຕົນຕໍ່ເຈົ້າໜ້າທີ່ ເຊິ່ງຈຳເປັນຕ້ອງດຳເນີນການຕາມຂະບວນການ ແລະ ການຈູດສົບຜູ້ຕາຍໃນທັນທີນັ້ນ ເປັນໄປຕາມມາດຕະການຂອງຜູ້ບັນຄັບບັນຊາລະດັບສູງ ເພື່ອຫຼຸດຜ່ອນຄວາມສ່ຽງຂອງການຕິດເຊື້ອພະຍາດໂຄວິດ-19.

ຈົດໝາຍສະບັບນີ້ຖືເປັນການເຄື່ອນໄຫວ ທີ່ເກືອບວ່າບໍ່ເຄີຍເກີດຂຶ້ນມາກ່ອນຂອງຜູ້ນຳສູງສຸດເກົາຫຼີເໜືອ, ຂະນະທີ່ກະຊວງປ້ອງກັນປະເທດເກົາຫຼີໃຕ້ໃຫ້ຂໍ້ມູນວ່າ ຜູ້ເສຍຊີວິດເປັນເພດຊາຍ ອາຍຸ 47 ປີ ເປັນເຈົ້າໜ້າທີ່ຂອງກະຊວງສະໝຸດສາດ ແລະ ການປະມົງ ທີ່ໄດ້ຫາຍຕົວໄປພ້ອມເສື້ອຊູຊີບ ຈາກເຮືອກວດກາລາດຕະເວນ ລະຫວ່າງປະຕິບັດໜ້າທີ່ນອກຝັ່ງເກາະຢອນພະຢອງ ທາງພາກຕາເວັນຕົກຂອງປະເທດ ເມື່ອວັນຈັນທີ່ຜ່ານມາ, ເຊິ່ງໃນເບື້ອງຕົ້ນຝ່າຍຄວາມໝັ້ນຄົງຕັ້ງຂໍ້ສົມມຸດຕິຖານວ່າ ຊາຍຄົນດັ່ງກ່າວຕ້ອງການແປພັກ.

HTML tutorial