ສາມມະຫາອຳນາດຂອງໂລກ ປະທະທາງວາຈາຢ່າງດຸເດືອດກາງສະພາຄວາມໝັ້ນຄົງ UN

ລາຍງານ 25 ກັນຍາ 2020, ເອກອັກຄະລັດຖະທຸດຂອງ 15 ປະເທດສະມາຊິກສະພາຄວາມໝັ້ນຄົງແຫ່ງສະຫະປະຊາຊາດ (UNSC) ທີ່ປະຊຸມທາງໄກຜ່ານລະບົບວິດີໂອອອນລາຍ ເມື່ອວັນພະຫັດ (24 ກັນຍາ) ທີ່ຜ່ານມາ ໃຫ້ຫົວຂໍ້ “ການບໍລິຫານຈັດການໂລກ ຫຼັງໂຄວິດ-19” (Global governance after COVID-19).

ເຊິ່ງທ່ານ ຫວັງ ອີ ລັດຖະມົນຕີກະຊວງການຕ່າງປະເທດຈີນ ກ່າວເປັນຄົນທຳອິດ ເນັ້ນບົດບາດຂອງ UN ໃນການເປັນສູນກາງຂອງການຮ່ວມມືຫຼາຍຝ່າຍ ແລະ ຕຳນິບາງປະເທດທີ່ຍັງສະຫງວນການໃຫ້ວັກແຊັງປ້ອງກັນໂຄວິດ-19 ເປັນຜະລິດຕະພັນທີ່ທົ່ວໂລກສາມາດເຂົ້າເຖິງໄດ້ຢ່າງເທົ່າທຽມກັນ ແລະ ຮຽກຮ້ອງໃຫ້ຢຸດສົງຄາມເຢັນທາງຄວາມຄິດ.

ພາບ: ທ່ານ ເຊີເກ ລາວາຣົບ ລັດຖະມົນຕີກະຊວງການຕ່າງປະເທດລັດເຊຍ ໃນກອງປະຊຸມ UNSC, 24 ກັນຍາ 2020.

ຂະນະທີ່ທ່ານ ເຊີເກ ລາວາຣົບ ລັດຖະມົນຕີກະຊວງການຕ່າງປະເທດລັດເຊຍ ກ່າວວ່າວິກິດພະຍາດລະບາດເປັນຄວາມໂຊກຮ້າຍ ແຕ່ທີ່ຊົ່ວຮ້າຍໄປກວ່ານັ້ນ ຄືການທີ່ວິກິດດ້ານສາທາລະນະສຸກຄັ້ງນີ້ຜັດຍິ່ງສ້າງຄວາມແຕກແຍກລະຫວ່າງປະເທດ ໂດຍສະເພາະຢ່າງຍິ່ງການທີ່ບາງປະເທດຍັງອາໄສສະຖານະການດັ່ງກ່າວ ເດີນໜ້າສະແຫວງຫາຜົນປະໂຫຍດໃຫ້ກັບຕົນເອງ ເຖິງແມ່ນວ່າຕອນນີ້ຈະມີຊ່ອງທາງບໍ່ຫຼາຍ ເພາະພະຍາດລະບາດກາຍເປັນອຸປະສັກ ແຕ່ປະເທດນັ້ນກໍ່ບໍ່ຍອມຢຸດຕິຄວາມພະຍາຍາມປ່ຽນແປງໂຄງສ້າງຂອງພູມສາດການເມືອງໂລກ.

ໃນດ້ານຂອງທ່ານ ນາງ ເຄລີ ຄຣາບ ເອກອັກຄລະຖະທູດ ສ.ອາເມຣິກາ ປະຈຳ UN ກ່າວວ່າທ່ານ ໂດໂນ ທຣຳ ປະທານປະເທດ ສ.ອາເມຣິກາ ມີຄວາມຊັດເຈນດ້ານນະໂຍບາຍລະຫວ່າງປະເທດ ນັ້ນຄືການເຮັດໃນສິ່ງທີ່ຖືກຕ້ອງ ເຖິງແມ່ນວ່າຈະບໍ່ຖືກໃຈ, ຂະນະດຽວກັນ ທ່ານ ນາງ ເຄລີ ຄຣາບ ກ່າວເຖິງສະຖານະການການແຜ່ລະບາດຂອງໂຄວິດ-19 ວ່າພັກຄອມມູນິດຈີນ ຕ້ອງຮັບຜິດຊອບໃນຖານະເປັນຜູ້ແຜ່ເຊື້ອ ການກະທຳຂອງລັດຖະບານຈີນຕະຫຼອດໄລຍະເວລາທີ່ຜ່ານມາ ສະທ້ອນໃຫ້ເຫັນເຖິງຄວາມບໍ່ໂປ່ງໃສ ເຊິ່ງຂັດຕໍ່ພື້ນຖານຂອງການແກ້ໄຂວິກິດດ້ານສາທາລະນະສຸກໃນຄັ້ງນີ້.

ຫຼັງຈາກນັ້ນ, ທ່ານ ຈາງ ຈຸນ ເອກອັກຄະລັດຖະທູດຈີນ ປະຈຳ UN ກ່າວວ່າ ຕອນນີ້ ສ.ອາເມຣິກາ ມີຜູ້ຕິດເຊື້ອສະສົມ 7 ລ້ານຄົນ ແລະ ເສຍຊີວິດແລ້ວກວ່າ 200,000 ຄົນ ໃນຂະນະທີ່ຢືນຢັນວ່າເປັນປະເທດທີ່ຈະເລີນທີ່ສຸດໃນໂລກ ແລ້ວເຫດໃນຈຶ່ງເກີດການສູນເສຍຫຼາຍຂະໜາດນັ້ນ, ດັ່ງນັ້ນ ຫາກຕ້ອງມີຜູ້ຮັບຜິດຊອບ ຄວນເປັນບັນດານັກການເມືອງໃນ ສ.ອາເມຣິກາຫຼາຍກວ່າ ທີ່ເປັນມະຫາອຳນາແຕ່ຜັດວ່າງຕົວບໍ່ເໝາະສົມກັບຖານະ.

ເຖິງຢ່າງໃດກໍ່ຕາມ, ທ່ານ ອັນໂຕນິໂອ ກູເຕເຣສ ເລຂາທິການ UN ພະຍາຍາມຫຼຸດຜ່ອນບັນຍາກາດເຄັ່ງຕຶງໃນກອງປະຊຸມ ດ້ວຍການກ່າວວ່າ ວິກິດການແຜ່ລະບາດຂອງພະຍາດໃນຄັ້ງນີ້ ຍັງບໍ່ມີໃຜສາມາດຢຸດຢັ້ງໄດ້ ການຮ່ວມມືກັນລະຫວ່າງປະເທດຈຶ່ງເປັນສິ່ງທີ່ສຳຄັນທີ່ສຸດ.

HTML tutorial