ຜູ້ນຳຍີ່ປຸ່ນກ່າວວ່າ ຄວນປ່ຽນວິກິດໂຄວິດ-19 ເປັນໂອກາດສົ່ງເສີມການຮ່ວມມືລະຫວ່າງກັນ

ລາຍງານ 26 ກັນຍາ 2020, ກອງປະຊຸມສະມັດຊາໃຫຍ່ອົງການສະຫະປະຊາຊາດ (UNGA) ເຜີຍແຜ່ວິດີໂອບັນທຶກການກ່າວຖະແຫຼງຂອງທ່ານ ໂຢຊິຮິເດະ ຊຶກະ ນາຍົກລັດຖະມົນຕີຍີ່ປຸ່ນ ເມື່ອວັນສຸກ (25 ກັນຍາ) ທີ່ຜ່ານມາ ມີເນື້ອໃນຕອນໜຶ່ງກ່າວວ່າ ການແຜ່ລະບາດຂອງພະຍາດໂຄວິດ-19 ຖືເປັນວິກິດດ້ານຄວາມປອດໄພ ທີ່ຄຸກຄາມການດຳເນີນຊີວິດຂອງມະນຸດໃນທຸກດ້ານ, ເຖິງຢ່າງໃດກໍ່ຕາມ ປະຊາຄົມໂລກສາມາດປ່ຽນວິກິດຄັ້ງນີ້ ໃຫ້ກາຍເປັນໂອກາດຂອງການສົ່ງເສີມການຮ່ວມມືລະຫວ່າງກັນໄດ້.

ພາບ: ທ່ານ ໂຢຊິຮິເດະ ຊຶກະ ນາຍົກລັດຖະມົນຕີຍີ່ປຸ່ນ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ອົງການສະຫະປະຊາຊາດ, 25 ກັນຍາ 2020.

ເຊິ່ງໃນສ່ວນຂອງຍີ່ປຸ່ນນັ້ນ ທ່ານ ໂຢຊິຮິເດະ ຊຶກະ ກ່າວວ່າພ້ອມໃຫ້ການສະໜັບສະໜູນຢ່າງເຕັມທີ່ກັບໂຄງການພັດທະນາແນວທາງການປິ່ນປົວພະຍາດດັ່ງກ່າວ ຕະຫຼອດຮອດການຄິດຄົ້ນວັກແຊັງປ້ອງກັນ ແລະ ແນວທາງອື່ນທີ່ກ່ຽວຂ້ອງ ເພື່ອຊ່ວຍໃຫ້ການຕອບສະໜອງຕໍ່ພະຍາດນີ້ເປັນໄປຢ່າງມີປະສິດທິພາບ ແລະ ເພື່ອໃຫ້ທຸກຄົນໃນໂລກສາມາດເຂົ້າເຖິງຂະບວນການທັງໝົດໄດ້ຢ່າງເທົ່າທຽມ.

ຜູ້ນຳຍີ່ປຸ່ນກ່າວຕໍ່ອີກວ່າ ເຖິງຢ່າງໃດກໍ່ຕາມ ໂລກຕ້ອງກຽມພ້ອມຮັບມືກັບພະຍາດດຊະນິດໃໝ່ ທີ່ອາດເກີດຂຶ້ນອີກຫຼັງຈາກນີ້ ໂດຍລັດຖະບານຍີ່ປຸ່ນຈະຂະຫຍາຍການຮ່ວມມືໃນເລື່ອງນີ້ກັບກຸ່ມປະເທດກຳລັງພັດທະນາ ຍົກຕົວຢ່າງເຊັ່ນ ໂຄງການຮ່ວມມືກັບອາຊຽນ ເພື່ອຈັດຕັ້ງສູນປະຕິບັດງານຮ່ວມມືດ້ານສາທາລະນະສຸກ ແລະ ພະຍາດຕິດຕໍ່ທີ່ເກີດຂຶ້ນໃໝ່ລະດັບພູມມິພາກ, ການຮ່ວມມືດັ່ງກ່າວເປັນສ່ວນໜຶ່ງຂອງກອງທຶນສະໜັບສະໜູນສະຖານະການສຸກເສີນດ້ານສາທາລະນະສຸກລະຫວ່າງປະເທດມູນຄ່າ 4.5​ ພັນລ້ານໂດລາສະຫະລັດ.

ຂະນະດຽວກັນ, ທ່ານ ໂຢຊິຮິເດະ ຊຶກະ ຢືນຢັນຄວາມພ້ອມລະດັບສູງສຸດຂອງທຸກພາກສ່ວນໃນຍີ່ປຸ່ນ ສຳລັບການເປັນເຈົ້າພາບໂອແລັມປິກ “ໂຕກຽມເກມ” ທີ່ບໍ່ສາມາດເກີດຂຶ້ນໄດ້ຕາມກຳນົດການໃນປີນີ້ ເພາະການລະບາດຂອງໂຄວິດ-19 ໂດຍຜູ້ນຳຍີ່ປຸ່ນຢືນຢັນການໃຫ້ຄວາມສຳຄັນກັບຄວາມປອດໄພດ້ານສາທາລະນະສຸກກັບນັກກິລາ ແລະ ຄະນະນັກກິລາຂອງທຸກປະເທດ.

ນອກຈາກນີ້, ຜູ້ນຳຍີ່ປຸ່ນຍັງກ່າວເຖິງບັນຫາຄວາມໝັ້ນຄົງໃນພູມມິພາກ ໂດຍສະເພາະການຍິນດີພົບປະຫາລືໂດຍບໍ່ມີເງື່ອນໄຂລ່ວງໜ້າ ກັບທ່ານ ຄິມ ຈອງ-ອຶຶນ ຜູ້ນຳສູງສຸດຂອງເກົາຫຼີເໜືອ ເພື່ອເຈລະຈາເລື່ອງຄົນຍີ່ປຸ່ນທີ່ຖືກລັກພາຕົວໄປໃນເກົາຫຼີເໜືອ ໂດຍບັນຫານີ້ເປັນໜຶ່ງໃນເປົ້າໝາຍຂອງອະດີດນາຍົກລັດຖະມົນຕີຍີ່ປຸ່ນ ທ່ານ ຊິນໂຊ ອະເບະດ້ວຍ.

HTML tutorial