WHO ຄາດວ່າອາດຕາຍເຖິງ 2 ລ້ານຄົນຈາກໂຄວິດ, ສ່ວນຈີນ-ສ.ອາເມຣິກາຍັງບໍ່ຮ່ວມແຈກວັກແຊັງ

ລາຍງານ 26 ກັນຍາ 2020, ທ່ານ ໄມ ໄຣອັນ ປະທານໂຄງການສຸກເສີນດ້ານສາທາລະນະສຸກຂອງອົງການອະນາໄມໂລກ (WHO) ຖະແຫຼງເມື່ອວັນສຸກ (25 ກັນຍາ) ທີ່ຜ່ານມາ ກ່ຽວກັບສະຖານະການການແຜ່ລະບາດຂອງພະຍາດໂຄວິດ-19 ໃນຮອບ 24 ຊົ່ວໂມງທີ່ຜ່ານມາຕາມສະຖິຕິຂອງ WHO ຢືນຢັນມີຜູ້ຕິດເຊື້ອລາຍໃໝ່ 303,005 ຄົນ ເພີ່ມສະຖິຕິຜູ້ຕິດເຊື້ອສະສົມໃນທົ່ວໂລກເປັນ 32,110,656 ຄົນ ໂດຍສ່ວນໃຫຍ່ກວ່າ 20% ຂອງຜູ້ຕິດເຊື້ອສະສົມຢູ່ໃນ ສ.ອາເມຣິກາ.

ຂະນະທີ່ສະຖິຕິຜູ້ເສຍຊີວິດສະສົມຈາກໂຄວິດ-19 ທົ່ວໂລກຕາມຂໍ້ມູນຂອງ WHO ມີ 980,031 ຄົນແລ້ວ ເພີ່ມຂຶ້ນ 6,316 ຄົນ ໃນຮອບວັນທີ່ຜ່ານມາ, ໂດຍໃນຮອບ 24 ຊົ່ວໂມງຫຼ້າສຸດ ອິນເດຍມີຜູ້ເສຍຊີວິດຫຼາຍທີ່ສຸດ 1,411 ຄົນ ຕໍ່ດ້ວຍ ສ.ອາເມຣິກາ 1,125 ຄົນ, ບຣາຊິນ 869 ຄົນ, ແມັກຊິກ 601 ຄົນ, ອາກຊັງຕິນ 424 ຄົນ, ເປຣູ 302 ຄົນ, ໂກໂລມບີ 176 ຄົນ, ອີຣານ 175 ຄົນ, ອິນໂດເນເຊຍ 128 ຄົນ ແລະ ຊີເລ124 ຄົນ.

ເຖິງຢ່າງໃດກໍ່ຕາມ, ທ່ານ ໄມ ໄຣອັນ ກ່າວວ່າພາຍໃນເວລາປະມານ 9 ເດືອນເທົ່ານັ້ນ ຫຼື ນັບຕັ້ງແຕ່ຈີນຢືນຢັນຜູ້ຕິດເຊື້ອຄົນທຳອິດ ເມື່ອທ້າຍເດືອນທັນວາ ປີທີ່່ຜານມາ ເຊື້ອພະຍາດດັ່ງກ່າວນີ້ຍັງເດີນໜ້າຂ້າຊີວິດປະຊາຊົນໃນໂລກເກືອບ 1 ລ້ານຄົນ ແລະ ຍັງບໍ່ມີທ່າອ່າງຈະຫຼຸດໜ້ອຍຖ້ອຍລົງ ຫາກຍັງບໍ່ມີມາດຕະການຄວບຄຸມຢ່າງຈິງຈັງໃນໄລຍະຍາວ ຫຼື ເມື່ອທຽບກັບທິດທາງຂອງໄລຍະເວລາຈົນກວ່າຈະມີວັກແຊັງອັນທຳອິດທີ່ມີປະສິດທິພາບຢ່າງແທ້ຈິງ ແລະ ທຸກຄົນໃນໂລກສາມາດເຂົ້າເຖິງໄດ້ນັ້ນ ຜູ້ເສຍຊີວິດຈາກໂຄວິດ-19 ອາດເພີ່ມເປັນຫຼາຍເຖິງ 2 ລ້ານຄົນ.

ພາບ: ທ່ານ ບຣູສ ເອົາວາດ ຜູ້ຊ່ຽວຊານດ້ານລະບາດວິທະຍາຂອງອົງການອະນາໄມໂລກ ຖະແຫຼງ, 25 ກັນຍາ 2020.

ກ່ຽວກັບກອບການຮ່ວມມືລະຫວ່າງປະເທດໃນການຈັດສັນວັກແຊັງພາຍໃຕ້ຊື່ “ໂຄແວັກ” ທ່ານ ບຣູສ ເອົາວາດ ຜູ້ຊ່ຽວຊານດ້ານລະບາດວິທະຍາຂອງ WHO ກ່າວວ່າທາງໜ່ວຍງານຍັງຄົງເຈລະຈາໃຫ້ຈີນເຂົ້າຮ່ວມ, ຂະນະທີ່ໄຕ້ຫວັນລົງນາມເຂົ້າຮ່ວມເປັນພັນທະມິດແລ້ວ ເຖິງແມ່ນວ່າຍັງບໍ່ໄດ້ເປັນສະມາຊິກຂອງ WHO ກໍ່ຕາມ ເພີ່ມຈຳນວນພາຄີຂອງໂຄງການໂຄແວັກເປັນຢ່າງໜ້ອຍ 159 ປະເທດ ແລະ ດິນແດນ ແລະ ອີກ 34 ແຫ່ງກຳລັງຕັດສິນໃຈ, ສ່ວນ ສ.ອາເມຣິກາ ຢືນຢັນວ່າຈະບໍ່ເຂົ້າຮ່ວມ.

ໂຄແວັກ (COVAX) ເປັນໂຄງການທີ່ WHO ແລະ ອົງການພັນທະມິດເພື່ອວັກແຊັງ (Gavi) ສ້າງຕັ້ງຂຶ້ນ ເພື່ອຮ່ວມກັນລະດົມທຶນໃນການພັດທະນາ ແລະ ຈັດສັນ-ແບ່ງປັນວັກແຊັງປ້ອງກັນໂຄວິດ-19 ໃຫ້ຮັບປະກັນໄດ້ວ່າທຸກປະເທດຈະສາມາເຂົ້າເຖິງວັກແຊັງໄດ້ຢ່າງເທົ່າທຽມກັນ.

ເຊິ່ງກຳນົດການເປີດຮັບປະເທດເຂົ້າເປັນພາຄີກັບໂຄງການໂຄແວັກແມ່ນຮອດວັນທີ 25 ກັນຍາ ທີ່ຜ່ານມາ ແລະ ກອບໄລຍະເວລາເບື້ອງຕົ້ນຕໍ່ຈາກນັ້ນ ຄືການແຈກຢາຍວັກແຊັງປ້ອງກັນເຊື້ອຈຸລະໂລກໂຄໂຣນາສາຍພັນໃໝ່ (ໂຄວິດ-19) 2,000 ລ້ານຫຼອດໃຫ້ກັບປະເທດທີ່ເຂົ້າຮ່ວມໂຄງການພາຍໃນທ້າຍປີ 2021.

HTML tutorial