ອົດສະຕຣາລີຮຽກຮ້ອງ UN ຫາຕົ້ນຕໍ່ຂອງໂຄວິດ-19 ແລະ ການແບ່ງປັນວັກແຊັງຢ່າງເທົ່າທຽມ

ລາຍງານ 26 ກັນຍາ 2020, ທ່ານ ສະກັອດ ມໍຣິສັນ ນາຍົກລັດຖະມົນຕີອົດສະຕຣາລີ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ອົງການສະຫະປະຊາຊາດ (UNGA) ຄັ້ງທີ 75 ເມື່ອວັນສຸກ (25 ກັນຍາ) ທີ່ຜ່ານມາ ມີເນື້ອໃນຕອນໜຶ່ງກ່ຽວກັບວິກິດການແຜ່ລະບາດຂອງພະຍາດໂຄວິດ-19 ທີ່ຜູ້ນຳອົດສະຕຣາລີຮຽກຮ້ອງໃຫ້ປະຊາຄົມໂລກ ຮ່ວມກັນກວດສອບໃຫ້ເຖິງຕົ້ນຕໍ ເພື່ອຄົ້ນຫາແຫຼ່ງກຳເນີດຂອງເຊື້ອໂລກທີ່ແທ້ຈິງ ເຊິ່ງຈະຊ່ວຍຫຼຸດຜ່ອນຄວາມສ່ຽງຂອງການເກີດວິກິດພະຍາດລະບາດໃຫຍ່ຄັ້ງໃໝ່.

ພາບ:​ ທ່ານ ສະກັອດ ມໍຣິສັນ ນາຍົກລັດຖະມົນຕີອົດສະຕຣາລີ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ອົງການສະຫະປະຊາຊາດ, 25 ກັນຍາ 2020.

ຂະນະດຽວກັນ, ທ່ານ ສະກັອດ ມໍຣິສັນກ່າວເຖິງເລື່ອງວັກແຊັງ ວ່າປະເທດໃດກໍ່ຕາມ ທີ່ຜະລິດ ແລະ ໄດ້ຮັບການຮັບຮອງໃນລະດັບສາກົນກ່ອນ ຕ້ອງແບ່ງປັນໃຫ້ແກ່ປະເທດອື່ນຢ່າງເທົ່າທຽມກັນ ຕາມຫຼັກສິລະທຳ ແລະ ມະນຸດສະທຳ ພ້ອມທັງຢືນຢັນການໃຫ້ການສະໜັບສະໜູນແກ່ໂຄງການໂຄແວັກຂອງອົງການອະນາໄມໂລກ (WHO) ທີ່ຮ່ວມມກັບອົງການພັນທະມິດເພື່ອວັກແຊັງ (Gavi) ເພື່ອຮ່ວມກັນລະດົມທຶນໃນການພັດທະນາ ແລະ ຈັດຫາວັກແຊັງປ້ອງກັນພະຍາດໂຄວິດ-19 ມີຈຸດປະສົງເພື່ອຮັບປະກັນວ່າ ທຸກປະເທດຈະສາມາດເຂົ້າເຖິງວັກແຊັງໄດ້ໂດຍບໍ່ມີການເລືອກປະຕິບັດ.

ເຖິງຢ່າງໃດກໍ່ຕາມ, ການຖະແຫຼງຂອງທ່ານ ສະກັອດ ມໍຣິສັນ ຕໍ່ກອງປະຊຸມສະມັດຊາໃຫຍ່ ມີທ່າອ່ຽງສູງທີ່ຈະບັນທອນສາຍພົວພັນກັບຈີນໃຫ້ຕົກຕ່ຳລົງໄປອີກ ຈາກການທີ່ເມື່ອຕົ້ນປີນີ້ຜູ້ນຳອົດສະຕຣາລີກ່າວແບບດຽວກັນ ແລະ ຕໍ່ຈາກນັ້ນບໍ່ດົນລັດຖະບານຈີນກໍ່ເດີນໜ້າໃຊ້ມາດຕະການກົດດັນທາງການຄ້າຕໍ່ອົດສະຕຣາລີ ບໍ່ວ່າຈະເປັນການໂຈະການນຳເອົາຊີ້ນງົວ, ການຕັ້ງກຳແພງພາສີຕໍ່ເຂົ້າບາເລຂອງອົດສະຕຣາລີ ແລະ ການສືບສວນສອບສວນເພື່ອນຳໄປສູ່ການໃຊ້ມາດຕະການຕອບໂຕ້ການທຸ້ມຕະຫຼາດວາຍຂອງອົດສະຕຣາລີ.

HTML tutorial