ເບລາຣຸດຊີກ່າວຕໍ່ UN ວ່າຕາເວັນຕົກໃຊ້ຍຸດທະສາດສອງໜ້າ ເພື່ອແຊກແຊງການເມືອງພາຍໃນ

ລາຍງານ 27 ກັນຍາ 2020, ທ່ານ ວະລາດິເມຍ ມາເຄ ລັດຖະມົນຕີກະຊວງການຕ່າງປະເທດເບລາຣຸດຊີ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ອົງການສະຫະປະຊາຊາດ (NUGA) ເມື່ອວັນເສົາ (26 ກັນຍາ) ທີ່ຜ່ານມາ ມີເນື້ອໃນຕອນໜຶ່ງກ່ຽວກັບບັນຍາກາດທາງການເມືອງພາຍໃນປະເທດ ທີ່ເກີດການປະທ້ວງນັບຕັ້ງແຕ່ວັນເລືອກຕັ້ງປະທານປະເທດ ເມື່ອວັນທີ 9 ສິງຫາ ທີ່ຜ່ານມາ ວ່າລັດຖະບານເບລາຣຸດຊີມີຄວາມເສຍໃຈ ເມື່ອຖືກແນມດ້ວຍສາຍຕາອັນດູໝິ່ນຈາກກຸ່ມຄົນພາຍນອກບາງກຸ່ມ ຕໍ່ສະຖານະການຄັ້ງນີ້ ທີ່ມີຄວາມຊັບຊ້ອນຫຼາຍ.

ລັດຖະມົນຕີກະຊວງການຕ່າງປະເທດເບລາຣຸດຊີກ່າວຕື່ມວ່າ ການສະແດງຄວາມເປັນຫ່ວງເປັນໃຍຈາກກຸ່ມປະເທດຕາເວັນຕົກບາງແຫ່ງ ເປັນພຽງຂໍ້ອ້າງຂອງການພະຍາຍາມແທກແຊງ ເພື່ອສ້າງຄວາມວຸ້ນວາຍ ແລະ ຄວາມບໍ່ສະຫງົບໃຫ້ກັບສັງຄົມ ຕະຫຼອດຮອດສະຖາບັນທາງການເມືອງຂອງເບລາຣຸດຊີ.

ຂະນະດຽມກັນ, ທ່ານ ວະລາດີເມຍ ມາເຄ ຍັງໄດ້ປະນາມບາງປະເທດທີ່ຍັງຄົງອາໄສກົນໄກການດຳເນີນງານຂອງ UN ແລະ ສະພາຄວາມໝັ້ນຄົງແຫ່ງສະຫະປະຊາຊາດ (UNSC) ເພື່ອຕອບສະໜອງຄວາມຕ້ອງການທາງການເມືອງຝ່າຍດຽວ, ນອກຈາກນີ້ມາດຕະການປິດລ້ອມ ແລະ ກົດດັນຕໍ່ເບລາຣຸດຊີ ທີ່ກຳລັງເກີດຂຶ້ນຢູ່ຕອນນີ້ ຈະສົ່ງຜົນກັບຄືຢ່າງກົງກັນຂ້າມໃນອະນາຄົດ.

ເຊິ່ງລັດຖະມົນຕີກະຊວງການຕ່າງປະເທດເບລາຣຸດຊີ ຢືນຢັນວ່າຜົນການເລືອກຕັ້ງປະທານປະເທດຄັ້ງຫຼ້າສຸດນີ້ ສະແດງໃຫ້ເຫັນຢ່າງຊັດເຈນ ວ່າປະຊາຊົນເບລາຣຸດຊີຕ້ອງການມີສະຖຽນລະພາບ, ການພັດທະນາທີ່ຍືນຍົງ ແລະ ການສືບຕໍ່ສ້າງສາຍພົວພັນອັນດີກັບປະເທດເພື່ອບ້ານ, ເຖິງຢ່າງໃດກໍ່ຕາມ ແນວທາງແກ້ໄຂຂໍ້ຂັດແຍ່ງທີ່ເກີດຂຶ້ນ ຕ້ອງຂຶ້ນກັບປະຊາຊົນເບລາຣຸດຊີເທົ່ານັ້ນ ຜ່ານການເຈລະຈາຢ່າງມີຫຼັກການ ແລະ ຂະບວນການປະຕິຮູບລັດຖະທຳມະນູນ.

HTML tutorial