ອາກເມນີ-ອາແຊກໄບຊານ ເປີດສາກປະທະກັນຢ່າງດຸເດືອດໃນເຂດຂັດແຍ່ງທາງດິນແດນ

ລາຍງານ 27 ກັນຍາ 2020, ລັດຖະບານຂອງພູມມິພາກນາກໍໂນ-ຄາຣາບັກ ເຊິ່ງເປັນດິນແດນປົກຄອງຕົນເອງທີ່ແຍກຕົວຈາກອາແຊກໄບຊານ ປະກາດກົດໄອຍະການເສິກ ແລະ ການລະດົມກຳລັງພົນເພດຊາຍອາຍຸ 18 ປີຂຶ້ນໄປ, ການເຄື່ອນໄຫວດັ່ງກ່າວເກີດຂຶ້ນພຽງບໍ່ພໍເທົ່າໃດຊົ່ວໂມງ ຫຼັງຈາກທີ່ທຳນຽບປະທານປະເທດອາກເມນີປະກາດກົດໄອຍະການເສິກ ແລະ ກອງທັບອາກເມນີຢືນຢັນການຍິງເຮລິຄັອບແຕ 2 ລຳ ແລະ ລົດຫຸ້ມເກາະຂອງກອງທັບອາແຊກໄບຊານ 3 ຄັນ ທີ່ລ່ວງລ້ຳອານາເຂດນາກໍໂນ-ຄາຣາບັກ.

ຂະນະດຽວກັນ, ລັດຖະບານອາກເມນີລາຍງານວ່າ ມີປະຊາຊົນເສຍຊີວິດຈາກການໂຈມຕີຂອງກອງທັບອາແຊກໄບຊານໃນຄັ້ງນີ້ ແຕ່ບໍ່ໄດ້ລະບຸຈຳນວນຊັດເຈນ, ໃນດ້ານຂອງລັດຖະບານອາແຊກໄບຊານປະຕິເສດຖະແຫຼງການຂອງອາກເມນີ ແລະ ກ່າວຫາອີກຝ່າຍວ່າເຈດຕະນາສ້າງຄວາມຮຸນແຮງຕາມແນວຊາຍແດນ ດ້ວຍການໂຈມຕີຊຸມຊົນຂອງປະຊາຊົນອາແຊກໄບຊານ ແລະ ຖານປະຈຳການຂອງທະຫານອາແຊກໄບຊານ ຕາມແນວຊາຍແດນທີ່ຍັງຢູ່ພາຍໃຕ້ຂໍ້ຂັດແຍ່ງ, ກອງທັບອາແຊກໄບຊານຈຶ່ງຕ້ອງຕອບໂຕ້, ຂະນະທີ່ກະຊວງການຕ່າງປະເທດລັດເຊຍຂໍໃຫ້ທັງສອງຝ່າຍຢຸດຍິງທັນທີ.

ເຊິ່ງອາກເມນີ ແລະ ອາແຊກໄບຊານມີຂໍ້ຂັດແຍ່ງກັນແກ່ຍາວມາຫຼາຍທົດສະວັດ ກ່ຽວກັບອະທິປະໄຕຂອງພູມມິພາກນາກໍໂນ-ຄາຣາບັກ ເຊິ່ງປະກາດແຍກຕົວເອງຝ່າຍດຽວອອກຈາກອາແຊກໄບຈານ ເມື່ອປີ 1994 ພາຍຫຼັງສົງຄາມຄັ້ງໃຫຍ່ ເນື່ອງຈາກພົນລະເມືອງສ່ວນໃຫຍ່ມີເຊື້ອສາຍອາກເມນີ.

ເຊິ່ງຢ່າງໃດກໍ່ຕາມ, ສະຫະປະຊາຊາດ (UN) ຮັບຮອງດິນແດນດັ່ງກ່າວວ່າ ຢູ່ພາຍໃຕ້ອະທິປະໄຕຂອງອາແຊກໄບຊານ, ຂະນະທີ່ກອງທັບອາກເມນີ ແລະ ອາແຊກໄບຊານຍັງຄົງປະທະກັນຕາມເຂດຊາຍແດນຂອງພູມມິພາກນາກໍໂນ-ຄາຣາບັກ ແລະ ຕາມຊາຍແດນບໍລິເວນອື່ນເລື້ອຍມາຈົນເຖິງປັດຈຸບັນ.

- Advertisement -