ອາແຊກໄບຊານ-ອາກເມນີ ບຸກໂຈມຕີກັນຢ່າງດຸເດືອດ ນານາຊາດຕ່າງຮຽກຮ້ອງໃຫ້ຢຸດຕິສູ້ຮົບ

ລາຍງານ 28 ກັນຍາ 2020, ທ່ານ ອິວຫາມ ອາລີເຢບ (Ilham Aliyev) ປະທານປະເທດອາແຊກໄບຊານ ຖະແຫຼງຜ່ານໂທລະພາບແຫ່ງຊາດ ເມື່ອວັນອາທິດ (28 ກັນຍາ) ປະກາດເສິກໃນເຂດຄວາມສ່ຽງ ເພື່ອຕອບໂຕ້ຕໍ່ການຮຸກຮານຂອງອາກເມນີ ເຊິ່ງລັດຖະບານອາແຊກໄບຊານຢືນຢັນວ່າ ກອງທັບສາມາດທຳລາຍອາວຸດຍຸດໂທປະກອນ ແລະ ຖານທີ່ໝັ້ນຂອງທະຫານຝ່າຍສັດຕູ ແຕ່ກໍ່ເກີດການສູນເສຍຂຶ້ນກັບກອງທັບອາແຊກໄບຊານ ແຕ່ບໍ່ໄດ້ໃຫ້ລາຍລະອຽດ.

ການເຄື່ອນໄຫວດັ່ງກ່າວຂອງອາແຊກໄບຊານ ເກີດຂຶ້ນພຽງບໍ່ພໍເທົ່າໃດຊົ່ວໂມງ ພາຍຫຼັງອາກເມນີປະກາດເສິກເຊັ່ນກັນ, ຂະນະທີ່ກອງທັບອາກເມນີຢືນຢັນການຍິງເຮລິຄັອບແຕ 2 ລຳ ແລະ ລົດຫຸ້ມເກາະຂອງກອງທັບອາແຊກໄບຊານອີກ 3 ຄັນ ທີ່ລ່ວງອານາເຂດໃນເຂດນາກໍໂນ-ຄາຣາບັກ ດິນແດນປົກຄອງຕົນເອງ ທີ່ແຍກຕົວອອກຈາກອາແຊກໄບຊານ ຫຼັງສົງຄາມຄັ້ງໃຫຍ່ ເມື່ອປີ 1994 ເນື່ອງຈາກປະຊາຊົນສ່ວນໃຫຍ່ໃນເຂດນາກໍໂນ-ຄາຣາບັກ ມີເຊື້ອສາຍອາກເມນີ ແຕ່ ສະປະຊາຊາດ ຍັງບໍ່ຍອມຮັບ ແລະ ການພະຍາຍາມເຈລະຈາສັນຕິພາບລະຫວ່າງທັງສອງປະເທດແມ່ນຖືກໂຈະໄວ້ມາຕັ້ງແຕ່ປີ 2010.

ຂະນະທີ່ທ່ານ ອັນໂຕນິໂອ ກູເຕເຣສ ເລຂາທິການສະຫະປະຊາຊາດ, ອົງການຄວາມໝັ້ນຄົງ ແລະ ການຮ່ວມມືໃນເອີຣົບ, ສະຫະພາບເອີຣົບ, ກະຊວງການຕ່າງປະເທດ ສ.ອາເມຣິກາ ແລະ ກະຊວງການຕ່າງປະເທດລັດເຊຍ ຮຽກຮ້ອງໃຫ້ທັງສອງປະເທດຢຸດຕິການສູ້ຮົບໃນເຂດຂັດແຍ່ງ ເຊິ່ງລາຍງານຢ່າງບໍ່ເປັນທາງການລະບຸວ່າ ມີຜູ້ເສຍຊີວິດຫຼາຍກວ່າ 20 ຄົນ ແລະ ໄດ້ຮັບບາດເຈັບຫຼາຍກວ່າ 100 ຄົນ ຖືເປັນການຕອບໂຕ້ທາງທະຫານລະຫວ່າງອາກເມນີ ແລະ ອາແຊກໄບຊານໃນລະດັບທີ່ຮຸນແຮງທີ່ສຸດ ນັບຕັ້ງແຕ່ການສູ້ຮົບເມື່ອເດືອນເມສາ 2016 ເຊິ່ງມີຜູ້ເສຍຊີວິດຢ່າງໜ້ອຍ 200 ຄົນ, ເຊິ່ງເຂດນາກໍໂນ-ຄາຣາບັກ ຕັ້ງຢູ່ທາງທິດໃຕ້ຂອງສານພູຄໍເຄຊັສ ເປັນໜຶ່ງໃນເສັ້ນທາງລຳລຽງພະລັງງານສາຍສຳຄັນໃນແຖບນັ້ນ.