ອາກເມນີ ບໍ່ພໍໃຈຕວັກກີ ທີ່ເຂົ້າຂ້າງອາແຊກໄບຊານ ຕໍ່ກັບການສູ້ຮົບໃນເຂດຂັດແຍ່ງດິນແດນ

ລາຍງານ 28 ກັນຍາ 2020, ທ່ານ ນິໂຄ ປາຊິນຽນ (Nikol Pashinyan) ນາຍົກລັດຖະມົນຕີອາກເມນີ ກ່າວວ່າສະຖານະການໃນເຂດນາກໍໂນ-ຄາຣາບັກ ເປັນຄວາມຂັດແຍ່ງລະຫວ່າງອາກເມນີ ກັບ ອາແຊກໄບຊານເທົ່ານັ້ນ ຕວັກກີບໍ່ມີສ່ວນກ່ຽວຂ້ອງໃນທາງໃດທັງນັ້ນ ຈຸດຢືນຂອງລັດຖະບານຕວັກກີມີແຕ່ຈະຍິ່ງສັ່ນຄອນສະຖຽນລະພາບໃນພູມມິພາກຍິ່ງຂຶ້ນເທົ່ານັ້ນ.

ເຊິ່ງທ່ານ ເຣເຊບ ເທຢິບ ເອີໂດກັນ ກ່າວເມື່ອວັນອາທິດ (27 ກັນຍາ) ທີ່ຜ່ານມາ ວ່າຕວັກກີຢູ່ຂ້າງອາແຊກໄບຊານ ແລະ ຮຽກຮ້ອງໃຫ້ປະຊາຊົນອາກເມນີຮວມພະລັງກັນຕໍ່ຕ້ານຊົນຊັ້ນປົກຄອງ ທີ່ນຳພາບ້ານເມືອງໄປສູ່ການສູນເສຍ ພ້ອມທັງປະນາມລັດຖະບານອາກເມນີ ພາຍໃຕ້ການນຳຂອງທ່ານ ນິໂຄ ປາຊິນຽນ ວ່າເປັນໄພຮຸກຮານສັນຕິພາບໃນຢູເຣເຊຍ ແລະ ການສະໜັບສະໜູນຂອງຕວັກກີທີ່ມີຕໍ່ອາແຊກໄບຊານ ມີແຕ່ຈະເພີ່ມຂຶ້ນເທົ່ານັ້ນ ແຕ່ບໍ່ໄດ້ຂະຫຍາຍຄວາມເພີ່ມເຕີມ.

ເຂດນາກໍໂນ-ຄາຣາບັກ ເປັນເຂດຂັດແຍ່ງທາງດິນແດນລະຫວ່າງອາກເມນີ ແລະ ອາແຊກໄບຊານ ມາຕັ້ງແຕ່ສອງປະເທດຍັງເປັນສ່ວນໜຶ່ງຂອງສະຫະພາບໂຊວຽດ ແລະ ສະຖານະການຮຸນແຮງຂຶ້ນ ຫຼັງຈາກການລົ່ມສະຫຼາຍຂອງສະຫະພາບໂຊວຽດ ເນື່ອງຈາກເກີດພາວະບໍ່ມີຂົ້ວອຳນາດມາຫຼາຍປີ ເຖິງແມ່ນວ່າສະປະຊາຊາດ ຢືນຢັນວ່າເຂດນາກໍໂນ-ຄາຣາບັກເປັນສ່ວນໜຶ່ງຂອງອາແຊກໄບຊານ ແຕ່ປະຊາຊົນສ່ວນໃຫຍ່ໃນເຂດນັ້ນມີເຊື້ອສາຍອາກເມນີ.

ເຂດນາກໍໂນ-ຄາຣາບັກ ບໍ່ມີທາງອອກສູ່ທະເລໂດຍກົງ ແລະ ມີຊັບພະຍາກອນພະລັງງານບໍ່ຫຼາຍ ແຕ່ນອກເໜືອຈາກຄວາມລະອຽດອ່ອນ ຕັ້ງແຕ່ປະຫວັດສາດສະໄໝຈັກກະວັດເປີເຊຍ ພື້ນທີ່ແຫ່ງນີ້ມີຄວາມສຳຄັນທາງຍຸດທະສາດ ໃນຖານະໜຶ່ງໃນເສັ້ນທາງຂົນສົ່ງນ້ຳມັນ ແລະ ແກັດທຳມະຊາດໃນເຂດຕອນໃຕ້ຂອງສາຍພູຄໍເຄຊັສ.

ຂະນະທີ່ການສູ້ຮົບຮຸນແຮງຄັ້ງຫຼ້າສຸດ ເກີດຂຶ້ນເມື່ອປີ 2016 ມີຜູ້ເສຍຊີວິດປະມານ 200 ຄົນ, ສ່ວນການຕໍ່ສູ້ຮົບຄັ້ງນີ້ ມີຜູ້ເສຍຊີວິດລວມກັນຫຼາຍກວ່າ 50 ຄົນແລ້ວ ເກີດຂຶ້ນເມື່ອວັນອາທິດ (27 ກັນຍາ) ທີ່ຜ່ານມາ ເມື່ອອາກເມນີກ່າວຫາວ່າອາແຊກໄບຊານໂຈມຕີຂ້າມເຂດແດນໃນເຂດຂັດແຍ່ງກ່ອນ ເຊິ່ງເປັນຈຸດເລີ່ມຕົ້ນແບບດຽວກັບການສູ້ຮົບເມື່ອ 4 ປີທີ່ຜ່ານມາ.