UN ເລັ່ງເຈລະຈາຍຸຕິເສິກສົງຄາມຍາດແຍ່ງດິນແດນລະຫວ່າງອາກເມນີ ແລະ ອາແຊກໄບຊານ

ລາຍງານ 29 ກັນຍາ 2020, ທ່ານ ອັນໂຕນິໂອ ກູເຕເຣສ ເລຂາທິການອົງການສະຫະປະຊາຊາດ (UN) ສົນທະນາຜ່ານລະບົບວິດີໂອທາງໄກກັບທ່ານ ອິວຮາມ ອາລີເຢບ ປະທານປະເທດອາແຊກໄບຊານ ແລະ ທ່ານ ນິໂຄ ປາຊິນຽນ ນາຍົກລັດຖະມົນຕີອາກເມນີ ເມື່ອວັນຈັນ (28 ກັນຍາ) ທີ່ຜ່ານມາ ກ່ຽວກັບການສູ້ຮົບຄັ້ງໃໝ່ໃນເຂດນາກໍໂນ-ຄາຣາບັກ ທີ່ເປີດສາກຂຶ້ນເມື່ອວັນອາທິດ (27 ກັນຍາ) ທີ່ຜ່ານມາ ເຮັດໃຫ້ມີຜູ້ເສຍຊີວິດແລ້ວປະມານ 100 ຄົນ ສ່ວນໃຫຍ່ເປັນທະຫານຂອງທັງອາກເມນີ ແລະ ອາແຊກໄບຊານ ແຕ່ກໍ່ມີປະຊາຊົນຂອງທັງສອງປະເທດເສຍຊີວິດນຳ.

ພາບຖ່າຍຈາກເບື້ອງອາແຊກໄບຊານ

ຂະນະດຽວກັນ, ມີລາຍງານວ່າ ສະພາຄວາມໝັ້ນຄົງແຫ່ງສະຫະປະຊາຊາດ (UNSC) ມີກຳນົດປະຊຸມສຸກເສີນກ່ຽວກັບສະຖານະການດັ່ງກ່າວໃນວັນທີ 29 ກັນຍາ ນີ້ ຕາມການສະເໜີຂອງສະມາຊິກຈາກທະວີບເອີຣົບ.

ໃນດ້ານຂອງທ່ານ ເດິມິຕຣີ ເປສຄັອບ ໂຄສົກທຳນຽບປະທານປະເທດລັດເຊຍ ກ່າວວ່າທ່ານ ວະລາດິເມຍ ປູຕິນ ປະທານປະເທດລັດເຊຍ ມີຄວາມເປັນຫ່ວງເປັນໃຍຢ່າງຍິ່ງ ຕໍ່ຄວາມຂັດແຍ່ງຫຼ້າສຸດລະຫວ່າງອາກເມນີ ແລະ ອາແຊກໄບຊານ ເຖິງແມ່ນວ່າຕອນນີ້ຍັງບໍ່ຊັດເຈນວ່າໃຜເປັນຝ່າຍຖືກຜິດ ແຕ່ສິ່ງສຳຄັນຄືທັງສອງປະເທດຕ້ອງຍຸຕິການສູ້ຮົບທັນທີ ເພື່ອຄວາມປອດໄພສູງສຸດຂອງປະຊາຊົນ.

ເຊິ່ງປັດຈຸບັນລັດຖະບານລັດເຊຍ ມີຂໍ້ຕົກລົງການເປັນພັນທະມິດທາງທະຫານກັບອາກເມນີ ແລະ ມີຖານທັບຂະໜາດໃຫຍ່ຢູ່ໃນປະເທດແຫ່ງນີ້ ແຕ່ກໍ່ໄດ້ຂາຍອາວຸດໃຫ້ກັບທັງອາກເມນີ ແລະ ອາແຊກໄບຊານ.

ເຖິງຢ່າງໃດກໍ່ຕາມ, ທ່ານ ອິວຮາມ ອາລີເຢບ ຢືນຢັນວ່າກອງທັບອາແຊກໄບຊານ ຈະເດັດດ່ຽວຕໍ່ສູ້ຈົນລົມຫາຍໃຈສຸດທ້າຍ ແລະ ປະຕິເສດຂໍ້ກ່າວຫາຂອງອາກເມນີ ວ່າຕວັກກີແຊກແຊງ ດ້ວຍການສົ່ງກຳລັງພົນ ແລະ ອາວຸດຍຸດໂທປະກອນຈາກຊີຣີເຂົ້າມາສະໜັບສະໜູນອາແຊກໄບຊານ.

ສຳລັບສາເຫດຂອງການສູ້ຮົບຄັ້ງນີ້ ທັງສອງຝ່າຍຕ່າງກ່າວຫາກັນວ່າເປັນຝ່າຍເລີ່ມກໍ່ເຫດຄວາມຮຸນແຮງກ່ອນ ເຊິ່ງເປັນຂໍ້ກ່າວຫາແບບດຽວກັນທີ່ເປັນຕົ້ນເຫດຂອງການສູ້ຮົບເມື່ອປີ 2016 ເຊິ່ງເຮັດໃຫ້ມີຜູ້ເສຍຊີວິດປະມານ 200 ຄົນ.

ເຊິ່ງເຂດນາກໍໂນ-ຄາຣາບັກ ມີເນື້ອທີ່ປະມານ 4,400 ຕາລາງກິໂລແມັດ ຕັ້ງຢູ່ທາງທິດໃຕ້ຂອງສາຍພູຄໍເຄຊັສ ຫ່າງຈາກຊາຍແດນອາກເມນີປະມານ 50 ກິໂລແມັດ ປະຊາຊົນສ່ວນໃຫຍ່ທີ່ອາໄສຢູ່ມີເຊື້ອສາຍອາກເມນີ ແຕ່ອົງການສະຫະປະຊາຊາດຮັບຮອງດິນແດນດັ່ງກ່າວເປັນຂອງອາແຊກໄບຊານ.

HTML tutorial