ເກົາຫຼີເໜືອກ່າວຕໍ່ UN ວ່າມີຄວາມໃຝ່ຫາສັນຕິພາບ ແຕ່ໄພຮຸກຮານຍັງອ້ອມຮອບ

ລາຍງານ 30 ກັນຍາ 2020, ທ່ານ ຄິມ ຊອງ ເອກອັກຄະລັດຖະທູດເກົາຫຼີເໜືອ ປະຈຳອົງການສະຫະປະຊາຊາດ (UN) ກ່າວຖະແຫຼງຕໍ່ກອງປະຊຸມສະມັດຊາໃຫຍ່ອົງການສະຫະປະຊາຊາດ ເມື່ອວັນອັງຄານ (29 ກັນຍາ) ທີ່ຜ່ານມາ ມີເນື້ອໃນຕອນໜຶ່ງວ່າ ລັດຖະບານເກົາຫຼີເໜືອມີເປົ້າໝາຍຊັດເຈນ ໃນການສ້າງສັນຕິພາບໃຫ້ໂລກປາສະຈາກສົງຄາມ ແຕ່ໄພຮຸກຮານດ້ານນິວເຄຼຍທີ່ມີຕໍ່ເກົາຫຼີເໜືອ ແມ່ນບໍ່ໄດ້ຫຼຸດໜ້ອຍຖອຍລົງ.

ເຊິ່ງຜູ້ແທນການທູດສູງສຸດຂອງເກົາຫຼີເໜືອ ປະຈຳ UN ຢືນຢັນວ່າ ລະບົບເຕັກໂນໂລຊີທາງທະຫານທີ່ທັນສະໄໝ ທີ່ຍັງຄົງປະຈຳການຢູ່ແຫຼມເກົາຫຼີ ລ້ວນແຕ່ຕັ້ງເປົ້າແນໃສ່ເກົາຫຼີເໜືອທັງນັ້ນ, ດ້ວຍເຫດນີ້ ລັດຖະບານເກົາຫຼີເໜືອຈຶ່ງຈຳເປັນຕ້ອງກຽມຄວາມພ້ອມໃນແບບຂອງຕົນເອງ ໃຫ້ມີຄວາມເຂັ້ມແຂງ ແລະ ມີປະສິດທິພາບ.

ທ່ານ ຄິມ ຊອງ ກ່າວອີກວ່າ ເກົາຫຼີເໜືອຈຳເປັນຕ້ອງປະຕິຮູບເສດຖະກິດ ເພື່ອປົກປ້ອງຕົນເອງ ແລະ ເພື່ອຄວາມຢູ່ລອດ ເຖິງແມ່ນວ່າໃນທາງທິດສະດີ ເກົາຫຼີເໜືອຍັງຕ້ອງການການຊ່ວຍເຫຼືອຈາກພາຍນອກໃນລະດັບສູງ ຍິ່ງໄປກວ່ານັ້ນເມື່ອເດືອນທີ່ຜ່ານມາ ເກົາຫຼີເໜືອປະເຊີນກັບພາຍຸຂະໜາດໃຫຍ່ 2 ຫົວ ແຕ່ລັດຖະບານເກົາຫຼີເໜືອຈະເພິ່ງພາຕົນເອງໃຫ້ໄດ້ຫຼາຍທີ່ສຸດ.

ເຖິງຢ່າງໃດກໍ່ຕາມ, ທ່ານ ຄິມ ຊອງ ເອກອັກຄະລັດຖະທູດເກົາຫຼີເໜືອຢືນຢັນການສະໜັບສະໜູນຂອງລັດຖະບານເກົາຫຼີເໜືອ ທີ່ມີຕໍ່ຂະບວນການຮ່ວມມືແບບຫຼາຍຝ່າຍ ເພື່ອສັນຕິພາບ, ຄວາມໝັ້ນຄົງ ແລະ ການພັດທະນາຢ່າງຍືນຍົງ ເພາະສິ່ງເຫຼົ່ານັ້ນຈະເປັນຮາກຖານຄວາມໝັ້ນຄົງໃຫ້ກັບຄວາມສະຫງົບສຸກໃນໂລກໄດ້, ເກົາຫຼີເໜືອສະໜັບສະໜູນການດຳເນີນງານຂອງອົງການອະນາໄມໂລກ ແລະ ມີຄວາມພ້ອມທີ່ຈະພັດທະນາສາຍພົວພັນກັບປະເທດເພື່ອນບ້ານ ບົນພື້ນຖານຂອງການໃຫ້ກຽດ ແລະ ເຄົາລົບອະທິປະໄຕເຊິ່ງກັນ ແລະ ກັນ.

HTML tutorial