ອາກເມນີ-ອາແຊກໄບຊານບໍ່ສົນຕໍ່ມະຕິຂອງ UN ທີ່ໃຫ້ຢຸດຍິງ ຍັງເດີນໜ້າສູ້ຮົບຢ່າງດຸເດືອດ

ລາຍງານ 30 ກັນຍາ 2020, ສະພາຄວາມໝັ້ນຄົງແຫ່ງສະຫະປະຊາຊາດ (UNSC) ສະມາຊິກທັງ 15 ປະເທດມີມະຕິເປັນເອກະພາບໃນກອງປະຊຸມສຸກເສີນ ເມື່ອວັນອັງຄານ (29 ກັນຍາ) ທີ່ຜ່ານມາ ວ່າການສູ້ຮົບລະຫວ່າງອາກເມນີ ແລະ ອາແຊກໄບຊານ ໃນເຂດນາກໍໂນ-ຄາຣາບັກ ເຊິ່ງເປັນເຂດຂັດແຍ່ງທາງດິນແດນລະຫວ່າງທັງສອງປະເທດຕ້ອງຍຸຕິທັນທີ ແລະ ທັງສອງປະເທດຕ້ອງຫັນກັບມາເຈລະຈາກັນໂດຍບໍ່ມີເງື່ອນໄຂ ພ້ອມທັງສະແດງຄວາມເສຍໃຈຢ່າງສູງສຸດໄປຍັງຄອບຄົວຂອງຜູ້ເສຍຊີວິດຈາກການສູ້ຮົບຄັ້ງນີ້ ທີ່ຕົວເລກຢ່າງບໍ່ເປັນທາງການລະບຸວ່າປະມານ 100 ຄົນ.

ຂະນະທີ່ທ່ານ ອິວຮາມ ອາລີເຢບ ປະທານປະເທດອາແຊກໄບຊານ ກ່າວວ່າລັດຖະບານອາແຊກໄບຊານມີຄວາມມຸ່ງໝັ້ນໃນການເຈລະຈາຢ່າງສັນຕິ ແຕ່ອາກເມນີບໍ່ຕອບສະໜອງ ແລະ ຍັງທຳຕົນໃຫ້ເປັນອຸປະສັກ ໂດຍສະເພາະການປະກາດວ່າເຂດນາກໍໂນ-ຄາຣາບັກເປັນດິນແດນສ່ວນໜຶ່ງຂອງຕົນ ທັງທີ່ສະຫະປະຊາຊາດຮັບຮອງວ່າເປັນຂອງອາແຊກໄບຊານ.

ທ່ານ ອິວຮາມ ອາລີເຢບ ກ່າວໃນທາງສຽດສີຕື່ມອີກວ່າ ຫາກການເຈລະຈາເກີດຂຶ້ນ ແຕ່ທ່ານ ນິໂຄ ປາຊິນຽນ ນາຍົກລັດຖະມົນຕີອາກເມນີບໍ່ມາດ້ວຍຕົນເອງ ແຕ່ສົ່ງຕົວແທນເປັນກອງກຳລັງໃນເຂດນາກໍໂນ-ຄາຣາບັກມາແທນ ຖືເປັນການລະເມີດຂໍ້ຕົກລົງເມື່ອປີ 1992.

ໃນດ້ານຂອງທ່ານ ນິໂຄ ປາຊິນຽນກ່າວວ່າ ເປັນຄວາມຈິງທີ່ວ່າມາດຕະການທາງທະຫານບໍ່ແມ່ນທາງອອກ ແຕ່ກ່ອນອື່ນອາແຊກໄບຊານຕ້ອງຍຸຕິການຮຸກຮານເຂດນາກໍໂນ-ຄາຣາບັກ ແລະ ຢ່າໃຫ້ບຸກຄົນພາຍນອກເຂົ້າມາກ່ຽວຂ້ອງ ຫຼັງຈາກກອງທັບອາກເມນີລາຍງານວ່າ ຍົນຂັບໄລ່ລຳໜຶ່ງຂອງກອງທັບຕວັກກີໂຈມຕີເຂດທີ່ຢູ່ອາໄສຂອງປະຊາຊົນອາກເມນີ ແລະ ຍິງຍົນຮົບລຳໜຶ່ງຂອງອາກເມນີຕົກ ສົ່ງຜົນໃຫ້ນັກບິນເສຍຊີວິດ ແຕ່ລັດຖະບານຕວັກກີຢືນຢັນປະຕິເສດ.

ສຳລັບການສູ້ຮົບລະຫວ່າງອາກເມນີ ກັບ ອາແຊກໄບຊານຄັ້ງນີ້ ທີ່ເປີດສາກຂຶ້ນເມື່ອວັນອາທິດ (27 ກັນຍາ) ທີ່ຜ່ານມາ ມີຄວາມຮຸນແຮງທີ່ສຸດນັບຕັ້ງແຕ່ປີ 2016, ໂດຍເຂດນາກໍໂນ-ຄາຣາບັກ ມີເນື້ອທີ່ປະມານ 4,400 ຕາລາງກິໂລແມັດ ຕັ້ງຢູ່ທາງທິດໃຕ້ຂອງສາຍພູຄໍເຄຊັສ ປັດຈຸບັນຖືເປັນໜຶ່ງໃນເສັ້ນທາງລຳລຽງພະລັງງານທີ່ສຳຄັນຂອງພູມມິພາກຢູເຣເຊຍ, ເຖິງແມ່ນວ່າສະຫະປະຊາຊາດຮັບຮອງດິນແດນດັ່ງກ່າວວ່າເປັນຂອງອາແຊກໄບຊານ ແຕ່ປະຊາຊົນສ່ວນໃຫຍ່ທີ່ອາໄສຢູ່ໃນດິນແດນດັ່ງກ່າວມີເຊື້ອສາຍອາກເມນີ.