ລັດເຊຍກ່າວວ່າ ພ້ອມເປັນຄົນກາງເຈລະຈາຢ່າເສິກຍາດແຍ່ງດິນແດນອາກເມນີ-ອາແຊກໄບຊານ

ລາຍງານ 1 ຕຸລາ 2020, ທ່ານ ເຊີເກ ລາວາຣົບ ລັດຖະມົນຕີກະຊວງການຕ່າງປະເທດລັດເຊຍ ກ່າວເມື່ອວັນພຸດ (30 ກັນຍາ) ທີ່ຜ່ານມາ ວ່າໄດ້ສົນທະນາທາງໂທລະສັບກັບລັດຖະມົນຕີກະຊວງການຕ່າງປະເທດທັງອາກເມນີ ແລະ ອາແຊກໄບຊານ ກ່ຽວກັບສະຖານະການການສູ້ຮົບຄັ້ງໃໝ່ລະຫວ່າງທັງສອງປະເທດ ໃນເຂດນາກໍໂນ-ຄາຣາບັກ ທີ່ເປີດສາກຂຶ້ນເມື່ອວັນທີ 27 ກັນຍາ ທີ່ຜ່ານມາ ແລະ ມີຜູ້ເສຍຊີວິດແລ້ວຫຼາຍກວ່າ 100 ຄົນ, ໂດຍລັດຖະບານລັດເຊຍພ້ອມເຮັດໜ້າທີ່ເປັນຜູ້ໄກ່ເກ່ຍເພື່ອຍຸຕິສະຖານະການທີ່ປຽບດັ່ງສົງຄາມ.

ເຖິງແມ່ນວ່າຍັງບໍ່ມີລາຍງານວ່າອາກເມນີ ແລະ ອາແຊກໄບຊານມີຈຸດຢືນແບບໃດຕໍ່ກັບບັນຫານີ້ ແຕ່ທຳນຽບປະທານປະເທດລັດເຊຍຖະແຫຼງວ່າ ທ່ານ ນິໂຄ ປາຊິນຽນ ນາຍົກລັດຖະມົນຕີອາກເມນີ ສົນທະນາທາງໂທລະສັບກັບທ່ານ ວະລາດິເມຍ ປູຕິນ ປະທານປະເທດລັດເຊຍ ເມື່ອວັນອັງຄານ (29 ກັນຍາ) ທີ່ຜ່ານມາ, ໂດຍທ່ານ ກິໂຄ ປາຊິນຽນກ່າວໃນຕອນໜຶ່ງວ່າ ສະຖານະການປັດຈຸບັນຍັງບໍ່ເຖິງຂັ້ນທີ່ອາກເມນີຕ້ອງຂໍຄວາມຊ່ວຍເຫຼືອທາງທະຫານຈາກລັດເຊຍ ຕາມຂໍ້ຕົກລົງຮ່ວມກັນຕັ້ງແຕ່ສະໄໝສະຫະພາບໂຊວຽດ ແຕ່ອາດມີການປ່ຽນແປງໃນອະນາຄົດ.

ຂະນະທີ່ທ່ານ ເມວຸດ ຄາວູໂຊກູ (Mevlut Cavusoglu) ລັດຖະມົນຕີກະຊວງການຕ່າງປະເທດຕວັກກີ ຢືນຢັນປະຕິເສດວ່າລັດຖະບານຕວັກກີບໍ່ໄດ້ສົ່ງທັງກຳລັງພົນ ແລະ ອາວຸດຍຸດໂທປະກອນເຂົ້າໄປໃນອາແຊກໄບຊານ, ເຖິງຢ່າງໃດກໍ່ຕາມ ຕວັກກີພ້ອມດຳເນີນການຫາກໄດ້ຮັບການຮ້ອງຂໍ.

ໃນດ້ານຂອງທຳນຽບປະທານປະເທດອາແຊກໄບຊານ ໄດ້ຕຳນິບົດລາຍງານຂອງອົງການສັງເກດການດ້ານສິດທິມະນຸດຊີຣີ (SOHR) ວ່າເປັນຂ່າວປອມ ຈາກການທີ່ລະບຸວ່າກອງກຳລັງໃນຊີຣີປະມານ 850 ຄົນທີ່ຕວັກກີໃຫ້ການສະໜັບສະໜູນເດີນທາງເຂົ້າໄປຍັງອາແຊກໄບຊານແລ້ວ.

ຕໍ່ມາທ່ານ ອິວຮາມ ອາລິເຢບ ປະທານປະເທດອາແຊກໄບຊານ ກ່າວວ່າລັດຖະບານອາແຊກໄບຊານມີເງື່ອນໄຂດຽວ ຄືກອງທັບອາກເມນີ ແລະ ກອງກຳລັງທີ່ລັດຖະບານອາກເມນີໃຫ້ການສະໜັບສະໜູນຕ້ອງຖອນກຳລັງອອກຈາກເຂດນາກໍໂນ-ຄາຣບັກ ແຕ່ທ່ານ ນິໂຄ ປາຊິນຽນ ກ່າວວ່າລັດຖະບານອາກເມນີປະກາດຮັບຮອງເອກະລາດໃຫ້ກັບເຂດແດນດັ່ງກ່າວແລ້ວ ທີ່ຕັ້ງຢູ່ທາງທິດໃຕ້ຂອງສາຍພູຄໍເຄຊັສ ເຖິງແມ່ນວ່າອົງການສະຫະປະຊາຊາດຮັບຮອງດິນແດນດັ່ງກ່າວໃຫ້ເຫັນຂອງອາແຊກໄບຊານ ແຕ່ປະຊາຊົນສ່ວນໃຫຍ່ທີ່ອາໄສຢູ່ໃນເຂດນັ້ນແມ່ນມີເຊື້ອສາຍອາກເມນີ.

HTML tutorial