ອາກເມນີ-ອາແຊກໄບຊານ ບໍ່ສົນຕໍ່ຂໍ້ຮຽກຮ້ອງຂອງມະຫາອຳນາດ ເດີນໜ້າສູ້ຮົບຢ່າງດຸເດືອດ

ລາຍງານ 2 ຕຸລາ 2020, ລັດຖະບານ ສ.ອາເມຣິກາ, ລັດເຊຍ ແລະ ຝຣັ່ງ ໃນຖານະປະທານຮ່ວມຂອງກຸ່ມມິນ (Minsk) ທີ່ສ້າງຕັ້ງຂຶ້ນຕາມມະຕິຂອງອົງການຄວາມໝັ້ນຄົງ ແລະ ການຮ່ວມມືໃນເອີຣົບ (OSCE) ເມື່ອປີ 1992 ເພື່ອແກ້ໄຂວິກິດຂໍ້ຂັດແຍ່ງລະຫວ່າງອາກເມນີ ແລະ ອາແຊກໄບຊານ ອອກຖະແຫຼງການເມື່ອວັນພະຫັດ (1 ຕຸລາ) ທີ່ຜ່ານມາ ຮຽກຮ້ອງທັງສອງຝ່າຍໃຫ້ຍຸຕິການສູ້ຮົບທັນທີ ໃນເຂດນາກໍໂນ-ຄາຣາບັກ ທີ່ຕັ້ງຢູ່ທາງທິດໃຕ້ຂອງສາຍພູຄໍເຄຊັສ ແລ້ວໃຫ້ຫັນກັບມາເຈລະຈາກັນ ເຊິ່ງເປັນເນື້ອໃນແບບດຽວກັນກັບຖະແຫຼງການຂອງສະພາຄວາມໝັ້ນຄົງແຫ່ງອົງການສະຫະປະຊາຊາດ (UNSC).

ເຖິງຢ່າງໃດກໍ່ຕາມ, ທ່ານ ເຣເຊບ ເທຢິບ ເອີໂດກັນ ປະທານປະເທດຕວັກກີ ທີ່ສະແດງຕົວຊັດເຈນວ່າສະໜັບສະໜູນອາແຊກໄບຊານ ວິຈານການເຄື່ອນໄຫວດັ່ງກ່າວຂອງກຸ່ມມິນ ວ່າບໍ່ມີປະໂຫຍດຫຍັງ ເມື່ອທຽບກັບການທີ່ກຸ່ມມິນປ່ອຍປະໃຫ້ສະຖານະການຄວາມຂັດແຍ່ງນີ້ແກ່ຍາວມາເກືອບ 30 ປີ, ເຊິ່ງມີຫົນທາງດຽວເທົ່ານັ້ນ ທີ່ຈະຍຸຕິຄວາມຮຸນແຮງໄດ້ ນັ້ນຄືຜູ້ຍຶດຄອງຊາວອາກເມນີ ຕ້ອງຖອນກຳລັງອອກຈາກເຂດນາກໍໂນ-ຄາຣາບັກ ເຊິ່ງສະຖານະການຄວາມຮຸນແຮງຄັ້ງຫຼ້າສຸດນີ້ ເປີດສາກຂຶ້ນເມື່ອວັນທີ 27 ກັນຍາ ທີ່ຜ່ານມາ ສົ່ງຜົນໃຫ້ມີຜູ້ເສຍຊີວິດແລ້ວຫຼາຍກວ່າ 100 ຄົນ.

ໃນດ້ານຂອງລັດເຊຍຍັງບໍ່ມີປະຕິກິລິຍາຕອບໂຕ້ຢ່າງເປັນທາງການຕໍ່ຄຳກ່າວຂອງຜູ້ນຳຕວັກກີ ທ່າມກາງຄວາມເປັນຫ່ວງຂອງ OSCE ແລະ ອົງການສົນທິສັນຍາອາກລັງຕິກເໜືອ (NATO) ວ່າຈຸດຢືນຂອງລັດຖະບານຕວັກກີຈະຍິ່ງເພີ່ມຄວາມບໍ່ພໍໃຈໃຫ້ກັບລັດຖະບານລັດເຊຍ ທີ່ມີຂໍ້ຕົກລົງການຮ່ວມມືທາງທະຫານກັບອາກເມນີ ມາຕັ້ງແຕ່ສະໄໝທີ່ອາກເມນີຍັງເປັນສ່ວນໜຶ່ງຂອງສະຫະພາບໂຊວຽດ ແລະ ລັດເຊຍກໍ່ຍັງໄດ້ປະຈຳການທະຫານຈຳນວນໜຶ່ງ ຢູ່ໃນອາກເມນີອີກດ້ວຍ.

ຂະນະທີ່ທ່ານ ນິໂຄ ປາຊິນຽນ ນາຍົກລັດຖະມົນຕີອາກເມນີ ຍັງບໍ່ສະແດງຈຸດຢືນຢ່າງເປີດເຜີຍຕໍ່ຂໍ້ຮຽກຮ້ອງຂອງກຸ່ມມິນ ແຕ່ເປີດເຜີຍວ່າ ກອງທັບໄດ້ຍິງໂດຣນລຳໜຶ່ງ ທີ່ມີທິດທາງບິນມາຈາກອາແຊກໄບຊານ ເຂົ້າມາວົນວຽນຢູ່ໃນນະຄອນຫຼວງເຢເຣວານ ເມື່ອຄືນວັນພະຫັດ (1 ຕຸລາ) ທີ່ຜ່ານມາ.

ສ່ວນທ່ານ ອິວຮາມ ອາລີເຢບ ປະທານປະເທດອາແຊກໄບຊານ ຢືນຢັນວ່າກອງທັບອາກເມນີ ແລະ ກອງກຳລັງທີ່ອາກເມນີໃຫ້ການສະໜັບສະໜູນຕ້ອງຍຸຕິການຍຶດຄອງເຂດນາກໍໂນ-ຄາຣາບັກ ທີ່ອົງການສະຫະປະຊາຊາດຮັບຮອງວ່າຢູ່ພາຍໃຕ້ອະທິປະໄຕຂອງອາແຊກໄບຊານ.

HTML tutorial