ອັງກິດ-ການາດາຂວ້ຳບາດຜູ້ນຳເບລາຣຸດຊີ ແລະ ລູກຊາຍຂໍ້ຫາສໍ້ໂກງການເລືອກຕັ້ງ

ລາຍງານ 3 ຕຸລາ 2020, ກະຊວງການຕ່າງປະເທດອັງກິດ ແລະ ການາດາຖະແຫຼງການໃນເວລາໃກ້ຄຽງກັນ ເມື່ອທ້າຍອາທິດທີ່ຜ່ານມາ ມີເນື້ອໃນດຽວກັນນັ້ນຄືການຂວ້ຳບາດທ່ານ ອະເລັກຊານເດີ ລູຄາເຊັນໂກ ປະທານປະເທດເບລາຣຸດຊີ ແລະ ທ່ານ ວິກເຕີ ລູຄາເຊັນໂກ ທີ່ເປັນລູກຊາຍ ພ້ອມທັງເຈົ້າໜ້າທີ່ລະດັບສູງຂອງລັດຖະບານເບລາຣຸດຊີອີກ 10 ຄົນ ເນື່ອງຈາກສົມຄົບຄິດສໍ້ໂກງການເລືອກຕັ້ງ ເມື່ອວັນທີ 9 ສິງຫາ ທີ່ຜ່ານມາ ແລະ ໃຊ້ຄວາມຮຸນແຮງກັບຜູ້ປະທ້ວງຕໍ່ຕ້ານລັດຖະບານ.

ເຊິ່ງທ່ານ ໂດມິນິກ ຣາບ ລັດຖະມົນຕີກະຊວງການຕ່າງປະເທດອັງກິດ ກ່າວວ່າມາດຕະການດັ່ງກ່າວແມ່ນລວມເຖິງການຫ້າມບຸກຄົນທີ່ມີລາຍຊື່ເດີນທາງເຂົ້າປະເທດ ແລະ ການອາຍັດຊັບສິນທັງໝົດທີ່ມີຢູ່ໃນອັງກິດເພື່ອຊົດໃຊ້ຕໍ່ການທີ່ຜູ້ນຳເບລາຣຸດຊີ ແລະ ລູກຊາຍລະເມີດສິດທິມະນຸດຢ່າງຮ້າຍແຮງຕໍ່ປະຊາຊົນເບລາຣຸດຊີ.

ຂະນະທີ່ທ່ານ ຟຣານຄວາ ຟິລິບ ຊາມປາງ ລັດຖະມົນຕີກະຊວງການຕ່າງປະເທດການາດາ ກ່າວວ່າການປະກາດມາດຕະການຂວ້ຳບາດຄັ້ງນີ້ ສະແດງໃຫ້ເຫັນຈຸດຢືນທີ່ຊັດເຈນຂອງຕາເວັນຕົກ ໃນການຢູ່ຄຽງຂ້າງປະຊາຊົນເບລາຣຸດຊີ.

ໃນດ້ານຂອງກອງປະຊຸມ 27 ປະເທດສະມາຊິກສະຫະພາບເອີຣົບ (EU) ປະກາດມາດຕະການຂວ້ຳບາດເຈົ້າໜ້າທີ່ຂອງລັດຖະບານເບລາຣຸດຊີປະມານ 40 ຄົນ ສ່ວນໃຫຍ່ສັງກັດກະຊວງພາຍໃນ ແລະ ຄະນະກຳມະການການເລືອກຕັ້ງ ຖານມີສ່ວນກ່ຽວຂ້ອງກັບການສໍ້ໂກງການເລືອກຕັ້ງ ແລະ ການໃຊ້ມາດຕະການຄວາມຮຸນແຮງປາບປາມຜູ້ປະທ້ວງ, ເຖິງແມ່ນວ່າບໍ່ມີຊື່ຂອງຜູ້ນຳເບລາຣຸດຊີ ແຕ່ EU ຢືນຢັນວ່າໃນອະນາຄົດ, ດ້ານກະຊວງການຕ່າງປະເທດເບລາຣຸດຊີອອກຖະແຫຼງການວ່າ ເບລາຣຸດຊີບໍ່ມີນະໂຍບາຍປະເຊີນໜ້າກັບຝ່າຍໃດ ແຕ່ຫາກມີການກະທຳທີ່ບໍ່ເປັນມິດເກີດຂຶ້ນ ເບລາຣຸດຊີຈະເດັດດ່ຽວຕອບໂຕ້.

HTML tutorial