ອາກເມນີ ພ້ອມເຈລະຈາຢຸດຍິງຈາກບັນຫາສູ້ຮົບຍາດແຍ່ງດິນແດນກັບອາແຊກໄບຊານ

ລາຍງານ 3 ຕຸລາ 2020, ກະຊວງການຕ່າງປະເທດອາກເມນີອອກຖະແຫຼງການເມື່ອວັນສຸກ (2 ຕຸລາ) ທີ່ຜ່ານມາ ຢືນຢັນພ້ອມໃຫ້ການຮ່ວມມືກັບ ສ.ອາເມຣິກາ, ລັດເຊຍ ແລະ ຝຣັ່ງໃນຖານະປະທານຮ່ວມຂອງກຸ່ມມິນ (Minsk) ທີ່ສ້າງຕັ້ງຂຶ້ນຕາມມະຕິຂອງອົງການຄວາມໝັ້ນຄົງ ແລະ ການຮ່ວມມືໃນເອີຣົບ (OSCE) ເພື່ອແກ້ໄຂບັນຫາການສູ້ຮົບໃນເຂດນາກໍໂນ-ຄາຣາບັກ ທີ່ຕັ້ງຢູ່ທາງທິດໃຕ້ຂອງສາຍພູຄໍເຄຊັສ ເຊິ່ງເປັນເຂດຂັດແຍ່ງທາງດິນແດນມາຍາວນານລະຫວ່າງອາກເມນີ ກັບ ອາແຊກໄບຊານ.

ຂະນະທີ່ທ່ານ ນິໂຄ ປາຊິນຽນ ນາຍົກລັດຖະມົນຕີອາກເມນີ ກ່າວເຖິງການສົນທະນາທາງໂທລະສັບກັບທ່ານ ເອມມານູເອວ ມາຄຼອງ ປະທານປະເທດຝຣັ່ງ ແລະ ເຫັນດີຮ່ວມກັນໃນການຄັດຄ້ານການແຊກແຊງໂດຍກອງກຳລັງຕິດອາວຸດຕ່າງປະເທດ, ນອກຈາກນີ້ ທ່ານ ນິໂຄ ປາຊິນຽນ ຍັງສົນທະນາທາງໂທລະສັບຮ່ວມກັບທ່ານ ວະລາດິເມຍ ປູຕິນ ປະທານປະເທດລັດເຊຍ ເປັນຄັ້ງທີ 3 ພາຍໃນອາທິດດຽວ ຫຼື ນັບຕັ້ງແຕ່ການສູ້ຮົບກັບອາແຊກໄບຊານເປີດສາກຂຶ້ນ ເມື່ອວັນທີ 27 ກັນຍາ ທີ່ຜ່ານມາ ແລະ ເຮັດໃຫ້ມີຜູ້ເສຍຊີວິດແລ້ວເກືອບ 200 ຄົນ.

ເຖິງຢ່າງໃດກໍ່ຕາມ, ກະຊວງການຕ່າງປະເທດອາແຊກໄບຊານມີຖະແຫຼງການກ່ຽວກັບບັນຫານີ້ ວ່າກຸ່ມມິນບໍ່ມີຄວາມເປັນກາງຕໍ່ກັບສະຖານະການປັດຈຸບັນຂອງເຂດນາກໍໂນ-ຄາຣາບັກ ທີ່ຍັງຕົກຢູ່ພາຍໃຕ້ການຍຶດຄອງຂອງກອງກຳລັງຈາກອາກເມນີ ແລະ ລັດຖະບານເຄິ່ງທະຫານຂອງອາກເມນີຕ້ອງຮັບຜິດຊອບຕໍ່ສະຖານະການທີ່ເກີດຂຶ້ນ.

ໃນດ້ານຂອງທ່ານ ເມວຸດ ຄາວູໂຊກູ ລັດຖະມົນຕີກະຊວງການຕ່າງປະເທດຕວັກກີ ຢືນຢັນວ່າການສູ້ຮົບຄັ້ງນີ້ຈະຍຸຕິໄດ້ ກໍ່ຕໍ່ເມື່ອອາກເມນີຖອນກຳລັງພົນ ແລະ ອາວຸດຍຸດໂທປະກອນອອກຈາກເຂດນາກໍໂນ-ຄາຣາບັກ.

ເຊິ່ງລັດຖະມົນຕີກະຊວງການຕ່າງປະເທດຕວັກກີເນັ້ນໜັກວ່າ ເປັນການຮຽກຮ້ອງທີ່ຊອບທຳ ເນື່ອງຈາກອົງການສະຫະປະຊາຊາດ (UN) ຮັບຮອງເນື້ອທີ່ບໍລິເວນນັ້ນເປັນຂອງອາແຊກໄບຊານ ເຖິງແມ່ນວ່າລັດຖະບານອາແຊກໄບຊານບໍ່ໄດ້ໃຊ້ອຳນາດຄຸ້ມຄອງບໍລິຫານເຂດດັ່ງກ່າວມາຕັ້ງແຕ່ປີ 1988 ແລະ ປະຕິເສດລາຍງານທຸກກະແສທີ່ລະບຸວ່າ ຕວັກກີໃຫ້ການຊ່ວຍເຫຼືອທາງທະຫານແກ່ອາແຊກໄບຊານແລ້ວ.

HTML tutorial