ສົງຄາມອາກເມນີ-ອາແຊກໄບຊານລຸກລາມອອກນອກເຂດຄວາມຂັດແຍ່ງໄປສູ່ຫົວເມືອງໃກ້ຄຽງ

ລາຍງານ 5 ຕຸລາ 2020, ທ່ານ ອິວຮາມ ອາລີເຢບ ປະທານປະເທດອາແຊກໄບຊານ ຖະແຫຼງເມື່ອວັນອາທິດ (4 ຕຸລາ) ທີ່ຜ່ານມາ ກ່ຽວກັບການສູ້ຮົບຄັ້ງຫຼ້າສຸດກັບກອງທັບອາກເມນີ ແລະ ກອງກຳລັງໃນເຂດນາກໍໂນ-ຄາຣາບັກ ທີ່ແກ່ຍາວມາກວ່າ 1 ອາທິດ, ມີຜູ້ເສຍຊີວິດຫຼາຍກວ່າ 200 ຄົນ ແລະ ໄດ້ຮັບບາດເຈັບອີກເປັນຈຳນວນຫຼາຍ ວ່າທະຫານອາແຊກໄບຊານບຸກເຂົ້າພື້ນທີ່ຂັດແຍ່ງໄດ້ຢ່າງຕໍ່ເນື່ອງ ເພື່ອຂັບໄລ່ຜູ້ຍຶດຄອງ ແລະ ປົດປ່ອຍເຂດນາກໍໂນ-ຄາຣາບັກ.

ເຊິ່ງທ່ານ ອິວຮາມ ອາລີເຢບເນັ້ນໜັກວ່າ ເຂດຄວາມຂັດແຍ່ງເປັນດິນແດນພາຍໃຕ້ອຳນາດອະທິປະໄຕຂອງອາແຊກໄບຊານ ຕາມການຮັບຮອງຂອງອົງການສະຫະປະຊາຊາດ, ດັ່ງນັ້ນກອງທັບອາກເມນີ ແລະ ກຸ່ມຕິດອາວຸດທັງໝົດຕ້ອງຖອນກຳລັງອອກໄປ ເງື່ອນໄຂນີ້ເປັນຂໍ້ຮຽກຮ້ອງດຽວຂອງອາແຊກໄບຊານ ແລະ ເປັນຫົນທາງດຽວເທົ່ານັ້ນທີ່ຈະຍຸຕິການສູ້ຮົບໄດ້, ເຖິງຢ່າງໃດກໍ່ຕາມ ລັດຖະບານອາແຊກໄບຊານແມ່ນບໍ່ໄດ້ໃຊ້ອຳນາດຄຸ້ມຄອງບໍລິຫານເຂດນາກໍໂນ-ຄາຣາບັກ ມາຕັ້ງແຕ່ປີ 1988.

ຖະແຫຼງການຂອງຜູ້ນຳອາແຊກໄບຊານ ສະແດງໃຫ້ເຫັນວ່າອາແຊກໄບຊານບໍ່ມີທາງຍອມຮັບຂໍ້ຮຽກຮ້ອງຢຸດຍິງ ບໍ່ວ່າຈະມາຈາກສະພາຄວາມໝັ້ນຄົງແຫ່ງສະຫະປະຊາຊາດ ຫຼື ກຸ່ມມິນ ທີ່ເປັນການລວມຕົວສະເພາະກິດຂອງ ສ.ອາເມຣິກາ, ລັດເຊຍ ແລະ ຝຣັ່ງ ຕາມມະຕິຂອງອົງການຄວາມໝັ້ນຄົງ ແລະ ການຮ່ວມມືໃນເອີຣົບ ເມື່ອປີ 1992 ເພື່ອແກ້ໄຂຂໍ້ຂັດແຍ່ງການສູ້ຮົບໃນເຂດນາກໍໂນ-ຄາຣາບັກ.

ຂະນະທີ່ກະຊວງການຕ່າງປະເທດອາກເມນີ ອອກຖະແຫຼງການຕອບໂຕ້ ວ່າເປັນເງື່ອນໄຂທີ່ອາກເມນີຮັບບໍ່ໄດ້ ແລະ ຮຽກຮ້ອງໃຫ້ອາແຊກໄບຊານຍຸຕິການໃຊ້ຄວາມຮຸນແຮງ ພ້ອມທັງປະຕິເສດຂໍ້ກ່າວຫາຂອງອີກຝ່າຍ ວ່າກອງທັບອາກເມນີຍິງປືນໃຫຍ່ໂຈມຕີເມືອງກັນຈາ ເຊິ່ງເປັນເມືອງໃຫຍ່ອັນດັບ 2 ຂອງອາແຊກໄບຊານ ແລະ ຕັ້ງຢູ່ທາງທິດເໜືອຂອງເຂດນາກໍໂນ-ຄາຣາບັກ ຈົນເຮັດໃຫ້ມີປະຊາຊົນເສຍຊີວິດ 1 ຄົນ.

ສ່ວນກະຊວງປ້ອງກັນປະເທດອາແຊກໄບຊານ ປະຕິເສດລາຍງານທີ່ວ່າ ສະໜາມບິນທະຫານໃນເມືອງກັນຈາໄດ້ຮັບຄວາມເສຍຫາຍຈາກການຍິງປືນໃຫຍ່.

ການສູ້ຮົບຄັ້ງນີ້ມີຄວາມຮຸນແຮງທີ່ສຸດ ນັບຕັ້ງແຕ່ປີ 2016 ສຳລັບການຍາດແຍ່ງເຂດນາກໍໂນ-ຄາຣາບັກ ທີ່ມີເນື້ອທີ່ 4,400 ຕາລາງກິໂລແມັດ ຕັ້ງຢູ່ທາງທິດໃຕ້ຂອງສາຍພູຄໍເຄຊັສ ປັດຈຸບັນຖືເປັນໜຶ່ງໃນເສັ້ນທາງລຳລຽງພະລັງງານທີ່ສຳຄັນຂອງພູມມິພາກຢູເຣເຊຍ, ເຖິງແມ່ນວ່າອົງການສະຫະປະຊາຊາດຮັບຮອງໃຫ້ເປັນດິນແດນຂອງອາແຊກໄບຊານ ແຕ່ປະຊາຊົນສ່ວນໃຫຍ່ທີ່ອາໄສຢູ່ໃນເຂດດັ່ງກ່າວແມ່ນມີເຊື້ອສາຍອາກເມນີ.

HTML tutorial