ລັດຖະມົນຕີຕ່າງປະເທດ ສ.ອາເມຣິກາ ພົບຜູ້ນຳຍີ່ປຸ່ນ ພ້ອມກ່າວວ່າຈີນເປັນໄພ ແລະ ເຈດຕະນາຮ້າຍ

ລາຍງານ 7 ຕຸລາ 2020, ທ່ານ ໂຢຊິຮິເດະ ຊຶງະ ນາຍົກລັດຖະມົນຕີຍີ່ປຸ່ນ ໃຫ້ການຕ້ອນຮັບທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ທີ່ທຳນຽບໃນນະຄອນຫຼວງໂຕກຽວ ເມື່ອວັນອັງຄານ (6 ຕຸລາ) ທີ່ຜ່ານມາ, ໂດຍທ່ານ ໄມ ພອມແພວ ຖືເປັນເຈົ້າໜ້າທີ່ລະດັບສູງຂອງລັດຖະບານຕ່າງປະເທດຄົນທຳອິດ ທີ່ໄດ້ພົບປະກັບນາຍົກລັດຖະມົນຕີຄົນໃໝ່ຂອງຍີ່ປຸ່ນ ນັບຕັ້ງແຕ່ເຂົ້າຮັບຕຳແໜ່ງນາຍົກລັດຖະມົນຕີ ເມື່ອວັນທີ 16  ກັນຍາ ທີ່ຜ່ານມາ.

ພາບ: ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ (ຊ້າຍ) ແລະ ທ່ານ ໂຢຊິຮິເດະ ຊຶງະ ນາຍົກລັດຖະມົນຕີຍີ່ປຸ່ນ ພ້ອມຄະນະທັງສອງຝ່າຍ, 6 ຕຸລາ 2020.

ເຊິ່ງທ່ານ ໂຢຊິຮິເດະ ຊຶງະກ່າວເຖິງສາຍພົວພັນລະຫວ່າງພູມມິພາກອິນໂດ-ປາຊີຟິກ ຄືພື້ນຖານຂອງສັນຕິພາບ ແລະ ສະຖຽນລະພາບດ້ານຄວາມໝັ້ນຄົງໃນພູມມິພາກ ແລະ ວິກິດການແຜ່ລະບາດຂອງພະຍາດໂຄວິດ-19 ໄດ້ຢ້ຳວ່າທຸກຝ່າຍຍິ່ງຕ້ອງເພີ່ມການຮ່ວມມືກັນ ເພື່ອຜ່ານຜ່າໄພຄຸກຄາມດ້ານສາທາລະນະສຸກຄັ້ງນີ້ຮ່ວມກັນທຸກປະເທດໃຫ້ຫຼາຍທີ່ສຸດເທົ່າທີ່ຈະເປັນໄປໄດ້ ໂດຍບໍ່ໄດ້ມີການກ່າວເຖິງປະເທດໃດປະເທດໜຶ່ງຢ່າງເຈາະຈົງ.

ເຖິງຢ່າງໃດກໍ່ຕາມ, ກ່ອນເຂົ້າພົບຢ່າງເປັນທາງການກັບຜູ້ນຳຍີ່ປຸ່ນ ທ່ານ ໄມ ພອມແພວ ພົບປະຫາລືແບບຫຼາຍຝ່າຍ ຮ່ວມກັບລັດຖະບານຕີກະຊວງການຕ່າງປະເທດອີກ 3 ປະເທດຄື: ທ່ານ ໂທຊິມິດສຶ ໂມເຕງິ ຈາກຍີ່ປຸ່ນ, ທ່ານ ນາງ ມາຣິສ ເພນ ຈາກອົດສະຕຣາລີ ແລະ ທ່ານ ສຸພົມມະນະຍຳ ໄຊສັງກະ ຈາກອິນເດຍ ເຊິ່ງທ່ານ ໄມ ພອມແພວກ່າວວ່າ ຈີນຍັງຄົງດຳເນີນນະໂຍບາຍເປັນໄພ ແລະ ມີເຈດຕະນາຮ້າຍຕໍ່ອິນໂດ-ປາຊີຟິກ ແລະ ຮຽກຮ້ອງພັນທະມິດທັງສາມປະເທດຮ່ວມກັນເດັດດ່ຽວຕໍ່ສູ້ກັບອິດທິພົນຂອງລັດຖະບານຈີນ.

ພາບຈາກຊ້າຍໄປຂວາ: ທ່ານ ສຸພົມມະນະຍຳ ໄຊສັງກະ, ທ່ານ ໂທຊິມິດສຶ ໂມເຕງິ, ທ່ານ ໂຊຊິຮິເດະ ຊຶງະ, ທ່ານ ນາງ ມາຣິສ ເພນ ແລະ ທ່ານ ໄມ ພອມແພວ.

ແຕ່ກະຊວງການຕ່າງປະເທດຍີ່ປຸ່ນ ອອກຖະແຫຼງການກ່ຽວກັບການປະຊຸມຄັ້ງນີ້ພຽງວ່າ ທ່ານ ໂທຊິມິດສຶ ໂມເຕງິ  ຫາລືສອງຝ່າຍກັບທ່ານ ໄມ ພອມແພວ ແລະ ປະຊຸມຮ່ວມກັບລັດຖະບານຕີກະຊວງການຕ່າງປະເທດອິນເດຍ, ອົດສະຕຣາລີ ແລະ ສ.ອາເມຣິກາ ກ່ຽວກັບສະຖານະການໃນທະເລຈີນຕາເວັນອອກ, ທະເລຈີນໃຕ້ ແລະ ແຫຼມເກົາຫຼີ.

ໃນດ້ານຂອງກະຊວງການຕ່າງປະເທດຈີນ ຍັງບໍ່ມີປະຕິກິລິຍາຕໍ່ການເຄື່ອນໄຫວໃນຍີ່ປຸ່ນຂອງລັດຖະມົນຕີກະຊວງການຕ່າງປະເທດ ສ.ອາເມຣິກາ ແຕ່ເມື່ອອາທິດທີ່ຜ່ານມາກ່າວວ່າ ປະເທດຮ່ວມພູມມິພາກດຽວກັນ ບໍ່ຄວນແບ່ງພັກແບ່ງພວກ.

HTML tutorial