ລັດເຊຍປະສົບຄວາມສຳເລັດການທົດລອງຂີປະນາວຸດເຊີຄອນ ຄວາມໄວເໜືອກວ່າສຽງ 8 ເທົ່າ

ລາຍງານ 8 ຕຸລາ 2020, ຖະແຫຼງການຂອງກອງທັບລັດເຊຍ ເມື່ອວັນພຸດ (7 ຕຸລາ) ທີ່ຜ່ານມາ ກ່າວວ່າຂີປະນາວຸດເຊີຄອນ (Tsirkon ຫຼື Zircon) ຖືກຍິງອອກຈາກເຮືອຮົບ Admiral Gorskhov ໃນທະເລຂາວ, ບໍລິເວນຂົ້ວໂລກເໜືອ ເມື່ອຕອນເຊົ້າວັນອັງຄານ (6 ຕຸລາ) ທີ່ຜ່ານມາ ແລະ ຂີປະນາວຸດສາມາດໂຈມຕີເປົ້າໝາຍທີ່ກຳນົດໄວ້ໃນທະເລແບເຣນ (Barents Sea) ທີ່ຢູ່ຫ່າງອອກໄປ 450 ກິໂລແມັດຢ່າງແມ້ນຢຳ.

ທ່ານ ພົນເອກ ວາເລີຣີ ເກີຣາຊິມັອບ (Valery Gerasimov) ຜູ້ບັນຊາການທະຫານສູງສຸດ ແລະ ຮອງລັດຖະມົນຕີກະຊວງປ້ອງກັນປະເທດລັດເຊຍ ລາຍງານຕໍ່ທ່ານ ວະລາດິເມຍ ປູຕິນ ປະທານປະເທດລັດເຊຍ ວ່າການທົດລອງປະສົບຄວາມສຳເລັດ ຕາມແທນທີ່ກຳນົດໄວ້ທຸກປະການ ແລະ ຖືເປັນຄັ້ງທຳອິດທີ່ຂີປະນາວຸດເຊີຄອນໂຈມຕີເປົ້າໝາຍໃນທະເລໄດ້ສຳເລັດ.

ທ່ານ ພົນເອກ ວາເລີຣີ ເກີຣາຊິມັອບ ກ່າວວ່າການທົດລອງຄັ້ງນີ້ ຂີປະນາວຸດເຊີຄອນມີຄວາມໄວເຖິງ 8 ມັກ ຫຼື ໄວເໜືອຄວາມໄວສຽງກວ່າ 8 ເທົ່າ, ກະຊວງປ້ອງກັນປະເທດລັດເຊຍມີແຜນທີ່ຈະຕິດຕັ້ງເຊີຄອນທັງໃນເຮືອຮົບ ແລະ ເຮືອດຳນ້ຳ.

ປີທີ່ຜ່ານມາລັດເຊຍປະກາດການພັດທະນາອາວຸດແຫ່ງອະນາຄົດຮຸ້ນໃໝ່ ທີ່ຫວັງວ່າຈະເອົາຊະນະການແຂ່ງຂັນອາວຸດກັບ ສ.ອາເມຣິກາໄດ້, ໃນຂະນະທີ່ຄວາມເຄັ່ງຕຶງກັບຕາເວັນຕົກກໍ່ຢູ່ລະດັບທີ່ເພີ່ມພູນ.

ທ່ານ ປູຕິນ ກ່າວວ່ການທົດລອງຍິງເຊີຄອນ ບໍ່ພຽງເປັເຫດການທີ່ຍິ່ງໃຫຍ່ສຳລັບກອງທັບລັດເຊຍ ແຕ່ຍັງລວມເຖິງປະຊາຊົນລັດເຊຍທຸກຄົນ ແລະ ກ່າວວ່າເຊີຄອນເປັນອາວຸດທີ່ບໍ່ມີອາວຸດຂອງປະເທດໃນໃນໂລກທຽບເທົ່າ ຈະຊ່ວຍເສີມສ້າງຄວາມເຂັ້ມແຂງດ້ານວຽກງານປ້ອງກັນປະເທດຂອງລັດເຊຍໃນໄລຍະຍາວ.

ໃນລະຫວ່າງການຖະແຫຼງນະໂຍບາຍປະຈຳປີ ຕໍ່ກອງປະຊຸມລັດຖະສະພາ ທີ່ນະຄອນຫຼວງມົດສະກູ ເມື່ອເດືອນກຸມພາ 2019 ທ່ານ ປູຕິນ ກ່າວວ່າລັດເຊຍມີແຜນພັດທະນາອາວຸດຮຸ້ນໃໝ່ ທີ່ສາມາດໂຈມຕີເປົ້າໝາຍທັງໃນທະເລ ແລະ ເທິງບົກໄດ້ໄກເຖິງ 1,000 ກິໂລແມັດ ດ້ວຍຄວາມໄວ 9 ມັກ ຫຼື ໄວກວ່າສຽງ 9 ເທົ່າ.

HTML tutorial