ສປປ.ລາວ-ລັດເຊຍ ສະເຫຼີມສະຫຼອງວັນສ້າງຕັ້ງສາຍພົວພັນ ຄົບຮອບ 60 ປີ

ລາຍງານ 8 ຕຸລາ 2020, ພິທີສະເຫຼີມສະຫຼອງຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດລະຫວ່າງ ສປປ.ລາວ ແລະ ລັດເຊຍ ໄດ້ຈັດຂຶ້ນຢ່າງເປັນທາງການ, ທີ່ໂຮງແຮມ ລາວພລາຊາ ນະຄອນຫຼວງວຽງຈັນ ເມື່ອຕອນຄ່ຳວັນພຸດ (7 ຕຸລາ) ທີ່ຜ່ານມາ, ໂດຍເຂົ້າຮ່ວມພິທີດັ່ງກ່າວມີ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງ ໃນນາມຕາງໜ້າໃຫ້ແກ່ ລັດຖະບານ ສປປ.ລາວ ແລະ ທ່ານ ວະລາດີເມຍ ກາລີນິນ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງລັດເຊຍ ປະຈໍາ ສປປ.ລາວ ຕາງໜ້າໃຫ້ ລັດຖະບານລັດເຊຍ ມີບັນດາລັດຖະມົນຕີ, ຮອງລັດຖະມົນຕີ, ເຈົ້າໜ້າທີ່ຂັ້ນສູງຂອງລາວ, ບັນດາທູຕານຸທູດປະຈໍາ ສປປ.ລາວ ຈໍານວນໜຶ່ງ ແລະ ແຂກຖືກເຊີນຈາກພາກສ່ວນຕ່າງໆ ເຂົ້າຮ່ວມຢ່າງພ້ອມພຽງ.

ພາບ: ບັນຍາກາດການສະເຫຼີມສະຫຼອງວັນສ້າງຕັ້ງສາຍພົວພັນການທູດ ສປປ.ລາວ-ລັດເຊຍ ຄົບຮອບ 60 ປີ, 7 ຕຸລາ 2020.

ທ່ານ ສະເຫຼີມໄຊ ກົມມະສິດ ແລະ ທ່ານ ວະລາດີເມຍ ກາລີນິນ ໄດ້ກ່າວຄໍາເຫັນສະແດງຄວາມຊົມເຊີຍ ແລະ ຕີລາຄາ​ສູງຕໍ່ຜົນສຳເລັດ​ແຫ່ງ​ການພົວພັນ​ຮ່ວມ​ມື​ຕະຫຼອດໄລຍະ 60 ປີຜ່ານ​ມາ ລະຫວ່າງ​ສອງ​ລັດ​ຖະບານ ກໍ່​ຄື​ພາກເອກະຊົນ ແລະ ປະຊາຊົນ​ສອງ​ຊາດລາວ-ລັດ​ເຊຍ.ໃນ​ໄລຍະໃໝ່ນີ້ ການພົວພັນຮ່ວມມືລະຫວ່າງ ສອງປະເທດ ໄດ້ມີບາດກ້າວຂະຫຍາຍຕົວຢ່າງຕໍ່ເນື່ອງ, ການຮ່ວມມືທາງດ້ານການເມືອງ ແລະ ຄວາມໝັ້ນຄົງໄດ້ຮັບການຮັດແໜ້ນ, ສອງປະເທດມີຄວາມເຊື່ອໝັ້ນ, ໄວ້ວາງໃຈ ແລະ ສືບຕໍ່ສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ບົນພື້ນຖານການເປັນປະເທດຄູ່ຮ່ວມຍຸດທະສາດດ້ານຄວາມໝັ້ນຄົງໃນຂົງເຂດອາຊີ-ປາຊີຟິກ; ໄດ້ມີການແລກປ່ຽນການຢ້ຽມຢາມຂອງຄະນະຜູ້ແທນໃນທຸກລະດັບຢ່າງປົກກະຕິ ທັງພາກລັດ ແລະ ເອກະຊົນ.

ພ້ອມດຽວກັນນີ້, ການພົວພັນຮ່ວມມືຂອງສອງປະເທດ ຍັງສືບຕໍ່ເສີມຂະຫຍາຍໃນຫຼາຍດ້ານເຊັ່ນ: ດ້ານ​ເສດຖະກິດ-ການ​ຄ້າ, ການ​ລົງທຶນ, ການທ່ອງທ່ຽວ, ການ​ທະ​ຫານ, ການສຶກ​ສາ-ວັດທະນະທຳ, ສາທາລະນະສຸກ ​ແລະດ້ານ​ອື່ນໆ, ເຊິ່ງເປັນການປະກອບສ່ວນທີ່ສໍາຄັນເຂົ້າໃນການ​ເສີມຂະຫຍາຍ​ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມືທີ່​ມີ​ມາ​ແຕ່​ຍາວ​ນານນັ້ນ ​ມີ​ຄວາມ​ໝັ້ນຄົງໜັກແໜ້ນ ແລະ ມີໝາກຜົນຕົວຈິງຍິ່ງໆຂຶ້ນ.

ໂອກາດ​ດຽວ​ກັນນີ້, ສອງ​ຝ່າຍກໍ່​ໄດ້​ສະແດງ​ຄວາມມຸ້ງ​ຫວັງ​ທີ່​ຈະ​ສືບຕໍ່​ເສີມ​ສ້າງ ແລະ ຮັດ​ແໜ້ນ​ສາຍພົວພັນ​ຮ່ວມ​ມື​ອັນດີ​ໃນ​ປັດຈຸບັນ ລະຫວ່າງ​ສອງ​ປະເທດ ​ໃຫ້​ເຕີບ​ໃຫຍ່ຂະຫຍາຍຕົວ​ຂຶ້ນສູ່ລະດັບໃໝ່​ໃນຕໍ່ໜ້າ ແລະ ​ພິທີສະເຫຼີມສະຫຼອງ​ໃນ​ຄັ້ງ​ນີ້ ແມ່ນ​ເຕັມ​ໄປ​ດ້ວຍ​ບັນຍາ​ກາດ​ແຫ່ງ​ໄມຕີຈິດມິດຕະພາບ​ອັນ​ອົບອຸ່ນ.

ພາບ: ບັນຍາກາດການສະເຫຼີມສະຫຼອງວັນສ້າງຕັ້ງສາຍພົວພັນການທູດ ສປປ.ລາວ-ລັດເຊຍ ຄົບຮອບ 60 ປີ, 7 ຕຸລາ 2020.

ພາບ: ບັນຍາກາດການສະເຫຼີມສະຫຼອງວັນສ້າງຕັ້ງສາຍພົວພັນການທູດ ສປປ.ລາວ-ລັດເຊຍ ຄົບຮອບ 60 ປີ, 7 ຕຸລາ 2020.

HTML tutorial