ລັດເຊຍ ນຳອາກເມນີ – ອາແຊກໄບຊານເຂົ້າສູ່ໂຕະເຈລະຈາຢ່າເສິກຍາດແຍ່ງດິນແດນ

ລາຍງານ 10 ຕຸລາ 2020, ທ່ານ ເຊີເກ ລາວາຣົບ ລັດຖະມົນຕີກະຊວງການຕ່າງປະເທດລັດເຊຍ ກ່າວຖະແຫຼງໃນວັນເສົານີ້ ວ່າການຢຸດຍິງໃນເຂດນາກໍໂນ-ຄາຣາບັກ ເຊິ່ງເປັນເຂດຄວາມຂັດແຍ່ງທາງດິນແດນລະຫວ່າງອາກເມນີ ແລະ ອາແຊກໄບຊານ ມີຜົນນັບຕັ້ງເວລາ 12:00 ໂມງ ຂອງວັນທີ 10 ຕຸລານີ້ ຕາມເວລາທ້ອງຖິ່ນຂອງນະຄອນຫຼວງມົດສະກູ (16:00 ໂມງ ຕາມເວລາໃນປະເທດລາວ).

ຫຼັງຈາກນັ້ນ, ທັງສອງປະເທດຈະເຂົ້າສູ່ຂະບວນການດ້ານມະນຸດສະທຳ ທີ່ລວມເຖິງການສົ່ງສົບຜູ້ເສຍຊີວິດຂອງແຕ່ລະຝ່າຍ ແລະ ການແລກປ່ຽນຊະເລີຍເສິກ ໂດຍຂະບວນການທັງໝົດຕ້ອງເປັນໄປຕາມລະບຽບຂອງອົງການກາແດງສາກົນ (ICRC).

ຂະນະດຽວກັນ, ອາກເມນີ ແລະ ອາແຊກໄບຊານຍັງເຫັນດີຮ່ວມກັນ ໃຫ້ມີການເຈລະຈາສັນຕິພາບຮອບໃໝ່ຢ່າງເປັນທາງການ ຕາມແນວທາງຂອງອົນການຄວາມໝັ້ນຄົງ ແລະ ການຮ່ວມມືເອີຣົບ (OSCE) ທີ່ເຮັດໜ້າທີ່ເປັນຜູ້ໄກ່ເກ່ຍ ແລະ ກຸ່ມມິນທີ່ສ້າງຕັ້ງຂຶ້ນ ເມື່ອປີ 1992 ຕາມມະຕິຂອງ OSCE ທີ່ປະກອບດ້ວຍ ສ.ອາເມຣິກາ, ຝຣັ່ງ ແລະ ລັດເຊຍ ຈະເຂົ້າຮ່ວມການປຶກສາຫານຳ.

ຕໍ່ມາກະຊວງການຕ່າງປະເທດລັດເຊຍໃຫ້ຂໍ້ມູນເພີ່ມເຕີມ ວ່າການເຈລະຈາຄັ້ງນີ້ເກີດຂຶ້ນຕາມຄຳເຊີນຂອງທ່ານ ວະລາດິເມຍ ປູຕິນ ປະທານປະເທດລັດເຊຍ ໃຊ້ເວລາປຶກສາຫາລືກວ່າ 10 ຊົ່ວໂມງ ເລີ່ມຕັ້ງແຕ່ຕອນບ່າຍຂອງວັນສຸກ ຕາມເວລາທ້ອງຖິ່ນ ໂດຍທ່ານ ເຊີເກ ລາວາຣົບ, ທ່ານ ເຈຢຸນ ເບຣາມັອບ (Jeyhun Bayramov) ລັດຖະມົນຕີກະຊວງການຕ່າງປະເທດອາແຊກໄບຊານ ແລະ ທ່ານ ໂຊຣາບ ເອມມາດສະຄານຽນ (Zohrab Mnatsakanyan) ລັດຖະມົນຕີກະຊວງການຕ່າງປະເທດອາກເມນີ ລົງນາມໃນຂໍ້ຕົກລົງດັ່ງກ່າວ.

ເຖິງຢ່າງໃດກໍ່ຕາມ, ລັດຖະມົນຕີກະຊວງການຕ່າງປະເທດອາແຊກໄບຊານ ແລະ ອາກເມນີປະຕິເສດໃຫ້ສຳພາດ ຕ່າງຝ່າຍຕ່າງກຽມຕົວເດີນທາງກັບທັນທີ ພາຍຫຼັງສຳເລັດການພົບປະຫາລືກັບທ່ານ ເຊີເກ ລາວາຣົບ.

ສຳລັບການສູ້ຮົບຄັ້ງຫຼ້າສຸດໃນເຂດນາກໍໂນ-ຄາຣາບັກ ເປີດສາກຂຶ້ນເມື່ອວັນທີ 27 ກັນຍາ ທີ່ຜ່ານມາ ສົ່ງຜົນໃຫ້ມີຜູ້ເສຍຊີວິດຫຼາຍກວ່າ 400 ຄົນ, ຂະນະທີ່ລັດຖະບານອາກເມນີ ແລະ ອາແຊກໄບຊານຕ່າງກ່າວຫາເຊິ່ງກັນ ແລະ ກັນວ່າເລີ່ມໃຊ້ຄວາມຮຸນແຮງກ່ອນ, ໃນດ້ານຂອງຕວັກກີ ທີ່ສະໜັບສະໜູນອາແຊກໄບຊານຍັງບໍ່ມີປະຕິກິລິຍາຢ່າງເປັນທາງການຕໍ່ຂໍ້ຕົກລົງຢຸດຍິງຄັ້ງນີ້.

ເຊິ່ງເຂດນາກໍໂນ-ຄາຣາບັກ ມີເນື້ອທີ່ປະມານ 4,400 ຕາລາງກິໂລແມັດ ຕັ້ງຢູ່ທາງທິດໃຕ້ຂອງສາຍພູຄໍເຄຊັດ ຫ່າງຈາກຊາຍແດນອາກເມນີປະມານ 50 ກິໂລແມັດ ປະຊາຊົນທີ່ອາໄສຢູ່ໃນເຂດດັ່ງກ່າວສ່ວນໃຫຍ່ມີເຊື້ອສາຍອາກເມນີ ແຕ່ອົງການສະຫະປະຊາຊາດ ຮັບຮອງເຂດດັ່ງກ່າວເປັນດິນແດນຂອງອາແຊກໄບຊານ.

HTML tutorial