ເກົາຫຼີເໜືອຈັດສະແດງຂີປະນາວຸດຂ້າມທະວີບຮຸ້ນໃໝ່ ອອກສູ່ສາຍຕາຊາວໂລກ

ລາຍງານ 12 ຕຸລາ 2020, ໃນຕອນໜຶ່ງຂອງການເດີນສວນສະໜາມໂດຍກອງທັບປະຊາຊົນເກົາຫຼີ ທີ່ຈັດຂຶ້ນເມື່ອຕອນເຊົ້າມືດຂອງວັນເສົາ (10 ຕຸລາ) ທີ່ຜ່ານມາ ເພື່ອສະເຫຼີມສະຫຼອງເນື່ອງໃນໂອກາດຄົບຮອບ 75 ປີ ການສ້າງຕັ້ງພັກແຮງງານເກົາຫຼີ ມີການສະແດງຂີປະນາວຸດຂ້າມທະວີບ (ICBM)  ທີ່ມີຄວາມຍາວບໍ່ໜ້ອຍກວ່າ 11 ລໍ້ລົດ ເຊິ່ງຫາກເກົາຫຼີເໜືອນຳອອກມາໃຊ້ງານຈິງ ຈະຖືເປັນໜຶ່ງໃນ ICBM ທີ່ມີຄວາມຍາວທີ່ສຸດ.

ພາບ: KCNA

ຂະນະດຽວກັນ, ກອງທັບປະຊາຊົນເກົາຫຼີຍັງນຳ “ຮວາຊອງ-15” ເຊິ່ງເປັນ ICBM ທີ່ເກົາຫຼີເໜືອທົດລອງຄັ້ງຫຼ້າສຸດເມື່ອເດືອນພະຈິກ 2017 ແລະ ຫຼາຍຝ່າຍເຊື່ອວ່າເປັນ ICBM ທີ່ຮຸນແຮງທີ່ເກົາຫຼີເໜືອພັດທະນາຂຶ້ນເອງ ໂດຍມີພິໄສການຍິງໄດ້ໄກເຖິງແຜ່ນດິນໃຫຍ່ ສ.ອາເມຣິກາ, ນອກຈາກນີ້ຍັງມີການນຳຂີປະນາວຸດນຳວິຖີຍິງຈາກເຮືອດຳນ້ຳ ທີ່ເປັນຮຸ້ນໃໝ່ອອກມາສະແດງອີກດ້ວຍ.

ເຖິງຢ່າງໃດກໍ່ຕາມ, ຜູ້ນຳເກົາຫຼີເໜືອບໍ່ໄດ້ກ່າວເຖິງ ສ.ອາເມຣິກາໃນພິທີດັ່ງກ່າວ ແຕ່ເນັ້ນໜັກການຍ້ອງຍໍຊົມເຊີຍກອງປະຊາຊົນເກົາຫຼີ ທັງໃນດ້ານການປ້ອງກັນປະເທດ ແລະ ພາລະກິດການຕໍ່ຕ້ານພະຍາດໂຄວິດ-19 ທີ່ເກົາຫຼີເໜືອບໍ່ມີຜູ້ຕິດເຊື້ອແມ່ນແຕ່ຄົນດຽວ ພ້ອມທັງກ່າງເຖິງການພັດທະນາເສດຖະກິດ ແລະ ຄວາມໝັ້ນຄົງຂອງຊາດ.

HTML tutorial