ອຸຕຸເຕືອນພາກເໜືອ ແລະ ພາກກາງໃຫ້ກຽມພ້ອມຮັບມືກັບພາຍຸ “ນັງກາ” ທີ່ກຳລັງເຄື່ອນທີ່ມາ

ລາຍງານ 13 ຕຸລາ 2020, ກົມອຸຕຸນິຍົມ ແລະ ອຸທົກກະສາດ ອອກແຈ້ງເຕືອນໄພພາຍຸໝຸນເຂດຮ້ອນ ນັງກາ (Nangka) ທີ່ໄດ້ປົກຄຸມຢູ່ເຂດທະເລຈີນໃຕ້ຕອນເທິງ ພວມເຄື່ອນທີ່ມາທາງທິດຕາເວັນຕົກ ດ້ວຍຄວາມໄວ 20 ກິໂລແມັດຕໍ່ຊົ່ວໂມງ.

ພາຍຸຫົວນີ້ ຈະເຄື່ອນທີ່ຜ່ານເກາະໄຮໜຳ ໃນຄືນຂອງວັນອັງຄານນີ້ ແລະ ໃນຕອນເຊົ້າວັນທີ 14 ຕຸລາ 2020 ຈະເຄື່ອນທີ່ຂຶ້ນຝັງທາງພາກເໜືອດ້ານຕາເວັນອອກຂອງຫວຽດາມ ແລະ ຈະສືບຕໍ່ເຄື່ອນທີ່ເຂົ້າຜ່ານທາງພາກກາງ ແລະ ພາກເໜືອຂອງ ສປປ.ລາວ ເຊິ່ງຈະເຮັດໃຫ້ມີຝົນຕົກໃນລະດັບປານກາງ ຫາ ຕົກໜັກ ແລະ ຕົກໜັກຫຼາຍພ້ອມມີລົດພັດດແຮງຢູ່ບັນດາແຂງພາກເໜືອ ແລະ ພາກກາງໃນໄລຍະວັນທີ 14-16 ຕຸລາ 2020 ນີ້.

ດັ່ງນັ້ນ, ຈຶ່ງຂໍແຈ້ງເຕືອນຜູ້ທີ່ອາໄສຢູ່ແຂວງພາກເໜືອ ແລະ ພາກກາງເຊັ່ນ: ຫຼວງພະບາງ, ຊຳເໜືອ, ຊຽງຂວາງ, ບໍລິຄຳໄຊ ແລະ ຄຳມ່ວນ ຈົ່ງມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ ທີ່ຈະເຮັດໃຫ້ມີຕົ້ນໄມ້ຫັກ ແລະ ເສົາໄຟຟ້າລົ້ມ, ເຮືອນເປ່ເພ, ນ້ຳຖ້ວມຊຸ, ດິນເຈື່ອນ ແລະ ນ້ຳຖ້ວມອັ່ງ ພ້ອມນີ້ໃຫ້ຍົກຍ້າຍວັດຖຸສິ່ງຂອງ ແລະ ສັດລ້ຽງໄປໄວ້ບ່ອນທີ່ປອດໄພ.

HTML tutorial