ສ.ອາເມຣິກາກ່າວວ່າ ຈີນຄືບັນຫາທີ່ທຸກຄົນຕັ້ງໃຈແນມຂ້າມ ພ້ອມຮ່ວມອິນເດຍສູ້ຕ້ານອິດທິພົນຈີນ

ລາຍງານ 13 ຕຸລາ 2020, ທ່ານ ສະຕີເຟນ ບີກັນ ຮອງລັດຖະມົນຕີກະຊວງການຕ່າງປະເທດ ສ.ອາເມຣິກາ ເຂົ້າຮ່ວມງານເສວະນາອິນເດຍ-ສ.ອາເມຣິກາ ທີ່ນະຄອນຫຼວງນິວເຄລີ ເມື່ອວັນຈັນ (12 ຕຸລາ) ທີ່ຜ່ານມາ ໂດຍກ່າວໃນຕອນໜຶ່ງ ຊົມເຊີຍລັດຖະບານອິນເດຍທີ່ມີອິດສະຫຼະພາບໃນການປົກຄອງຕົນເອງສູງ ແລະ ໜ້າພາກພູມໃຈໃນວັດທະນະທຳທີ່ເປັນເອກະລັກ ລັດຖະບານ ສ.ອາເມຣິກາບໍ່ເຄີຍຄິດຈະປ່ຽນແປງອິນເດຍ ແຕ່ຕ້ອງການສະໜັບສະໜູນເພື່ອເສີມສ້າງຄວາມສາມາດຂອງອີກຝ່າຍໃຫ້ສາມາດປົກປ້ອງອະທິປະໄຕ ແລະ ປະຊາທິປະໄຕ ຕະຫຼອດຮອດການຂະຫຍາຍຂອບເຂດຜົນປະໂຫຍດຂອງອິນເດຍໃຫ້ທົ່ວເຖິງພູມມິພາກອິນໂດ-ປາຊີຟິກ.

ເຊິ່ງໜຶ່ງໃນແນວທາງຂອງ ສ.ອາເມຣິກາ ຕາມທີ່ທ່ານ ສະຕີເຟນ ບີກັນ ກ່າວເຖິງຄືການຍົກລະດັບຂໍ້ຕົກລົງດ້ານອາວຸດ ແລະ ການຮ່ວມມືຂ່າວກອງກັບລັດຖະບານອິນເດຍ ໂດຍການທີ່ລັດຖະບານ ສ.ອາເມຣິກາພະຍາຍາມລຸກໜ້າດ້ານນະໂຍບາຍມາຍັງຂົງເຂດນີ້ຫຼາຍຂຶ້ນ ເນື່ອງຈາກຄວາມພະຍາຍາມແຜ່ຂະຫຍາຍອິດທິພົນຂອງຈີນ ທີ່ເກີດຂຶ້ນໃນເວລາດຽວກັນ “ເຊິ່ງສະຖານະການດັ່ງກ່າວເປັນບັນຫາທີ່ທຸກຝ່າຍຮັບຮູ້ດີ ແຕ່ຜັດເລືອກທີ່ຈະແນມຂ້າມ ບໍ່ວ່າດ້ວຍເຫດຜົນອັນໃດກໍ່ແລ້ວແຕ່”.

ພາບຈາກຊ້າຍໄປຂວາ: ທ່ານ ສຸພົມມະນະຍຳ ໄຊສັງກະ ລັດຖະມົນຕີກະຊວງການຕ່າງປະເທດອິນເດຍ, ທ່ານ ໂມເຕງິ ໂທຊິມຶດຊຶ ລັດຖະມົນຕີກະຊວງການຕ່າງປະເທດຍີ່ປຸ່ນ, ທ່ານ ນາງ ມາຣິສ ເພນ ລັດຖະມົນຕີກະຊວງການຕ່າງປະເທດອົດສະຕຣາລີ ແລະ ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ, ປະຊຸມກຸ່ມ Quad ທີ່ນະຄອນຫຼວງໂຕກຽວ, 6 ຕຸລາ 2020.

ການເຄື່ອນໄຫວດັ່ງກ່າວຂອງທ່ານ ສະຕີເຟນ ບີກັນເກີດຂຶ້ນພຽງອາທິດດຽວ ພາຍຫຼັງທີ່ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ເດີນທາງຢ້ຽມຢາມນະຄອນຫຼວງໂຕກຽວ ເພື່ອປຶກສາຫາລືກັບລັດຖະບານຕີກະຊວງການຕ່າງປະເທດຂອງພັນທະມິດອີກ 3 ປະເທດໃນນາມ “Quad” ໄດ້ແກ່ອິນເດຍ, ຍີ່ປຸ່ນ ແລະ ອົດສະຕຣາລີ ໂດຍລັດຖະມົນຕີກະຊວງການຕ່າງປະເທດ ສ.ອາເມຣິກາຢືນຢັນວ່າ ຈີນຍັງຄົງດຳເນີນນະໂຍບາຍເປັນໄພ ແລະ ປອງຮ້າຍຕໍ່ອິນໂດ-ປາຊີຟິກ ພ້ອມທັງຮຽກຮ້ອງໃຫ້ກຸ່ມ Quad ຮ່ວມກັນເດັດດ່ຽວຕໍ່ສູ້ກັບອິດທິພົນຂອງລັດຖະບານຈີນ.

HTML tutorial