ສປປ.ລາວ-ຈີນລົງນາມແລກປ່ຽນສິດພິເສດພາສີ 0% ໃຫ້ແກ່ 97% ຂອງລາຍການສິນຄ້າທັງໝົດ

ລາຍງານ 14 ຕຸລາ 2020, ກະຊວງການຕ່າງປະເທດໃຫ້ຮູ້ວ່າ: ທ່ານ ສະ​ເຫຼີມ​ໄຊ ກົມມະ​ສິດ ລັດຖະມົນຕີ​ກະຊວງການ​ຕ່າງປະ​ເທດ ໄດ້​​ພົບ​ປະ​ສອງ​ຝ່າຍກັບທ່ານ ຫວັງ ອີ້ ທີ່ປຶກສາແຫ່ງລັດ, ລັດຖະມົນຕີກະຊວງການຕ່າງປະເທດຈີນ ໃນໂອກາດເດີນທາງຢ້ຽມຢາມ ສປປ.ລາວ ລະຫວ່າງວັນທີ 13-14 ຕຸລານີ້ ທີ່ຫໍປະຊຸມແຫ່ງຊາດນະຄອນຫຼວງວຽງຈັນ.

ພາບ: ບັນຍາກາດການພົບປະສອງຝ່າຍ ສປປ.ລາວ-ສປ.ຈີນ, ນະຄອນຫຼວງວຽງຈັນ, 14 ຕຸລາ 2020

ໃນການພົບປະຄັ້ງນີ້, ສອງຝ່າຍໄດ້ຕີລາຄາສູງ ຕໍ່ການພົວພັນແບບຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊະຕາກຳລາວ-ຈີນ ແລະ ຈີນ-ລາວ ລະຫວ່າງສອງພັກ ແລະ ສອງລັດຖະບານ ກໍ່ຄື ປະຊາຊົນສອງຊາດ.

ສອງຝ່າຍໄດ້ສະແດງການສະໜັບສະໜູນນະໂຍບາຍ “ໜຶ່ງແລວ ໜຶ່ງເສັ້ນທາງ” ຂອງ ສປ.ຈີນ ທີ່ຈະນໍາຜົນປະໂຫຍດອັນໃຫຍ່ຫຼວງ ມາໃຫ້ແກ່ບັນດາປະເທດຕ່າງໆທີ່ເຂົ້າຮ່ວມ ໂດຍສະເພາະ ສຳລັບ ສປປ.ລາວ ແມ່ນໄດ້ໃຫ້ຄວາມສຳຄັນ ແລະ ເຂົ້າຮ່ວມຢ່າງຕັ້ງໜ້າ ໂດຍໄດ້ເຊື່ອມໂຍງ ລະຫວ່າງຍຸດທະສາດ “ການຫັນປະເທດບໍ່ມີຊາຍແດນຕິດກັບທະເລ ເປັນປະເທດເຊື່ອມໂຍງເຊື່ອມຈອດ” ຂອງ ສປປ.ລາວ ເຂົ້າກັບຍຸດທະສາດ “ໜຶ່ງແລວ ໜຶ່ງເສັ້ນທາງ” ຂອງ ສປ.ຈີນ, ໂດຍຖືເອົາການກໍ່ສ້າງທາງລົດໄຟ ລາວ-ຈີນ ແລະ ທາງດ່ວນ ວຽງຈັນ-ວັງວຽງ, ວັງວຽງ-ຫຼວງພະບາງ, ຫຼວງພະບາງ-ອຸດົມໄຊ ໄປຈົນຮອດຊາຍແດນ ລາວ-ຈີນ ດ່ານບໍ່ເຕັນ-ບໍ່ຫານ ເປັນໜຶ່ງໃນການເຊື່ອມໂຍງຍຸດທະສາດ ອັນສຳຄັນຂອງສອງປະເທດ ແລະ ຖືເປັນສອງເສັ້ນທາງທີ່ສຳຄັນ ໃນການປະຕິບັດແລວເສດຖະກິດ ລາວ-ຈີນ, ຈີນ-ລາວ.

ໂຄງການກໍ່ສ້າງທາງລົດໄຟ ລາວ-ຈີນ ໃນປັດຈຸບັນແມ່ນມີຄວາມຄືບໜ້າຫຼາຍກວ່າ 90,7% ແລະ ໂຄງການທາງດ່ວນ ວຽງຈັນ-ວັງວຽງ ແມ່ນມີຄວາມຄືບໜ້າຫຼາຍກວ່າ 90% ແລະ ຄາດວ່າ ຈະເປີດນຳໃຊ້ ໃນວັນທີ 02 ທັນວາ 2020 ນີ້. ນອກຈາກນີ້, ຍັງມີໂຄງການຮ່ວມມືອື່ນໆທີ່ສຳຄັນ ເຊັ່ນ: ໂຄງການກໍ່ສ້າງໂຮງໝໍມະໂຫສົດຫຼັງໃໝ່ ທີ່ໄດ້ກໍ່ສ້າງສຳເລັດແລ້ວ 60% ແລະ ຄາດວ່າ ຈະສໍາເລັດການກໍ່ສ້າງ ໃນປີ 2021, ໂຄງການແລວທາງເສດຖະກິດ ລາວ-ຈີນ ແລະ ໂຄງການສ້າງສູນກວດພະຍາດ ໂຄວິດ-19 ໃຫ້ແກ່ກະຊວງສາທາລະນະສຸກ.

ສອງຝ່າຍໄດ້ສະແດງຄວາມຍິນດີທີ່ເຫັນວ່າ ໄດ້ມີການຂະຫຍາຍຕົວສູງໃນຊຸມປີຜ່ານມາ, ໃນປີ 2019 ສປ.ຈີນ ເປັນປະເທດລົງທຶນອັນດັບ 1 ຢູ່ ສປປ.ລາວ ມີຈຳນວນເຖິງ 785 ໂຄງການ, ລວມມູນຄ່າ 12 ຕື້ໂດລາສະຫະລັດ ແລະ ປະເທດຄູ່ຄ້າລາຍໃຫຍ່ ອັນດັບ 2 ຂອງ ສປປ.ລາວ, ມີມູນຄ່າການຄ້າບັນລຸໄດ້ 3,540 ລ້ານໂດລາສະຫະລັດ ເພີ່ມຂຶ້ນ 17.4%, ມູນຄ່າການນໍາເຂົ້າມີ 1,600 ລ້ານໂດລາ ສະຫະລັດ ເພີ່ມຂຶ້ນ 29.6% ແລະ ມູນຄ່າສົ່ງອອກມີ 1,940 ລ້ານໂດລາສະຫະລັດ ເພີ່ມຂຶ້ນ 8.9% ເມື່ອທຽບໃສ່ໄລຍະດຽວກັນຂອງປີຜ່ານມາ.

ສອງຝ່າຍຍັງຕົກລົງເຫັນດີໃນການຈັດຕັ້ງປະຕິບັດຊ່ອງທາງໄວຮ່ວມກັນ (Fast-Track Lane) ໃນໄລຍະການແຜ່ລະບາດຂອງພະຍາດ ໂຄວິດ-19 ເພື່ອສົ່ງເສີມການໄປມາຫາສູ່ກັນລະຫວ່າງພະນັກງານ, ເຈົ້າໜ້າທີ່ກ່ຽວຂ້ອງ ກໍ່ຄືແຮງງານ ແລະ ຊ່ຽວຊານ ສຳລັບໂຄງການໃຫຍ່ໆທີ່ສຳຄັນລະຫວ່າງສອງປະເທດ, ເຊິ່ງຊ່ອງທາງດັ່ງກ່າວ ຈະເປັນການປະກອບສ່ວນເຂົ້າໃນການສົ່ງເສີມການຮ່ວມມື ເພື່ອຊ່ວຍຟື້ນຟູເສດຖະກິດຂອງ ສປປ.ລາວ ກໍ່ຄືເຮັດໃຫ້ການປະຕິບັດໂຄງການຕ່າງໆຂອງ ສປ.ຈີນ ຢູ່ ສປປ.ລາວ ສຳເລັດຕາມຄາດໝາຍ.

ພ້ອມນັ້ນ, ສອງຝ່າຍຍັງເຫັນດີໃນດ້ານຫຼັກການ ໃຫ້ເປີດນຳໃຊ້ຊ່ອງທາງສີຂຽວ ເພື່ອອຳນວຍຄວາມສະດວກໃຫ້ແກ່ລົດບັນທຸກສິນຄ້າຜ່ານແດນລາວ-ຈີນ, ຈີນ-ລາວ ຢູ່ດ່ານສາກົນບໍ່ເຕັນ-ບໍ່ຫານ ແຂວງຫຼວງນໍ້າທາ ໃຫ້ມີຄວາມວ່ອງໄວຂຶ້ນ.

ນອກຈາກນີ້, ສອງຝ່າຍຍັງໄດ້ປຶກສາຫາລື ກ່ຽວກັບທິດທາງແຜນການຮ່ວມມືໃນຕໍ່ໜ້າ ໂດຍສະເພາະແມ່ນ ການສະເໜີແຜນການສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ-ຈີນ, ຈີນ-ລາວ ຄົບຮອບ 60 ປີ ແລະ ປີມິດຕະພາບ ລາວ-ຈີນ ໃນປີ 2021, ພ້ອມທັງປຶກສາຫາລື ກ່ຽວກັບການສືບຕໍ່ຮ່ວມມືກັນຢ່າງໃກ້ຊິດ ແລະ ຊ່ວຍເຫຼືອຊຶ່ງກັນ ແລະ ກັນ ໃນການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ເພື່ອປ້ອງກັນບໍ່ໃຫ້ກັບມາລະບາດອີກຮອບໃໝ່.

ພາບ: ບັນຍາກາດການພົບປະສອງຝ່າຍ ສປປ.ລາວ-ສປ.ຈີນ, ນະຄອນຫຼວງວຽງຈັນ, 14 ຕຸລາ 2020

ພາຍຫຼັງສຳເລັດການພົບປະສອງຝ່າຍໄດ້ມີການແລກປ່ຽນຈົດໝາຍແລກປ່ຽນໂຄງການຊ່ວຍເຫຼືອລ້າ 3 ສະບັບ ຄື: 1.) ໂຄງການຊ່ວຍເຫຼືອລ້າ ກ່ຽວກັບອຸປະກອນຕ້ານໄຂ້ເລືອດອອກ; 2.) ໂຄງການພື້ນຖານໂຄງລ່າງ ການພັດທະນາຊົນນະບົດ ໄລຍະ 2; ແລະ 3.) ໂຄງການແລກປ່ຽນລະຫວ່າງລັດຖະບານລາວ ແລະ ລັດຖະບານຈີນ ກ່ຽວກັບການຮັບເອົາສິດພິເສດທາງດ້ານພາສີ 0% ໃຫ້ແກ່ 97% ຂອງລາຍການສິນຄ້າທັງໝົດ (GSP 97%).

ໃນໂອກາດຢ້ຽມຢາມທາງການ ສປປ.ລາວ ໃນຄັ້ງນີ້ ລັດຖະມົນຕີກະຊວງການຕ່າງປະເທດຈີນ ພ້ອມດ້ວຍຄະນະຍັງໄດ້ເຂົ້າພົບທ່ານ ບຸນຍັງ ວໍລະຈິດ ປະທານປະເທດ ທີ່ທຳນຽບປະທານປະເທດ ແລະ ທ່ານ ທອງລຸນ ສີສຸລິດ ນາຍົກລັດຖະມົນຕີ ທີ່ສຳນັກງານນາຍົກລັດຖະມົນຕີ.

HTML tutorial