ສປ.ຈີນ-ລັດເຊຍ-ກູບາ ໄດ້ຮັບເລືອກຕັ້ງເປັນສະມາຊິກສະພາສິດທິມະນຸດ UN

ລາຍງານ 14 ຕຸລາ 2020, ສະມັດຊາໃຫຍ່ອົງການສະຫະປະຊາຊາດ (UNGA) ທັງ 193 ປະເທດ ໄດ້ມີການເລືອກຕັ້ງເມື່ອວັນອັງຄານ (13 ຕຸລາ) ທີ່ຜ່ານມາ ເພື່ອຄັດເລືອກສະມາຊິກສະພາສິດທິມະນຸດແຫ່ງອົງການປະຫະປະຊາຊາດ (UNHRC) ຊຸດໃໝ່ 15 ປະເທດ ຈາກທັງໝົດ 47 ປະເທດ ໂດຍຈະມີວາລະດຳລົງຕຳແໜ່ງລະຫວ່າງປີ 2021-2023 ເລີ່ມຕັ້ງແຕ່ວັນທີ 1 ມັງກອນ 2021 ເປັນຕົ້ນໄປ.

ໂດຍສະມາຊິກ UNHRC 2021-2023 ທີ່ໄດ້ຮັບຄັດເລືອກປະກອບມີ: ສປ.ຈີນ, ປາກິດສະຖານ, ເນປານ, ເຊເນການ, ອູແກຣນ, ແມັກຊິກ, ກົດດີວົວ, ກາບົງ, ມາລາວີ, ອຸດສະເບກິດສະຖານ, ລັດເຊຍ, ໂບລິວີ, ກູບາ, ຝຣັ່ງ ແລະ ອັງກິດ.

ເຊິ່ງປາກິດສະຖານ, ເນປານ, ເຊເນການ, ອູແກຣນ, ແມັກຊິກ ແລະ ສປ.ຈີນ ຄັ້ງນີ້ຖືເປັນການໄດ້ຮັບຄັດເລືອກໃຫ້ດຳລົງຕຳແໜ່ງເປັນສະໄໝທີ 2, ເຖິງແມ່ນວ່າ ສປ.ຈີນ ຈະໄດ້ຮັບການສະໜັບສະໜູນ 139 ຄະແນນ ຫຼຸດລົງ 20% ເມື່ອທຽບກັບການໄດ້ຮັບເລືອກຕັ້ງເມື່ອປີ 2016 ຈາກ 180 ຄະແນນ.

ໃນດ້ານຂອງທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ວິຈານການທີ່ຈີນ ແລະ ລັດເຊຍໄດ້ຮັບເລືອກຕັ້ງ ໃນຂະນະທີ່ເວເນຊູເອລາກໍ່ຍັງຄົງຢູ່ໃນວາລະ ໄດ້ຢ້ຳເຖິງຄວາມຖືກຕ້ອງ ໃນການທີ່ລັດຖະບານ ສ.ອາເມຣິກາຖອນຕົວອອກຈາກການເປັນສະມາຊິກ UNHRC ທີ່ເຄີຍເປັນຄະນະປະຕິບັດງານທີ່ມີຈະລິຍະທຳ ເຖິງແມ່ນວ່າສະຖານະການປັດຈຸບັນແມ່ນກົງກັນຂ້າມ ແຕ່ ສ.ອາເມຣິກາຈະຍັງຄົງຍຶດໝັ້ນໃນການເປັນປະເທດຮັກສາສິດທິມະນຸດໃນໂລກຕໍ່ໄປ.

ເຊິ່ງ UNGA ມີມະຕິໃຫ້ສ້າງຕັ້ງ UNHRC ເມື່ອປີ 2006 ແທນຄະນະກຳມາທິການສິດທິມະນຸດອົງການສະປະຊາຊາດ (UNCHR) ໂດຍ UNGA ຈະລົງມະຕິເລືອກສະມາຊິກ 47 ປະເທດ ເຊິ່ງເປັນການຈັດສັນຕາມອັດຕາສ່ວນຂອງແຕ່ລະພູມມິພາກ ໃຫ້ໝຸນວຽນກັນເຮັດໜ້າທີ່ໃນ UNHRC ຄັ້ງລະ 3 ປີ ໂດຍວາລະສູງສຸດຄື 2 ສະໄໝ ຫຼື 6 ປີ, ປັດຈຸບັນອາຟຣິກາ ແລະ ອາຊີເປັນ 2 ທະວີທີ່ໄດ້ຮັບໂຄຕ້າຫຼາຍທີ່ສຸດ ຄືທະວີບລະ 13 ປະເທດ, ສ່ວນ ສ.ອາເມຣິກາເຄີຍໄດ້ດຳລົງຕຳແໜ່ງ 2 ສະໄໝ ຕິດຕໍ່ກັນມາແລ້ວ ໃນສະໄໝການເປັນປະທານປະເທດຂອງທ່ານ ບາຣັກ ໂອບາມາ ແລະ ຖືເປັນປະເທດທຳອິດທີ່ລາອອກຈາກ UNHRC ກ່ອນຄົບວາລະ.

HTML tutorial