ສະຫວັນນະເຂດ, ຄຳມ່ວນ, ສາລະວັນ ແລະ ເຊກອງກຽມຮັບມືພາຍຸໄຕ້ຝຸ່ນໂຊເດວ

ລາຍງານ 23 ຕຸລາ 2020, ກົມອຸຕຸນິຍົມ ແລະ ອຸທົກກະສາດ ອອກແຈ້ງເຕືອນໄພພາຍຸໄຕ້ຝຸ່ນ ໂຊເດວ (Saudel) ທີ່ກຳລັງເຄື່ອນຕົວຢູ່ໃນທະເລຈີນໃຕ້ຕອນກາງ ພ້ອມເຄື່ອນທີ່ມາທາງທິດຕາເວັນຕົກ-ຕາເວັນຕົກສຽງເໜືອ.

ຄາດວ່າພາຍຸດັ່ງກ່າວຈະເຄື່ອນຂຶ້ນຝັ່ງທາງພາກກາງຂອງຫວຽດນາມ ແລະ ສືບຕໍ່ຜ່ານເຂົ້າແຂວງພາກໃຕ້ ແລະ ພາກກາງຂອງ ສປປ.ລາວ ໃນໄລຍະວັນທີ 25-26 ຕຸລານີ້, ເຊິ່ງຈະເຮັດໃຫ້ມີຝົນຕົກໃນລະດັບປານກາງ ຫາ ຕົກໜັກພ້ອມມີລົມພັດແຮງຢູ່ບັນດາແຂວງພາກກາງ ແລະ ພາກໃຕ້ໃນໄລຍະວັນທີ 25-27 ຕຸລານີ້.

ດັ່ງນັ້ນ, ຈຶ່ງເຕືອນເຖິງຜູ້ທີ່ອາໄສຢູ່ແຂວງຄຳມ່ວນ, ສະຫວັນນະເຂດ, ສາລະວັນ ແລະ ເຊກອງ ຈົ່ງມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ ທີ່ຈະເຮັດໃຫ້ລະດັບນ້ຳສາຂາສືບຕໍ່ສູງຂຶ້ນຕື່ມອີກ ແລະ ຈະເຮັດໃຫ້ມີນ້ຳຖ້ວມຊຸ ແລະ ນ້ຳຖ້ວມອັ່ງ ພ້ອມນີ້ໃຫ້ຍົກຍ້າຍວັດຖຸສິ່ງຂອງ ແລະ ສັດລ້ຽງໄປໄວ້ບ່ອນທີ່ປອດໄພ ແລະ ຂໍໃຫ້ຕິດຕາມການແຈ້ງເຕືອນໄພຈາກກົມອຸຕິນິຍົມ ແລະ ອຸທົກກະສາດຢ່າງຕໍ່ເນື່ອງ.