ປ.ປູຕິນວ່າ ຈີນ-ເຢຍລະມັນກຳລັງກ້າວເປັນມະຫາອຳນາດ, ເພາະຄວາມເສື່ອມຖອຍຂອງສ.ອາເມຣິກາ

ລາຍງານ 23 ຕຸລາ 2020, ທ່ານ ວະລາດິເມຍ ປູຕິນ ປະທານປະເທດລັດເຊຍ ຮ່ວມງານເສວະນາຂອງສະໂມສອນວັນໄດ (Valdai)  ໃນນະຄອນຫຼວງມົດສະກູ ເມື່ອວັນພະຫັດ (22 ຕຸລາ) ທີ່ຜ່ານມາ ເຊິ່ງຈັດຂຶ້ນແບບອອນລາຍ ໂດຍຜູ້ນຳລັດເຊຍໃຫ້ຄວາມເຫັນໃນຕອນໜຶ່ງກ່ຽວກັບສະຖານະການໂລກ ວ່າຫາກເບິ່ງຈາກບົດບາດທາງການເມືອງ ແລະ ເສດຖະກິດ ອິດທິພົນຂອງ ສ.ອາຣິກາເສື່ອມຖອຍລົງຢ່າງຕໍ່ເນື່ອງ ເຊັ່ນດຽວກັບອັງກິດ ແລະ ຝຣັ່ງ ແຕ່ໃນທາງກັບກັນຈີນ ແລະ ເຢຍລະມັນກຳລັງກ້າວຂຶ້ນສູ່ການມີສະຖານະເປັນອະພິມະຫາອຳນາດ.

ພາບ: ທ່ານ ວະລາດິເມຍ ປູຕິນ ປະທານປະເທດລັດເຊຍ, ງານເສວະນາສະໂມສອນວັນໄດ (Valdai) , ນະຄອນຫຼວງມົດສະກູ, 22 ຕຸລາ 2020.

ທ່ານ ປູຕິນກ່າວຕໍ່ອີກວ່າ ສ.ອາເມຣິກາບໍ່ສາມາດອ້າງການເປັນຜູ້ມີອະພິສິດຢູ່ເໜືອກົດໝາຍ ແລະ ຂະບວນການທຸກຢ່າງໃນໂລກ ຕະຫຼອດຮອດການຕັ້ງກົດເກນຂຶ້ນມາເອງ ແລະ ຂົ່ມຂູ່ໃຫ້ທຸກປະເທດຕ້ອງປະຕິບັດຕາມໄດ້ອີກຕໍ່ໄປ ແລະ ພາຍຫຼັງ ສ.ອາເມຣິກາສຳເລັດການເລືອກຕັ້ງປະທານປະເທດໃນວັນທີ 3 ພະຈິກ ທີ່ຈະມາເຖິງນີ້ ລັດເຊຍຄາດຫວັງການຮ່ວມງານກັບລັດຖະບານຊຸດໃໝ່ຂອງ ສ.ອາເມຣິກາວ່າຈະລ່ຽນໄຫຼ່ ແລະ ສືບຕໍ່ການເຈລະຈາກອບການຮ່ວມມືດ້ານຄວາມໝັ້ນຄົງທີ່ຍັງຄົງຄ້າງ ແຕ່ຫາກອີກຝ່າຍບໍ່ມີຄວາມພ້ອມທີ່ຈະເຈລະຈາ ລັດເຊຍຈະໄປພົບປະຫາລືກັບປະເທດອື່ນແທນ.

ເຊິ່ງຜູ້ນຳລັດເຊຍບໍ່ໄດ້ກ່າວຢ່າງເຈາະຈົງວ່າຈະໄປເຈລະຈາກັບປະເທດໃດ ແຕ່ໄດ້ກ່າວເຖິງສາຍພົວພັນກັບຈີນໃນຕອນນີ້ວ່າຢູ່ໃນລະດັບທີ່ແໜ້ນແຟ້ນແບບບໍ່ເຄີຍເກີດຂຶ້ນມາກ່ອນ ເພາະທັງສອງຝ່າຍໃຫ້ກຽດ ແລະ ເຄົາລົບເຊິ່ງກັນ ແລະ ກັນ ພ້ອມທັງສະແດງຄວາມໝັ້ນໃຈວ່າ ການຮ່ວມມືສອງຝ່າຍກັບຈີນຈະເຕີບໃຫຍ່ຂະຫຍາຍຕົວໄປກວ່ານີ້ອີກ.

ຂະນະດຽວກັນ, ທ່ານ ປູຕິນ ກ່າວຢ່າງເປັນທາງການຄັ້ງທຳອິດ ກ່ຽວກັບການທີ່ທ່ານ ອະເລັກຊີ ນາວັນນີ ແກນນຳຝ່າຍຄ້ານຂອງລັດເຊຍ ທີ່ເຈັບປ່ວຍຈາກການໄດ້ຮັບສານພິດໂນວິຊັອກ ແລະ ມີການສົ່ງຕົວໄປປິ່ນປົວທີ່ປະເທດເຢຍລະມັນ ເມື່ອເດືອນສິງຫາ ທີ່ຜ່ານມາ ໃນເວລາດຽວກັນກັບທີ່ ສ.ອາເມຣິກາ ແລະ ພັນທະມິດໃນເອີຣົບຍັງຄົງກ່າວຫາລັດຖະບານລັດເຊຍວ່າຢູ່ເບື້ອງຫຼັງ ວ່າຫາກເປັນຄວາມຈິງ ແລ້ວເຫດໃດຕົນຈຶ່ງຕ້ອງອະນຸຍາດໃຫ້ທ່ານ ອະເລັກຊີ ນາວັນນີ ອອກນອກປະເທດໄປປິ່ນປົວຢູ່ເຢຍລະມັນ ແລະ ຢືນຢັນວ່າໜ໋ວຍງານທີ່ກ່ຽວຂ້ອງກຳລັງກວດສອບເລື່ອງນີ້ຢ່າງລະອຽດ.

ນອກຈາກນີ້, ຜູ້ນຳລັດເຊຍກ່າວວ່າ ບໍ່ຖືຊາກັບສຽງວິພາກວິຈານ ແລະ ການກ່າວຫາຕ່າງໆນາໆຈາກຕາເວັບຕົກ ແລະ ເຊື່ອໝັ້ນວ່າທຸກພາກສ່ວນໃນປະເທດຈະຮ່ວມກັບສູ້ຊົນຜ່ານຜ່າມາດຕະການຂວ້ຳບາດ ແລະ ການກົດດັນທາງເສດຖະກິດຈາກພາຍນອກໄປໄດ້ໃນທີ່ສຸດ.

ພາບ: ທ່ານ ວະລາດິເມຍ ປູຕິນ ປະທານປະເທດລັດເຊຍ, ງານເສວະນາສະໂມສອນວັນໄດ (Valdai) , ນະຄອນຫຼວງມົດສະກູ, 22 ຕຸລາ 2020.

HTML tutorial