ອຸຕຸແຈ້ງເຕືອນພາກກາງ ແລະ ພາກໃຕ້ໃຫ້ກຽມພ້ອມຮັບມືກັບພາຍຸໄຕ້ຝຸ່ນ ໂມລາເວ

ລາຍງານ 26 ຕຸລາ 2020, ກົມອຸຕຸນິຍົມ ແລະ ອຸທົກກະສາດ ອອກແຈ້ງເຕືອນໄພພາຍຸໄຕ້ຝຸ່ນ ໂມລາເວ (MOLAVE) ທີ່ພວມເຄື່ອນທີ່ມາທາງທິດຕາເວັນຕົກ ດ້ວຍຄວາມໄວ 25 ກິໂລແມັດຕໍ່ຊົ່ວໂມງ ແລະ ມີຄວາມໄວສູງສຸດໃກ້ຈຸດສູນກາງ 126 ກິໂລແມັດຕໍ່ຊົ່ງໂມງ.

ຄາດວ່າພາຍຸຫົວນີ້ ຈະເຄື່ອນຂຶ້ນຝັ່ງພາກກາງຂອງຫວຽດນາມ ໃນຕອນເຊົ້າວັນທີ 28 ຕຸລານີ້ ແລະ ຈະສືບຕໍ່ເຄື່ອນທີ່ຜ່ານແຂວງເຊກອງ ແລະ ສາລະວັນ ໃນຕອນຄ່ຳຂອງວັນທີ 28 ຫາຕອນເຊົ້າວັນທີ 29 ຕຸລານີ້ ເຊິ່ງຖືເປັນພາຍຸຫົວທີ 6 ທີ່ເຄື່ອນທີ່ຜ່ານ ສປປ.ລາວ ໃນປີນີ້.

ຫຼັງຈາກນັ້ນ, ຈະອ່ອນກຳລັງລົງເປັນພາຍຸດີເປຼຊັນ ແລະ ຍ່ອມຄວາມກົດດັນອາກາດຕ່ຳ ເຄື່ອນທີ່ຜ່ານປະເທດໄທຕາມລຳດັບ ເຊິ່ງຈະເຮັດໃຫ້ມີຝົນຕົກໜັກ ຫາ ໜັກຫຼາຍ ພ້ອມມີລົມພັດແຮງຢູ່ບັນດາແຂວງພາກກາງ ແລະ ພາກໃຕ້ ໃນໄລຍະວັນທີ 28-29 ຕຸລານີ້.

ດັ່ງນັ້ນ, ຈຶ່ງແຈ້ງເຕືອນເຖິງຜູ້ທີ່ອາໄສຢູ່ແຂວງພາກກາງ ແລະ ພາກໃຕ້ເຊັ່ນ: ແຂວງບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ເຊກອງ, ຈຳປາສັກ ແລະ ອັດຕະປື ຈົ່ງມີລະວັງຕໍ່ລະພາບຝົນຕົກໜັກ ແລະ ລົມພັດແຮງ ທີ່ຈະເຮັດໃຫ້ລະດັບນ້ຳສາຂາສືບຕໍ່ສູງຂຶ້ນຕື່ມອີກ ແລະ ຈະເຮັດໃຫ້ມີນ້ຳຖ້ວມຊຸ, ນ້ຳຖ້ວມອັ່ງ, ຕົ້ນໄມ້ຫັກລົ້ມ ແລະ ເຮືອນຊານເປ່ເພ, ພ້ອມນີ້ໃຫ້ກະກຽມຍົກຍ້າຍວັດຖຸສິ່ງຂອງ ແລະ ສັດລ້ຽງໄປໄວ້ບ່ອນທີ່ປອດໄພ.