ສ.ອາເມຣິກາ ຍົກລະດັບຕິດຕາມເຂື່ອນ ສປ.ຈີນ ໃນລຳແມ່ນ້ຳຂອງ

ລາຍງານ 14 ທັນວາ 2020, ສູນສັງເກດການເຂື່ອນແມ່ນ້ຳຂອງ ຂອງສະຖາບັນວິໄຈສະຕິມສັນ (Stimson) ທີ່ໄດ້ຮັບງົບປະມານສະໜັບສະໜູນບາງສ່ວນຈາກກະຊວງການຕ່າງປະເທດ ສ.ອາເມຣິກາ ໄດ້ສ້າງລະບົບເພື່ອກວດສອບ ແລະ ວິເຄາະຢ່າງລະອຽດ ຕໍ່ກັບລະດັບນ້ຳຂອງເຂື່ອນ 11 ແຫ່ງ ທີ່ຈີນສ້າງຂຶ້ນໃນແມ່ນ້ຳຂອງຕອນເທິງ ແລະ ເຂື່ອນທຸກແຫ່ງມີລັກສະນະເປັນແບບຂັ້ນໄດ.

ຂໍ້ມູນເບື້ອງຕົ້ນຂອງ Stimson ລະບຸວ່າ ເຂື່ອນທັງ 11 ແຫ່ງ ມີຄວາມຊັບຊ້ອນສູງໃນດ້ານໂຄງສ້າງ ແລະ ຫຼັກການເຮັດວຽກ ເຊິ່ງຊັດເຈນວ່າເຂື່ອນແຕ່ລະແຫ່ງ ແມ່ນເພື່ອເພີ່ມຂີດຄວາມສາມາດໃຫ້ກັບການຜະລິດກະແສໄຟຟ້າຂອງໂຮງໄຟຟ້າໃນມົນທົນທາງພາກຕາເວັນອອກຂອງຈີນເປັນຫຼັກ ໃນຂະນະທີ່ກຸ່ມປະເທດທີ່ຢູ່ທ້າຍນ້ຳ ບໍ່ໄດ້ຮັບຜົນປະໂຫຍດໃດໆທັງນັ້ນ, ໂດຍບຸກຄົນທົ່ວໄປສາມາດເຂົ້ງເຖິງລະບົບດັ່ງກ່າວໄດ້ຕັ້ງແຕ່ວັນທີ 15 ທັນວານີ້ ເປັນຕົ້ນໄປ ທີ່: https://www.stimson.org/project/mekong-dam-monitor/

ໃນດ້ານຂອງສະຖາບັນວິສະວະກຳພະລັງງານທົດແທນຂອງຈີນ ກໍ່ຫາກໍ່ອອກລາຍງານເມື່ອອາທິດທີ່ຜ່ານມາ ວິຈານ ສ.ອາເມຣິກາ ວ່າບໍ່ມີຄວາມເຂົ້າໃຈຢ່າງແທ້ຈິງ ເຖິງຄວາມເກາະກາຍ ແລະ ຄວາມຊັບຊ້ອນລະຫວ່າງລະບົບການເຮັດວຽກຂອງເຂື່ອນໃນແຖບຕອນເທິງຂອງແມ່ນ້ຳຂອງ ກັບທິດທາງຂອງກະແສນ້ຳ ແລະ ລະດັບນ້ຳໃນແຖບແມ່ນ້ຳຂອງຕອນລຸ່ມ ໂດຍມີການອະທິບາຍວ່າ ເຂື່ອນທັງ 11 ແຫ່ງຊ່ວຍກັກເກັບປະລິມານນ້ຳໃນໄລຍະລະດູຝົນ ເພື່ອປ້ອງກັນບໍ່ໃຫ້ເຂດຕອນລຸ່ມປະສົບກັບໄພນ້ຳຖ້ວມ ແລະ ໄພແລ້ງ ພ້ອມທັງຢືນຢັນປະຕິເສດບັນຫາທີ່ວ່າ ຈີນຫຼຸດການປ່ອຍນ້ຳຈາກເຂື່ອນເມື່ອປີທີ່ຜ່ານມາ ສົ່ງຜົນໃຫ້ກຸ່ມປະເທດທີ່ຢູ່ທ້າຍນ້ຳປະສົບກັບວິກິດໄພແຫ້ງແລ້ງ ໂດຍອ້າງຂໍ້ມູນຄວາມເປັນຈິງຈາກອຸທົກກະສາດ ວ່າປະລິມານນ້ຳຝົນໃນປີນັ້ນໜ້ອຍກວ່າປົກກະຕິ ເນື່ອງຈາກປາກົດການເອວນິໂຢ.

ເຖິງຢ່າງໃດກໍ່ຕາມ, ລັດຖະບານຈີນ ແລະ ຄະນະກຳມາທິການແມ່ນ້ຳຂອງ (MRC) ເຊິ່ງມີສະມາຊິກປະກອບດ້ວຍ: ກຳປູເຈຍ,  ລາວ, ໄທ ແລະ ຫວຽດນາມ ລົງນາມຮ່ວມກັນເມື່ອທ້າຍເດືອນຕຸລາ ທີ່ຜ່ານມາ ໃນຂໍ້ຕົກລົງວ່າດ້ວຍການທີ່ລັດຖະບານຈີນ ຈະແບ່ງປັນຂໍ້ມູນທາງອຸທົກກະສາດ ແລະ ພູມສາດ ຢ່າງທົ່ວເຖິງ ແລະ ມີຄວາມໂປ່ງໃສ ພາຍໃນໄລຍະເວລາ 12 ເດືອນຕໍ່ຈາກນີ້ ເພື່ອເປັນປະໂຫຍດໃຫ້ກັບສະມາຊິກ MRC ທີ່ຢູ່ລຸ່ມແມ່ນ້ຳຂອງ ໃຫ້ສາມາດສັງເກດການ ແລະ ວິເຄາະລະດັບນ້ຳ ຕະຫຼອດຮອດສະຖານະການໄພແລ້ງຢ່າງມີປະສິດທິພາບ.

ເຖິງຢ່າງໃດກໍ່ຕາມ ແມ່ນ້ຳຂອງເປັນຊາຍແດນທຳມະຊາດ ແລະ ແຫຼ່ງຊັບພະຍາກອນທີ່ຕິດພັນກັບຫຼາຍປະເທດ ມີຄວາມຍາວເປັນອັນດັບ 12 ຂອງໂລກ ໂດຍມີແຫຼ່ງກຳເນີດຢູ່ສາຍພູຫິມາໄລ ບໍລິເວນພູພຽງຕີເບດ ແລະ ກະແສນ້ຳໄຫຼລົງໃຕ້ເປັນໄລຍະທາງປະມານ 3,000 ກິໂລແມັດ ອອກຈາກຈີນໄຫຼສູ່ 5 ປະເທດໃນອາຊີຕາເວັນອອກສຽງໃຕ້ໄດ້ແກ່ ສປປ.ລາວ, ມຽນມາ, ກຳປູເຈຍ, ໄທ ແລະ ອອກສູ່ທະເລຈີນໃຕ້ທີ່ປາກແມ່ນ້ຳໃນຫວຽດນາມ.