ລັດເຊຍ-ຈີນວາງແຜນສ້າງສູນວິໄຈຮ່ວມກັນ ຢູ່ເທິງດວງຈັນ

ລາຍງານ 10 ມີນາ 2021 ອົງການອະວະກາດລັດເຊຍ (Roscosmos) ແລະ ສຳນັກງານອະວະກາດແຫ່ງຊາດຈີນ (CNSA) ອອກຖະແຫຼງການຮ່ວມກັນ ວ່າທັງສອງຝ່າຍໄດ້ລົງນາມຮ່ວມກັນ ໃນຂໍ້ຕົກລົງກ່ຽວກັບການກໍ່ສ້າງສູນປະຕິບັດການເທິງດວງຈັນ ຫຼື ໃນວົງໂຄຈອນຂອງດວງຈັນ ໝາຍເຖິງການກໍ່ສ້າງສະຖານີອະວະກາດສາກົນ ທີ່ທັງສອງປະເທດຢືນຢັນວ່າ ຈະເປີດກວ້າງຮັບເອົາການຮ່ວມມືຈາກທຸກປະເທດທີ່ສົນໃຈ.

ການເຄື່ອນໄຫວດັ່ງກ່າວ ເຖິງແມ່ນວ່າຈະຍັງບໍ່ກຳນົດການທີ່ຊັດເຈນ ແຕ່ເປີດເຜີຍໃນໂອກາດທີ່ປີນີ້ລັດເຊຍສະເຫຼີມສະຫຼອງຄົບຮອບ 50 ປີ ການສົ່ງມະນຸດເດີນທາງໄປສູ່ອະວະກາດ ນັ້ນຄືທ່ານ ຢູຣິ ກາກາຣິນ ດ້ວຍຍານວອສຕັອກ-1 ໂຄຈອນຮອບໂລກດົນເກືອບ 2 ຊົ່ວໂມງ ເມື່ອວັນທີ 12 ເມສາ 1961.

ໃນຂະນະທີ່ຈີນ ກໍ່ມີແຜນທີ່ຈະສົ່ງນັກບິນອະວະກາດຢ່າງໜ້ອຍ 4 ຊຸດໃນປີນີ້ ເພື່ອຂຶ້ນໄປປະຈຳການຍັງ “ທຽນເຫີ” ທີ່ເປັນສະຖານີອະວະກາດຂອງຈີນເອງ ໂດຍມີກຳນົດອອກເດີນທາງສູ່ວົງໂຄຈອນໂລກໃນລະດູໃບໄມ້ປົ່ງປີນີ້, ສ່ວນໂຄງການສ້າງສະຖານີອະວະກາດໃຫ້ສຳເລັດທັງໝົດ ແມ່ນມີກຳນົດການໃຫ້ແລ້ວພາຍໃນປີໜ້າ.