ສ.ອາເມຣິກາຂັດຂວາງ UN ບໍ່ໃຫ້ປະນາມອິດສະຣາແອນ ຕໍ່ກັບຄວາມຂັດແຍ່ງກັບປາແລັດສະຕິນ

ລາຍງານ 17 ພຶດສະພາ 2021, ກອງກຳລັງປ້ອງກັນອິດສະຣາແອນ (IDF) ລາຍງານການສົ່ງຍົນຮົບ 54 ລຳ ບິນໄປຍັງຕອນເໜືອຂອງເຂດກາຊາ ເມື່ອເຊົ້າມືດຂອງວັນຈັນນີ້ ຕາມເວລາທ້ອງຖິ່ນ ແລະ ກະຈາຍກຳລັງກັນຖິ້ມລະເບີດປະມານ 110 ລູກ ໂຈມຕີອຸໂມງໃຕ້ດິນຂອງຂະບວນການຮາມາສ ເຊິ່ງເປັນອົງການປະກອບອາວຸດຂອງປະຊາຊົນປາແລັດສະຕິນ ໃນເຂດກາຊາ ໂດຍຈາກຂໍ້ມູນຂ່າວກອງລະບຸວ່າ ມີຄວາມຍາວປະມານ 15 ກິໂລແມັດ ໂດຍປະຕິບັດການດັ່ງກ່າວເປັນໄປຕາມແຜນການຂອງ IDF ເພື່ອທຳລາຍເຄືອຂ່າຍໃຕ້ດິນຂອງຂະບວນການຮາມາສ ແລະ ພັນທະມິດທີ່ຢູ່ໃນເຂດກາຊາ.

ຂະນະດຽວກັນ, IDF ຢືນຢັນການຖິ້ມລະເບີດໂຈມຕີເຮືອນ 9 ຫຼັງໃນເຂດກາຊາ ເຊິ່ງເປັນທີ່ຢູ່ອາໄສຂອງແກນນຳທ້ອງຖິ່ນຂອງຂະບວນການຮາມາສ ແຕ່ຍັງບໍ່ມີຄວາມຊັດເຈນວ່າ ມີໃຜຢູ່ໃນເຮືອນລະຫວ່າງເກີດເຫດໂຈມຕີຫຼືບໍ່?.

ເຊິ່ງປະຕິບັດການທາງທະຫານຮອບຫຼ້າສຸດຂອງ IDF ໃນເຂດກາຊາ ເກີດຂຶ້ນໃນເວລາດຽວກັນກັບທີ່ສະພາຄວາມໝັ້ນຄົງແຫ່ງສະຫະປະຊາຊາດ UNSC ໄດ້ມີການພົບປະຫາລືກັນຢ່າງເປີດເຜີຍຜ່ານລະບົບວິດີໂອທາງໄກ ເມື່ອວັນອາທິດທີ່ຜ່ານມາ ເພື່ອປຶກສາຫາລືເປັນຄັ້ງທີ 2 ໃນຮອບອາທິດ ກ່ຽວກັບວິກິດການໃນເຂດກາຊາ ແຕ່ກອງປະຊຸມໄດ້ຈົບລົງໂດຍບໍ່ມີຂໍ້ສະຫຼຸບທີ່ຊັດເຈນ ແລະ ບໍ່ມີຄວາມເປັນເອກະພາບໃດ ເນື່ອງຈາກທັງ 15 ປະເທດສະມາຊິກບໍ່ສາມາດອອກຖະແຫຼງການຮ່ວມກັນໄດ້ ໂດຍ ສ.ອາເມຣິກາ ເຊິ່ງເປັນໜຶ່ງໃນສະມາຊິກຖາວອນ ຄັດຄ້ານການອອກຖະແຫຼງການທີ່ມີເນື້ອໃນ ປະນາມທັງອິດສະຣາແອນ ແລະ ຂະບວນການຮາມາສ.

ຂະນະທີ່ຜູ້ເສຍຊີວິດຢ່າງເປັນທາງການໃນເຂດກາຊາ ຕາມລາຍງານຂອງລັດຖະບານປາແລັດສະຕິນ ມີ 197 ຄົນ ແລະ ໄດ້ຮັບບາດເຈັບຫຼາຍກວ່າ 1,200 ຄົນ ສ່ວນຜູ້ເສຍຊີວິດຊີວິດໃນອິດສະຣາແອນມີ 10 ຄົນ ແລະ ບາດເຈັບຫຼາຍກວ່າ 500 ຄົນ.

- Advertisement -