ລັດເລັ່ງຄົ້ນຄວ້າມາດຕະການຜ່ອນຜັນດ້ານການບໍລິຫານ ແລະ ສັງຄົມ ຫຼັງ 20 ພຶດສະພາ 2021

ອີງຕາມການລາຍງານຂອງສຳນັກງານນາຍົກໃຫ້ຮູ້ວ່າ: ໃນຕອນເຊົ້າ ວັນທີ 17 ພຶດສະພາ 2021 ທີ່ສຳນັກງານນາຍົກລັດຖະມົນຕີ ໄດ້ດຳເນີນກອງປະຊຸມນາຍົກລັດຖະມົນຕີ ຮ່ວມກັບຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ຂັ້ນສູນກາງ ແລະ ຄະນະສະເພາະກິດຂັ້ນທ້ອງຖິ່ນທົ່ວປະເທດ ຜ່ານລະບົບກອງປະຊຸມທາງໄກ ໂດຍການເປັນປະທານຂອງທ່ານ ພັນຄຳ ວິພາວັນ ນາຍົກລັດຖະມົນຕີ.

ຜ່ານການປະຊຸມ, ທ່ານ ນາຍົກລັດຖະມົນຕີ ໄດ້ສະແດງຄວາມຊົມເຊີຍ ຕໍ່ຄະນະສະເພາະກິດ ກໍ່ຄືຄະນະພັກ, ອົງການການປົກຄອງທຸກຂັ້ນ, ພະນັກງານ, ທະຫານ, ຕໍາຫຼວດ ຕະຫຼອດຮອດປະຊາຊົນບັນດາເຜົ່າ ທີ່ໄດ້ເປັນເຈົ້າການເຂົ້າຮ່ວມ ຂະບວນການສະກັດກັ້ນ ແລະ ຕ້ານການລະບາດ ຂອງພະຍາດໂຄວິດ-19 ໃນຮອບນີ້ ເຮັດໃຫ້ຮອດມື້ນີ້ ສະພາບການມີລັກສະນະຄົງຕົວ ແລະ ມີທ່າອ່ຽງຄ່ອຍຫຼຸດລົງ.

ພິເສດ ແມ່ນຍ້ອງຍໍຊົມເຊີຍ ຕໍ່ຖັນແຖວແພດໜໍ, ທະຫານ, ຕຳຫຼວດ ແລະ ເຈົ້າໜ້າທີ່ ທີ່ກ່ຽວຂ້ອງ ທີ່ໄດ້ຕັ້ງໜ້າປະຕິບັດໜ້າທີ່ອັນໜັກໜ່ວງ ແລະ ມີຄວາມສ່ຽງຕໍ່ສຸຂະພາບ ແລະ ຊີວິດຂອງຕົນຢ່າງບໍ່ຮູ້ອິດເມື່ອຍ ໃນການໃຫ້ບໍລິການຮັບໃຊ້ປະຊາຊົນ ນັບທັງກາງເວັນ, ກາງຄືນ ມາເປັນເວລາຍາວນານ ເກືອບ 2 ປີແລ້ວ ເຊິ່ງສະແດງອອກເຖິງຄວາມກ້າຫານ, ຄວາມເສຍສະຫຼະ ແລະ ຄວາມຊື່ສັດບໍລິສຸດໃນຈັນຍາບັນ ເພື່ອຮັບໃຊ້ປະຊາຊົນຢ່າງແທ້ຈິງ. 

ໃນຂະນະດຽວກັນ ກໍ່ໄດ້ສະແດງຄວາມຂອບໃຈ ແລະ ຍ້ອງຍໍຊົມເຊີຍ ຕໍ່ຜູ້ປະກອບການ ແລະ ປະຊາຊົນ ຜູ້ມີນໍ້າໃຈເອື້ອຍເຟື້ອເພື່ອແຜ່ ທີ່ໄດ້ປະກອບສ່ວນວັດຖຸສິ່ງຂອງ ແລະ ທຶນຮອນ ເພື່ອນຳໃຊ້ເຂົ້າໃນການສະກັດກັ້ນ ແລະ ຕ້ານພະຍາດໂຄວິດ-19. 

ພ້ອມກັນນັ້ນ ກໍ່ຍັງໄດ້ຍົກໃຫ້ເຫັນບົດຮຽນອັນພົ້ນເດັ່ນ ທີ່ຖອດຖອນໄດ້ ຈາກພຶດຕິກຳຕົວຈິງ ໃນການຕ້ານເຊື້ອພະຍາດໂຄວິດ-19 ໃນໄລຍະຜ່ານມາ ເພື່ອໃຫ້ຄະນະສະເພາະກິດ ແລະ ການນຳທຸກຂັ້ນ ສືບຕໍ່ນຳບົດຮຽນດັ່ງກ່າວ ໄປຈັດຕັ້ງຜັນຂະຫຍາຍ ສູ່ວຽກງານຕົວຈິງ ໃນຕໍ່ໜ້າ ໃຫ້ເກີດດອກອອກຜົນຫຼາຍຂຶ້ນ.

​ໃນ​ຕອນ​ທ້າຍ, ທ່ານນາ​ຍົກ​ລັດ​ຖະ​ມົນ​ຕີ ​ໄດ້​ເນັ້ນ​ໜັກໃຫ້ຄະນະສະເພາະກິດຂັ້ນສູນກາງ ແລະ ທ້ອງຖິ່ນ ຮີບຮ້ອນປັບປຸງໂຄງປະກອບດ້ານບຸກຄະລາກອນ ຂອງການຈັດຕັ້ງຕົນເອງ ໃຫ້ຄົບຖ້ວນສົມບູນ, ປັບປຸງລະບົບແບບແຜນວິທີເຮັດວຽກ ໃຫ້ໂລ່ງລ່ຽນ, ວ່ອງໄວ ແລະ ມີປະສິດທິພາບສູງ ຕາມຮູບແບບການບັນຊາການສູ້ຮົບ, ສຳຄັນຕ້ອງມີ​ແຜນປະຕິບັດງານທີ່ຈະແຈ້ງ, ມີເປົ້າໝາຍ, ມີຄາດໝາຍ ທີ່ຮັດກຸມ, ມີກຳລັງຄົນກັບກຳລັງຊັບ ຈັດຕັ້ງປະຕິບັດຄັກແນ່. 

ສໍາລັບມາດຕະການຜ່ອນຜັນດ້ານການບໍລິຫານ ແລະ ສັງຄົມ ຫຼັງວັນທີ 20 ພຶດສະພາ 2021 ນີ້ ໃຫ້ສົມທົບກັນຄົ້ນຄວ້າຄືນ ​ໂດຍ​ສະ​ເພາະ ມາດ​ຕະການ​ໃດທີ່​ສາມາດ​ຜ່ອນຜັນ ​ແລະ ມາດ​ຕະການ​ໃດຕ້ອງ​ໄດ້​ເພີ່ມ​ທະວີ​ຄວາມ​ເຂັ້ມ​ງວດ ເພື່ອໃຫ້ແທດ​ເໝາະ​ກັບ​ສະພາບຕົວຈິງ ໂດຍ​ໃຫ້ຄຳແນະນຳເພີ່ມເຕີ່ມຂອງຄະນະສະເພາະກິດລາຍລະອຽດ ແລະ ມີຜົນບັງຄັບໃຊ້ຢ່າງເຂັ້ມງວດ.

ດ້ານການແພດ ໃຫ້ເອົາໃຈໃສ່ສ້າງແຜນຈັດຕັ້ງປະຕິບັດກ່ຽວກັບການຈັດຫາວັກແຊັງ ແລະ ສັກວັກແຊັງໃຫ້ໄດ້ຫຼາຍເທົ່າທີ່ຈະຫຼາຍ​ໄດ້, ໄດ້ໄວເທົ່າທີ່ຈະໄວ​ໄດ້, ຖືວຽກນີ້ ເປັນວຽກຕ້ອງສຸມໃສ່ເຮັດໂດຍບໍ່ໃຫ້ລັງເລ​ໃດໆ.

ໃຫ້ຖອດບົດຮຽນນໍາປະເທດເພື່ອນມິດ ກ່ຽວກັບຢາປົວພະ​ຍາດ​ໂຄວິດ-19 ທີ່ເຮັດ​ໃຫ້ປິ່ນ​ປົວເຊົາໄວຂຶ້ນ, ປັບປຸງຍົກລະດັບເຄື່ອງມືອຸປະກອນການແພດຕາມ ຄວາມຈຳເປັນ ເພື່ອຄວາມສະດວກວ່ອງໄວ ແລະ ທັນການຂື້ນ.

ການຈັດສັນງົບປະມານ ໃຫ້ມີແຜນລະອຽດຕົວຈິງ ບໍ່ໃຫ້ເຮັດລວມໆ ຕ້ອງຈັດສັນໃສ່ອັນໃດທີ່ຈຳເປັນ, ສືບຕໍ່ຮັບເອົາການຊ່ວຍເຫຼືອທັງພາຍໃນ ແລະ ຕ່າງປະເທດ. 

ໃຫ້ເອົາໃຈໃສ່ເປັນພິເສດ ນະໂຍບາຍຕໍ່ພະນັກງານແພດໝໍ ທີ່ປະຕິບັດໜ້າທີ່ປະຈັນບານຢູ່ໂຮງໝໍ ທີ່ມີຄວາມສ່ຽງສູງ. 

ສຸດ​ທ້າຍ ທ່ານນາຍົກລັດຖະມົນຕີໄດ້ສະແດງຄວາມເຊື່ອໝັ້ນວ່າ ຄະນະສະເພາະກິດຂັ້ນສູນກາງ, ຄະນະພັກ ອົງການປົກຄອງທ້ອງຖີ່ນ ຈະສືບຕໍ່ສູ້ຊົນ ເຮັດໃ​ຫ້​ການ​ແຜ່​ລະ​ບາດ​ຂອງ​ພະ​ຍາດໂຄວິດ-19 ຢູ່ປະເທດເຮົາ ມີການຜ່ອນຄາຍລົງໄດ້ຕາມຄວາມມຸ່ງຫວັງຂອງປະຊາຊົນ.

ໂດຍຕົວເລກຜູ້ຕິດເຊື້ອພະຍາດໂຄວິດ-19 ໃນ ສປປ.ລາວ 17 ພຶດສະພາ 2021, ມີຜູ້ຕິດເຊື້ອສະສົມ 1,638 ຄົນ ເສຍຊີວິດ 2 ຄົນ, ປິ່ນປົວເຊົາແລ້ວ 582 ຄົນ ແລະ ກຳລັງປິ່ນປົວຢູ່ 1,054 ຄົນ.