ຂະບວນການຮາມາສ-ອິດສະຣາແອນ ບັນລຸຂໍ້ຕົກລົງຢຸດຍິງ ຕາມການສະເໜີຂອງເອຢິບ

ລາຍງານ 21 ພຶດສະພາ 2021, ທຳນຽບລັດຖະບານອິດສະຣາແອນອອກຖະແຫຼງການວ່າ ກອງປະຊຸມຄະນະລັດຖະມົນຕີ ມີມະຕິເປັນເອກະພາບ ເຫັນດີຕາມເງື່ອນໄຂທັງໝົດຕາມຂໍ້ຕົກລົງຢຸດຍິງ ທີ່ສະເໜີໂດຍປະເທດເອຢິບ ການຢຸດຍິງມີຜົນບັງຄັບໃຊ້ຕັ້ງແຕ່ເວລາ 02:00 ໂມງ ຕາມເວລາທ້ອງຖິ່ນຂອງວັນສຸກນີ້.

ໃນເວລາດຽວກັນ, ຂະບວນການຮາມາສ  ເຊິ່ງເປັນອົງການປະກອບອາວຸດຂອງປະຊາຊົນປາແລັດສະຕິນ ທີ່ປົກຄອງເຂດກາຊາ, ມາຕັ້ງແຕ່ປີ 2007 ອອກຖະແຫຼງການຢືນຢັນການຢຸດຍິງເຊັ່ນກັນ ແຕ່ຍັງບໍ່ມີຝ່າຍໃດເປີດເຜີຍລາຍລະອຽດ, ຂະນະທີ່ປະຊາຊົນປາແລັດສະຕິນທັງໃນເຂດກາຊາ ແລະ ເຂດເວດແບັງ ຕະຫຼອດຮອດໃນນະຄອນເຢຣູຊາແລມ ພ້ອມໃຈກັນອອກມາສະເຫຼີມສະຫຼອງການເລີ່ມຕົ້ນຢຸດຍິງ ເຖິງແມ່ນວ່າໃນຊົ່ວໂມງສຸດທ້າຍກ່ອນມີການປະກາດຂໍ້ຕົກລົງຢ່າງເປັນທາງການ ກອງກຳລັງປ້ອງກັນອິດສະຣາແອນ (IDF) ແລະ ຂະບວນການຮາມາສໂຈມຕີຂ້າມເຂດແດນໃສ່ກັນຢ່າງໜັກໜ່ວງເປັນການສົ່ງທ້າຍ.

ສຳລັບສະຖານະການຄວາມຮຸນແຮງຄັ້ງນີ້ ລະເບີດຂຶ້ນເມື່ອວັນທີ 10 ພຶດສະພາ 2021 ເມື່ອຂະບວນການຮາມາສລະດົມຍິງລູກສອນໄຟຂ້າມເຂດແດນຈາກເຂດກາຊາ ໂຈມຕີເມືອງໃຫຍ່ຫຼາຍແຫ່ງຂອງອິດສະຣາແອນ ໂດຍສະເພາະນະຄອນຫຼວງເທວອາວີບ ແລະ ນະຄອນເຢຣູຊາແລມ ຕອບໂຕ້ຄວາມຂັດແຍ່ງທີ່ລຸກລາມມາຕັ້ງແຕ່ເຂົ້າສູ່ເດືອນຖືສິນພາວະນາຂອງຊາວມຸດສະລິມປີນີ້ ເມື່ອເຈົ້າໜ້າທີ່ຂອງອິດສະຣາແອນປະທະຢ່າງດຸເດືອນກັບປະຊາຊົນປາແລັດສະຕິນ ທີ່ບໍ່ປະຕິບັດຕາມມາດຕະການຄວບຄຸມການແຜ່ລະບາດຂອງພະຍາດໂຄວິດ-19 ແລ້ວສະຖານະການໄດ້ຂະຫຍາຍວົງກວ້າງ ເຂົ້າສູ່ມັດສະຍິດອັນ-ອາກຊໍ ໜຶ່ງໃນສາສະນະສະຖານເກົ່າແກ່ ແລະ ສຳຄັນທີ່ສຸດຂອງຊາວມຸດສະລິມ ຕັ້ງຢູ່ໃນເຂດເມືອງເກົ່າ ທີ່ຢູ່ທາງຕາເວັນອອກຂອງນະຄອນເຢຣູຊາແລມ ແລະ ຍັງມີຂໍ້ຂັດແຍ່ງແກ່ຍາວ ກໍລະນີທີ່ອິດສະຣາແອນຕ້ອງການຂັບໄລ່ປະຊາຊົນປາແລັດສະຕິນຈຳນວນໜຶ່ງອອກຈາກເຂດເຊອິກ ຈາຣາ ໃນນະຄອນເຢຣູຊາແລມອີກດ້ວຍ.

ຜົນຈາກການສູ້ຮົບຄັ້ງນີ້ ເຮັດໃຫ້ປະຊາຊົນປາແລັດສະຕິນເສຍຊີວິດ 232 ຄົນ ແລະ ໄດ້ຮັບບາດເຈັັບເກືອບ 2,000 ຄົນ, ສ່ວນໃນອິດສະຣາແອນມີຜູ້ເສຍຊີວິດ 12 ຄົນ ລວມທັງແຮງງານຈາກປະເທດໄທ 2 ຄົນ ແລະ ໄດ້ຮັບບາດເຈັບອີກຫຼາຍກວ່າ 100​ ຄົນ ຖືເປັນການສູນເສຍຫຼາຍທີ່ສຸດ ນັບຕັ້ງແຕ່ສົງຄາມໃນເຂດກາຊາ ເມື່ອປີ​ 2014 ທີ່ອິດສະຣາແອນສັງຫານປະຊາຊົນປາແລັດສະຕິນໄປກວ່າ 2,000 ຄົນ ແລະ ທະຫານອິດສະຣາແອນເສຍຊີວິດ 67 ຄົນ ລວມທັງມີປະຊາຊົນອີກ 6 ຄົນ ໜຶ່ງໃນນັ້ນເປັນແຮງງານໄທ.

- Advertisement -