ການຮ່ວມມືແມ່ນປັດໄຈສຳຄັນທີ່ສຸດໃນການຟື້ນຟູເສດຖະກິດອາຊີ, ທ່ານ ທອງລຸນ ກ່າວໃນກອງປະຊຸມອະນາຄົດອາຊີ

ລາຍງານ 22 ພຶດສະພາ 2021, ທ່ານ ທອງລຸນ ສີສຸລິດ ປະທານປະເທດ ໄດ້ເຂົ້າຮ່ວມກອງປະຊຸມສາກົນ ວ່າດ້ວຍ ອະນາຄົດຂອງອາຊີ ຄັ້ງທີ 26, ພາຍໃຕ້ຫົວຂໍ້ “ການສ້າງຍຸກສະໄໝ ຫຼັງໂຄວິດ-19: ບົດບາດຂອງອາຊີໃນການຟື້ນຕົວຂອງໂລກ ໃນລະຫວ່າງວັນທີ 20-21 ພຶດສະພາ 2021 ໃນຮູບແບບຂອງກອງປະຊຸມທາງໄກ ຈັດໂດຍສຳນັກຂ່າວໜັງສືພິມເສດຖະກິດຍີ່ປຸ່ນ (NIKKEI).

ໃນຕອນໜຶ້່ງຂອງການກ່າວປາໄສ ທ່ານ ທອງລຸນ ສີສຸລິດ ໄດ້ກ່າວວ່າ: ການຮ່ວມມື ແລະ ຄວາມເປັນເອກະພາບຂອງບັນດາປະເທດອາຊີ ແມ່ນສຳຄັນທີ່ສຸດໃນການຕໍ່ສູ້ຕ້ານພະບາດລະບາດໂຄວິດ-19.

ທ່ານປະທານປະເທດກ່າວຕື່ມວ່າ: ໃນໄລຍະຫຼັງພະຍາດລະບາດໂຄວິດ-19 ບັນດາປະເທດຕ້ອງແບ່ງປັນ ແລະ ຮ່ຳຮຽນເຊິ່ງກັນ ແລະ ກັນ ກ່ຽວກັບເສດຖະກິດີຈິຕອນ, ປັນຍາປະດິດ, ການຄ້າເອເລັກໂຕນິກ ແລະ ການແບ່ງປັນພື້ນຖານຂໍ້ມູນຂ່າວານ, ເຄັດລັບວິທະຍາສາດເຕັກໂນໂລຊີທີ່ສຳຄັນທີ່ສຸດ. ພ້ອມທັງກ່າວວ່າ ການຄວບຄຸມການລະບາດຂອງພະຍາດໂຄວິດ-19 ບັນດາປະເທດອາຊີ ຕ້ອງຮ່ວມແຮງຮ່ວມໃຈກັນ ເພື່ອກາ້ວຂຶ້ນ, ຊ່ວຍເຫຼືອບັນດາປະເທດພັດທະນາຊ້າກວ່າ ເພື່ອສ້າງອາຊີແຫ່ງການພັດທະນາ ແລະ ວັດທະນາຖາວອນ.

ເຊິ່ງນີ້, ຖືເປັນຄັ້ງທີ 5 ທີ່ທ່ານ ທອງລຸນ ສີສຸລິດ ທີ່ໄດ້ຮັບການເຊື້ອເຊີນເຂົ້າຮ່ວມ ແລະ ກ່າວປາໄສໃນກອງປະຊຸມດັ່ງກ່າວ ນັບຕັ້ງແຕ່ເຄີຍດຳລົງຕຳແໜ່ງຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ນາຍົກລັດຖະມົນຕີ.