ຫວຽດນາມລົງນາມຈັດຊື້ວັກແຊັງຕ້ານໂຄວິດ-19 ຈາກ Pfizer ຈຳນວນ 31 ລ້ານຫຼອດ

ລາຍງານ 22 ພຶດສະພາ 2021, ອີງຕາມການລາຍງານຂອງສື່ທາງການຫວຽດນາມໃຫ້ຮູ້ວ່າ: ລັດຖະບານຫວຽດນາມໄດ້ລົງນາມໃນຂໍ້ຕົກລົງ ໃນການຈັດຊື້ວັກແຊັງຕ້ານພະຍາດໂຄວິດ-19 ກັບບໍລິສັດ Pfizer-BioNtech ຈຳນວນ 31 ລ້ານຫຼອດ ເພື່ອສະຫຼອງໃຫ້ແກ່ໂຄງການສັກວັກແຊັງແຫ່ງຊາດ ທີ່ກຳລັງດຳເນີນການຢູ່.

ໂດຍວັກແຊັງໃນປະລິມານດັ່ງກ່າວ ຈະຖືກສົ່ງມອບໃນໄຕມາດສາມ ແລະ ສີ່ ປີ 2021 ນີ້ ເຊິ່ງຈະເປັນການເພີ່ມປະລິມານການນຳເຂົ້າວັກແຊັງຕ້ານພະຍາດໂຄວິດ-19 ທີ່ຫວຽດນາມນຳເຂົ້າໃນປີນີ້ເປັນ 110 ລ້ານຫຼອດ.

ເຊິ່ງຫວຽດນາມໄດ້ຮັບວັກແຊັງ AstraZeneca ຈຳນວນ 2,611,000 ຫຼອດ ໃນນັ້ນ 2,493,600 ແມ່ນສົ່ງມອບໂດຍໂຄງການ COVAX ຂອງອົງການສະຫະປະຊາຊາດ.

ກະຊວງສາທາລະນະສຸກຫວຽດນາມລະບຸວ່າ: ບຸກຄະລາກອນທີ່ປະຕິບັດໜ້າທີ່ໃນແນວໜ້າຫຼາຍກວ່າ 1,011,390 ຄົນໄດ້ຮັບການສັກວັກແຊັງແລ້ວ ໃນລະຫວ່າງວັນທີ 8 ມີນາ ເຖິງ 18 ພຶດສະພາ 2021.

ລັດຖະບານຫວຽດນາມ ວາງແຜນໃນການຈັດຊື້-ຈັດຫາວັກແຊັງໃຫ້ໄດ້ 150 ລ້ານຫຼອດ ເພື່ອໃຫ້ຄວບຄຸມ 70% ຂອງປະຊາກອນໃນປະເທດ, ໂດຍທ່ານ ຟາມມີງຈິງ ນາລັດຖະມົນຕີຫວຽດນາມ ໄດ້ກ່າວເມື່ອວັນທີ 18 ພຶດສະພາ 2021 ທີ່ຜ່ານມາ ວ່າການຈັດຊື້ວັກແຊັງຕ້ານພະຍາດໂຄວິດ-19 ເປັນພາລະກິດເລັ່ງດ່ວນ ທີ່ຕ້ອງດຳເນີນການໃນທັນທີ.

ໃນວັນທີ 22 ພຶດສະພາ 2021 ເວລາ 11:00 ໂມງ ອີງຕາມຂໍ້ມູນຈາກກະຊວງສາທາລະນະສຸກຫວຽດນາມ, ຫວຽດນາມ ມີຜູ້ຕິດເຊື້ອພະຍາດໂຄວິດ-19 ທົ່ວປະເທດສະສົມຈຳນວນ 4,961 ຄົນ, ກຳລັງປິ່ນປົວຢູ່ 2,227 ຄົນ ແລະ ເສຍຊີວິດແລ້ວ 41 ຄົນ.