ນະຄອນຫຼວງວຽງຈັນຍັງອອກມາດຕະການເຂັ້ມງວດ ເພາະໂຄວິດຍັງແຜ່ລະບາດໃນຊຸມຊົນເປັນວົງກວ້າງ

ນະຄອນຫຼວງວຽງຈັນ ອອກແຈ້ງການເລກທີ 02/ຈນວ, ລົງວັນທີ 21 ພຶດສະພາ 2021 ວ່າດ້ວຍການຈັດຕັ້ງປະຕິບັດຄຳສັ່ງ ວ່າດ້ວຍການເພີ່ມທະວີມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ຢູ່ນະຄອນຫຼວງວຽງຈັນ ໃນໄລຍະວັນທີ 21 ພຶຶດສະພາ ຫາ 4 ມິຖຸນາ 2021.

ເນື່ອງຈາກສະພາບການແຜ່ລະບາດຍັງສືບຕໍ່ແຜ່ລາມໃນຊຸມຊົນເປັນວົງກວ້າງ ເຊິ່ງເຮັດໃຫ້ການຄວບຄຸມ ແລະ ສະກັດກັ້ນ ມີຄວາມຫຍຸ້ງຍາກຂຶ້ນ, ດັ່ງນັ້ນ, ນະຄອນຫຼວງວຽງຈັນ ຈຶ່ງຈຳເປັນຕ້ອງສືບຕໍ່ປະຕິບັດຕາມມາດຕະການຕ່າງໆຂອງລັດຖະບານຢ່າງເຂັ້ມງວດ, ພ້ອມທັງຍົກລະດັບມາດຕະການໃນການຄວບຄຸມ, ສະກັດກັ້ນການແຜ່ລະບາດຂອງພະຍາດໂຄວິດ-19 ແລະ ຜ່ອນຜັນບາງມາດຕະການຢູ່ນະຄອນຫຼວງວຽງຈັນດັ່ງນີ້:

  1. ໃຫ້ຈັດຕັ້ງປະຕິບັດມາດຕະການລວມຄື:
  • ຫ້າມບຸກຄົນເດີນທາງເຂົ້າ-ອອກ ນະຄອນຫຼວງວຽງຈັນ ເຊິ່ງຍັງເປັນພື້ນທີ່ທີ່ມີການແຜ່ລະບາດໃນຊຸມຊົນເປັນວົງກວ້າງ (ເຂດແດງ) ຍົກເວັ້ນຜູ້ທີ່ໄດ້ຮັບອະນຸຍາດຈາກຄະນະສະເພາະກິດສູນກາງ, ນະຄອນຫຼວງວຽງຈັນ ແລະ ພະແນກສາທາລະນະສຸກນະຄອນຫຼວງວຽງຈັນ
  • ຫ້າມເປີດຮ້ານບັນເທີງ, ຮ້ານຄາຣາໂອເກະ, ຮ້ານກິນດື່ມ, ຮ້ານນວດ-ສະປາ, ຮ້ານອິນເຕີເນັດຄາເຟ
  • ຫ້າມຈັດປະຊຸມ, ໂຮມຊຸມນຸມ ຫຼື ກິດຈະກຳຕ່າງໆຫຼາຍກວ່າ 10 ຄົນໃນເຂດທີ່ໄດ້ຮັບອະນຸຍາດ
  • ຫ້າມນຳໃຊ້ເຮືອທຸກລຳອອກເຄື່ອນໄຫວຕາມຊາຍແດນລຳແມ່ນ້ຳຂອງ, ຍົກເວັ້ນເຮືອຂອງກຳລັງ ປກຊ-ສປສ
  • ຫ້າມໂຄສະນາ, ເຜີຍແຜ່ ແລະ ສົ່ງຕໍ່ຂໍ້ມູນຂ່າວສານທີ່ມີບໍ່ມູນຄວາມຈິງ
  • ຫ້າມສວຍໂອກາດກັກຕຸນ ແລະ ຂຶ້ນລາຄາສິນຄ້າອຸປະໂພກ-ບໍລິໂພກ
  • ໂຈະການຮຽນ-ການສອນຊົ່ວຄາວທຸກຊັ້ນ, ທຸກສາຍ ໃນສະຖານການສຶກສາ ແຕ່ໃຫ້ຈັດຕັ້ງການຮຽນ-ການສອນທາງໄກ

2. ໃຫ້ຈັດຕັ້ງປະຕິບັດມາດຕະການເພີ່ມເຕີມຄື:

  • ຫ້າມເປີດຮ້ານເສີມສວຍ, ຮ້ານຕັດຜົມ, ສະຖານທີ່ທ່ອງທ່ຽວ, ສວນອາຫານ, ກາຊິໂນ, ສະນຸກເກີ້, ຮ້ານເກມທຸກປະເພດ, ສັງວຽນຕີໄກ່, ຕະຫຼາດກາງຄືນ ແລະ ອື່ນໆທີ່ມີການເຕົ້ມໂຮມຄົນຈຳນວນຫຼາຍ
  • ຫ້າມຈັດງານລ້ຽງສັງສັນ ຫຼື ຊຸມແຊວທຸກຮູບແບບຢູ່ທຸກສະຖານທີ່
  • ຫ້າມເດີນທາງເຂົ້າ-ອອກບ້ານແດງ ຕາມແຈ້ງການຂອງກະຊວງສາທາລະນະສຸກ ສະບັບເລກທີ 0488/ສທ, ລົງວັນທີ 20 ພຶດສະພາ 2021
  • ຕັ້ງຈຸດກວດກາຂອງເຈົ້າໜ້າທີ່ຢ່າງເຂັ້ມງວດ ໃນເຂດທີ່ມີການແຜ່ລະບາດ ເຊິ່ງໄດ້ກຳນົດເປັນເຂດ/ບ້ານແດງ ແລະ ນຳໃຊ້ມາດຕະການຕາມທີ່ກຳນົດໄວ້ໃນແຈ້ງການ 0488/ສທ ແລະ ແຈ້ງການ 0377/ອຄ
  • ຫ້າມຕັ້ງຈຸດບໍລິຈາກ ຫຼື ມອບເຄື່ອງຊ່ວຍເຫຼືອທີ່ບໍ່ມີຄວາມປອດໄພ ແລະ ບໍ່ໄດ້ຮັບອະນຸຍາດຈາກອົງການປົກຄອງທ້ອງຖິ່ນ
  • ຫ້າມຫຼິ້ນກິລາບານເຕະ, ການອອກຳລັງກາຍຢູ່ສະໜາມຫຼວງ, ບຶງທາດຫຼວງ ແລະ ສວນເຈົ້າອານຸວົງ ຍ້ອນເຫັນວ່າຍັງມີຄວາມສ່ຽງ ໃນການຄວບຄຸມຕໍ່ການແຜ່ລະບາດເຊື້ອພະຍາດ
  • ປັບໃໝ, ລົງໂທດ ແລະ ໃຫ້ຮັບຜິດຊອບຕໍ່ຄວາມເສຍຫາຍທີ່ເກີດຂຶ້ນ ຖ້າຫາກບຸກຄົນໃນລະເມີດມາດຕະການຕ່າງໆຕາມທີ່ກຳນົດໄວ້ ໃນຄຳສັ່ງເລກທີ 15/ນຍ ແລະ ແຈ້ງການອື່ນໆຂອງຄະນະສະເພາະກິດ, ກະຊວງ-ອົງການ ແລະ ຂອງນະຄອນຫຼວງວຽງຈັນວາງອອກ.

3. ໃຫ້ຈັດຕັ້ງປະຕິບັດມາດຕະການຜ່ອນຜັນຄື:

  • ຫຼຸດຜ່ອນການຕັ້ງຈຸດກວດກາ ໃນເຂດທີ່ກຳນົດເປັນການຄວບຄຸມຄວາມສ່ຽງລະຫວ່າງເມືອງ, ບ້ານ, ດ້ວຍການກວດກາລາດຕະເວນຂອງອົງການປົກຄອງບ້ານ, ປກສ ກຸ່ມບ້ານ, ເຈົ້າໜ້າທີ່ສະເພາະກິດ
  • ສະຖານທີ່ ທີ່ໄດ້ຮັບອະນຸຍາດໃຫ້ດຳເນີນກິດຈະການເຊັ່ນ: ຕະຫຼາດ, ຮ້ານຄ້າ, ສູນການຄ້າ, ຫ້າງຊັບພະສິນຄ້າ ໃນເຂດທົ່ວໄປ ໃຫ້ປິດບໍ່ກາຍ 22:00​ ໂມງ ແລະ ໃນເຂດແດງ ໃຫ້ປິດບໍ່ກາຍ 20:00​ ໂມງ, ພ້ອມທັງປະຕິບັດມາດຕະການປ້ອງກັນການຕິດເຊື້ອ ແລະ ແຜ່ເຊື້ອຢ່າງເຂັ້ມງວດ ຕາມທີ່ກຳນົດໄວໃນແຈ້ງການ 0377/ອຄ.ກຄຜນ
  • ຮ້ານອາຫານ ແລະ ຮ້ານກາເຟ ໃຫ້ບໍລິການໃນຮູບແບບຊື້ກັບເຮືອນ, ບໍ່ໃຫ້ລູກຄ້ານັ່ງກິນຢູ່ໃນຮ້ານ
  • ອະນຸຍາດໃຫ້ອອກກຳລັງກາຍ, ຫຼິ້ນກິລາກາງແຈ້ງເຊັ່ນ: ການຫຼິ້ນກິລາກັອບ ແລະ ກິລາອື່ນໆ ແຕ່ໃຫ້ເຈົ້າຂອງສະຖານທີ່ດັ່ງກ່າວ ສົ່ງແຜນລະອຽດ ໃນການປະຕິບັດມາດຕະການສະກັດກັ້ນ, ປ້ອງກັນພະຍາດໂຄວິດ-19 ຢ່າງເຄັ່ງຂັດ
  • ອະນຸຍາດໃຫ້ຜູ້ຂັບລົດ ແລະ ພະນັກງານຂົນສົ່ງສິນຄ້າ ສາມາດຮັບ-ສົ່ງສິນຄ້າ ຢູ່ພາຍໃນນະຄອນຫຼວງວຽງຈັນ ຍົກເວັ້ນສະຖານທີ່ ທີ່ຖືກກຳນົດເປັນເຂດ/ບ້ານແດງ